അഴകേകാന്‍ കറ്റാര്‍വാഴ; ഗുണങ്ങള്‍ നിരവധി

July 23, 2019

കറ്റാര്‍വാഴയുടെ ഗുണങ്ങള്‍ ചെറുതല്ല. സൗന്ദര്യസംരക്ഷണത്തിന്റെ കാര്യത്തില്‍ ഏറെ മുന്നിലാണ് കറ്റാര്‍ വാഴ അഥവാ അലോവേര. മുടിക്കും കണ്ണിനുമെല്ലാം ഗുണകരമാണ് കറ്റാര്‍വാഴ ഉപയോഗിക്കുന്നത്. കറ്റാര്‍വാഴയുടെ ചില സൗന്ദര്യഗുണങ്ങളെ പരിചയപ്പെടാം.

കറ്റാര്‍വാഴയുടെ ജെല്‍ ദിവസേന മുഖത്തു തേയ്ക്കുന്നത് മുഖക്കുരുവിന് ഉത്തമ പരിഹാരമാണ്. അതുപോലെതന്നെ മുഖത്തെ കറുത്ത പാടുകള്‍ നീക്കി, തിളക്കമാര്‍ന്ന ചര്‍മ്മം നല്‍കുന്നതിനും കറ്റാര്‍വാഴ സഹായിക്കുന്നു. ബാക്റ്റീരിയയെ ചെറുക്കാനുള്ള കഴിവ് കറ്റാര്‍വാഴയ്ക്കുണ്ട്. അതുകൊണ്ടുതന്നെ ചര്‍മ്മ സംരക്ഷണത്തിന്റെ കാര്യത്തില്‍ കറ്റാര്‍വാഴ മികച്ചുനില്‍ക്കുന്നു. മികച്ച ഒരു ആന്റി എയ്ജിങ് ക്രീം കൂടിയാണ് കറ്റാര്‍വാഴയുടെ ജെല്‍. ആന്റി ഓക്‌സിഡന്റുകള്‍ ധാരളമായി അടങ്ങിയിട്ടുള്ളതിനാല്‍ മുഖത്തെ നിറം വര്‍ധിപ്പിക്കാനും കറ്റാര്‍വാഴയുടെ ജെല്‍ സഹായിക്കുന്നു.

കണ്‍തടങ്ങളിലെ കറുപ്പ് മാറ്റുന്നതിനും കറ്റാര്‍വാഴ നല്ലതാണ്. കറ്റാര്‍വാഴയുടെ ജെല്ല് മസ്ലിന്‍ തുണിയില്‍ പൊതിഞ്ഞ് കണ്‍തടങ്ങളില്‍ വെയ്ക്കുന്നതുവഴി കണ്‍തടങ്ങളിലെ കറുപ്പ് അകറ്റാം. കറ്റാര്‍വാഴയുടെ നീരും കസ്തൂരി മഞ്ഞളും ചേര്‍ത്ത് മുഖത്തും ചര്‍മ്മത്തിലും പുരട്ടുന്നതു സൂര്യതാപം ഏറ്റ ചര്‍മ്മത്തിന് നല്ലതാണ്. ചര്‍മ്മത്തിന്റെ സ്വാഭാവിക നിറം നിലനിര്‍ത്തുന്നതിനും ഈ ലേപനം സഹായിക്കും.

മുടിയഴകിനും കറ്റാര്‍വാഴ നല്ലതാണ്. കറ്റാര്‍വാഴയുടെ ജെല്ലും മുട്ടയുടെ വെള്ളയും ചേര്‍ത്ത് തലയില്‍ പുരട്ടുന്നത് മുടി കൊഴിച്ചിലിനെ ചെറുക്കാന്‍ സഹായിക്കും. പ്രകൃതിദത്തമായ നല്ലൊരു കണ്ടീഷ്ണര്‍ കൂടിയാണ് കറ്റാര്‍വാഴ. കറ്റാര്‍വാഴയുടെ ജെല്‍ തലമുടിയിലും തലയോട്ടിയിലും തേക്കുന്നത് മുടിക്ക് തിളക്കം വര്‍ധിപ്പിക്കം. ചൂടുകാലത്ത് തലയ്ക്ക് തണുപ്പ് ലഭിക്കുന്നതിനും കറ്റാര്‍വാഴയുടെ ജെല്‍ തേച്ചാല്‍ മതി.

Read more:‘മെട്രോമാന്‍’ ഇ ശ്രീധരന്റെ ജീവിതം വെള്ളിത്തിരയിലേയ്ക്ക്; നായകന്‍ ജയസൂര്യ

മുടുവളര്‍ച്ചയെ മെച്ചപ്പെടുത്താനും കറ്റാര്‍ വാഴയുടെ ജെല്‍ സഹായിക്കുന്നു. ഇതിനു പുറമെ താരന്‍ അകറ്റാനും ഉത്തമമായ ഒരു മാര്‍ഗമാണ് കറ്റാര്‍ വാഴ എന്നത്. കറ്റാര്‍ വാഴയുടെ ജെല്‍ തലയില്‍ പുരട്ടുന്നത് താരന്‍ അകറ്റാന്‍ സഹായിക്കുന്നു.