‘ദി കുങ്ഫു മാസ്റ്ററി’നായി കണ്ണ് കെട്ടി ബോട്ടിൽ ക്യാപ് ചലഞ്ചുമായി നീത പിള്ള
‘പൂമരം’ എന്ന കാളിദാസ് ചിത്രത്തിലൂടെ മലയാള സിനിമ ലോകത്തേക്ക് എത്തിയ നടിയാണ് നീത പിള്ള. എബ്രിഡ് ഷൈൻ ‘പൂമര’ത്തിനു ശേഷം സംവിധാനം ചെയ്യുന്ന ‘ദി കുങ്ഫു മാസ്റ്ററി’ലും നായിക നീത പിള്ള തന്നെയാണ്. ഇപ്പോൾ സമൂഹ മാധ്യമങ്ങളിൽ ചർച്ചയും ഈ ചിത്രമാണ്. ട്രെയ്‌ലർ വന്നതോടെ ഹോളിവുഡ് നിലയരത്തിലുള്ള ഒരു ആക്ഷൻ ചിത്രം എന്ന വിശേഷണമാണ് ആരാധകർ ‘ദി കുങ്ഫു മാസ്റ്ററി’നു നൽകുന്നത്.
ട്രെയിലറിൽ ഏറെ ശ്രദ്ധിക്കപ്പെട്ടത് നീതയുടെ ആക്ഷൻ രംഗങ്ങളുമായിരുന്നു. ഇപ്പോൾ മറ്റൊരു വീഡിയോയിലൂടെ വീണ്ടും ശ്രദ്ധിക്കപ്പെടുകയാണ് നീത പിള്ള. ഒരു ബോട്ടിൽ ക്യാപ് ചലഞ്ചുമായാണ് നീത എത്തിയിരിക്കുന്നത്. കണ്ണുകെട്ടി ബോട്ടിൽ ക്യാപ് കാലുകൊണ്ട് തെറിപ്പിക്കുകയാണ് നടി.
മുൻപ് ബോട്ടിൽ ക്യാപ് ചലഞ്ചുകളുമായി പലരും എത്തിയിരുന്നെങ്കിലും നീതയുടേത് ഒരുപടി കൂടി കടന്ന് കണ്ണുകെട്ടിയുള്ളതാണ്. ഇത് ‘ദി കുങ്ഫു മാസ്റ്ററു’മായി ബന്ധപ്പെട്ട ചലഞ്ച് ആണ്. പ്രേക്ഷകർക്കും ഇതിൽ പങ്കാളികളാകാം.
Read More:ഹോളിവുഡ് ആക്ഷൻ രംഗങ്ങളുമായി ദി കുങ്ഫു മാസ്റ്റർ; എബ്രിഡ് ഷൈൻ ചിത്രം ഉടൻ
ക്യാപ് ചലഞ്ച് ചെയ്ത് ‘ദി കുങ്ഫു മാസ്റ്റർ’ എന്ന ഹാഷ്‌ടാഗോടെ ഫേസ്ബുക്കിൽ വീഡിയോ പോസ്റ്റ് ചെയ്യാം. നീത പിള്ളയും ജിജി സ്കറിയയുമാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. പേര് സൂചിപ്പിക്കുന്നത് പോലെതന്നെ കുങ്ഫു എന്ന ആയോധന കല പ്രമേയമാക്കിയാണ് ചിത്രം ഒരുങ്ങുന്നത്. ജനുവരി 24 ന് ചിത്രം തിയേറ്ററിൽ എത്തും.