“കേവലം ഒരു ശബ്ദമല്ലായിരുന്നു അങ്ങ് ഞങ്ങള്‍ക്ക്”; ഗോപനെക്കുറിച്ച് സംവിധായകന്‍ ജിസ് ജോയ് യുടെ സ്‌നേഹക്കുറിപ്പ്
മരണം പലപ്പോഴും അങ്ങനാണ്. പ്രിയപ്പെട്ടവരെ പെട്ടെന്നങ്ങ് കവര്‍ന്നെടുക്കും. ഒരു മുന്നറിയിപ്പുമില്ലാതെ. അതുകൊണ്ടാണല്ലോ മരണത്തെ രംഗബോധമില്ലാത്ത കോമാളി എന്ന് വിശേഷിപ്പിക്കുന്നതും. ആകാശവാണിയിലെ മുന്‍ വാര്‍ത്താ അവതാരകനായ ഗോപന്റെ മരണവാര്‍ത്തയും കേരളം വിങ്ങലോടെയാണ് കേട്ടത്. അത്രമേല്‍ പരിചിതമാണ് കേരളത്തിന് അദ്ദേഹത്തിന്റെ ശബ്ദം. ‘ശ്വാസകോശം സ്‌പോഞ്ച് പോലെയാണ്…’ എന്ന കേന്ദ്ര സര്‍ക്കാരിന്റെ പുകവലി വിരുദ്ധ പരസ്യത്തിലെ ശബ്ദം എങ്ങനെ മറക്കാനാകും. ചലച്ചിത്ര രംഗത്തും ഗോപന്‍ സാന്നിധ്യമറിയിച്ചിട്ടുണ്ട്. അടുത്തിടെ തീയറ്ററുകളിലെത്തിയ ‘വിജയ് സൂപ്പറും പൗര്‍ണ്ണമിയും’ എന്ന ചിത്രത്തില്‍ ഗോപന്‍ ശബ്ദം നല്‍കിയിരുന്നു. ഈ ഓര്‍മ്മ പങ്കുവെച്ചിരിക്കുകയാണ് ചിത്രത്തിന്റെ സംവിധായകനായ ജിസ് ജോയ് തന്റെ ഫെയ്‌സ്ബുക്ക് പേജിലൂടെ.
ജിസ് ജോയ് പങ്കുവെച്ച ഫെയ്‌സ്ബുക്ക് കുറിപ്പ്
കേവലം ഒരു ശബ്ദമല്ലായിരുന്നു
വിജയ് സൂപ്പറും പൗര്‍ണ്ണമിയും എന്ന എന്റെ ഏറ്റവും പുതിയ ചിത്രത്തില്‍ , തുടക്കത്തിലെ ഉള്ള ശബ്ദം ( നരേഷന്‍ ) ഗോപന്‍ ചേട്ടന്റേതായിരുന്നു !! ( ശ്വാസകോശം പുകവലി പാടില്ല പരസ്യത്തിലൂടെ പ്രശസ്തമായ ശബ്ദത്തിനുടമ )
മലയാള സിനിമയില്‍ സ്ഥിരം നരേഷന്‍ പലപ്പോഴും പ്രമുഖരായ ഏതാനും സംവിധായകരോ ശ്രീനിയേട്ടനോ ഒക്കെ ആണ് ചെയ്യാറ് !! എന്റെ സിനിമയില്‍ അതൊന്നു മാറ്റി പിടിക്കാം എന്ന് കരുതി , നമ്പര്‍ തേടിപ്പിടിച്ചു വിളിച്ചപ്പോള്‍ ഏറെ സന്തോഷത്തോടെ ചെയ്യാം എന്ന് ഗോപന്‍ ചേട്ടന് സമ്മതിച്ചു ! ഞാന്‍ ഇവിടെനിന്നു ട്രാക്ക് ഡബ് ചെയ്തു അയച്ചു കൊടുത്തു് , അതു കേട്ടു ഡല്‍ഹിയിലെ ഏതോ സ്റ്റുഡിയോയില്‍ പോയി ഡബ് ചെയ്ത് എനിക്ക് അയച്ചു തന്നു !! കേട്ടപ്പോള്‍ ഞാന്‍ ഒരുപാട് ചിരിച്ചു !നന്ദി പറയാന്‍ ഞാന്‍ വിളിച്ചപ്പോള്‍ എന്നോട് പരിഭവം പോലെ പറഞ്ഞു ‘ എന്തോ , സിനിമയില്‍ എന്റെ ശബ്ദം അങ്ങനെ ആരും ഉപയോഗിച്ചിട്ടില്ല , എനിക്ക് ഏറെ ആഗ്രഹം ഉണ്ടായിരുന്നിട്ടും. എന്ത് തോന്നി എന്റെ വോയ്‌സ് ഈ സിനിമയില്‍ ഉപയോഗിക്കാന്‍ ?’ ഞാന്‍ പറഞ്ഞു ‘പുതുമ’. പിന്നെ ചേട്ടന്റെ ശബ്ദം ഒരു ഫ്‌ലാഷ് മോബിന്റെ എഫക്ട് എനിക്ക് ചെയ്യാറുണ്ട് , അത് സിനിമയിലൂടെ പ്രേക്ഷകര്‍ക്കും നല്കാന്‍ ആയാല്‍ നല്ലതല്ലേ ? അദ്ദേഹം അത് കേട്ടു ഏറെ ചിരിച്ചു !! സിനിമയ്ക്ക് ആശംസ അറിയിച്ചു ഫോണ്‍ വെച്ചു !! ഏറെ നാള്‍ കഴിഞ്ഞു സിനിമ ഡല്‍ഹിയില്‍ കണ്ടതിനു ശേഷം എന്നെ ഫോണില്‍ വിളിക്കുകയും കേരളത്തില്‍ വരുമ്പോള്‍ നമുക്ക് കാണാം എന്ന് പറയുകയും ചെയ്തു !!
വിജയ് സൂപ്പറും പൗര്‍ണ്ണമിയും കണ്ട എത്രയോ പേര്‍ എന്നെ വിളിച്ചു അദ്ദേഹത്തിന്റെ ശബ്ദം ഉപയോഗിക്കാന്‍ തോന്നിയതു നന്നായെന്ന് പറഞ്ഞു !!
Read more:വിനീത് ശ്രീനിവാസന്‍ കേന്ദ്ര കഥാപാത്രമായി ‘മനോഹരം’; ഫസ്റ്റ്‌ലുക്ക് പോസ്റ്റര്‍
ഇന്നലെ ഒരു പ്രമുഖ സംവിധായകന്‍ എന്റെ കയ്യില്‍ നിന്നും ഗോപന്‍ ചേട്ടന്റെ നമ്പര്‍ വാങ്ങി , ഒരു പരസ്യം ഡബ് ചെയ്യിക്കാന്‍ !!അടുത്ത ആഴ്ചയാണ് ഡബ്ബിങ് അതിനു മുന്‍പ് എന്നോടൊന്ന് വിളിച്ചു ഗോപന്‍ ചേട്ടന്റെ അടുത്ത് itnroduce ചെയ്യണമെന്നും സംവിധായക സുഹൃത്തു ആവശ്യപ്പെട്ടു !! ഞാന്‍ സമ്മതിച്ചു !!
പെട്ടന്ന് ഇപ്പോ ഈ വാര്‍ത്ത കേള്‍ക്കുമ്പോള്‍ വിശ്വസിക്കാനാവുന്നില്ല !! എല്ലാ വേര്‍പാടും അങ്ങനെ ആണല്ലോ അല്ലെ !!
അതെ , നമുക്ക് ഇദ്ദേഹത്തിന്റെ ശബ്ദം കേള്‍ക്കുമ്പോള്‍ ലഭിച്ചിരുന്നത് ഒരു ഫ്‌ലാഷ് മോബ് കാണും പോലുള്ള ഊഷ്മളതയും ഉണര്‍വും ആയിരുന്നു !! ആലോചിച്ചു നോക്കുമ്പോള്‍ മറ്റാരും ഇല്ല ഒരു ശബ്ദം കൊണ്ട് മാത്രം അതൊക്കെ നമ്മിലുളവാക്കാന്‍ !!
സിനിമയില്‍ അദ്ദേഹത്തിന്റെ ശബ്ദം കൊണ്ടുവരാന്‍ ഒരു നിയോഗമായതിന് പിന്നിലും ഉണ്ടാകും എന്തേലുമൊക്കെ നിയോഗങ്ങള്‍ .. ഇപ്പോ എനിക്കതു അറിയില്ല …
ഒരിക്കല്‍ പോലും നേരില്‍ കണ്ടിട്ടില്ലാത്ത പ്രിയ ഗോപന്‍ ചേട്ടന് വേദനയോടെ വിട .. പ്രണാമം !!
അങ്ങയുടെ ശബ്ദം ‘ കേവലം ഒരു ശബ്ദമല്ലായിരുന്നു ഞങ്ങള്‍ക്ക്
