കടലിൽ നിന്നൊരു അപ്രതീക്ഷിത സ്നേഹം; അത്ഭുതത്തോടെ സഞ്ചാരികൾ, വീഡിയോ
യജമാനന്മാരോടുള്ള വളർത്തുമൃഗങ്ങളുടെ സ്നേഹം പലപ്പോഴും വാർത്തകളാകാറുണ്ട്. ചിലപ്പോഴൊക്കെ ചില മൃഗങ്ങളുടെ അപ്രതീക്ഷിത സ്നേഹവും നാം കാണാറുണ്ട്. എന്നാൽ കടലിൽ നിന്നുള്ള ഒരു അപ്രതീക്ഷിത സ്നേഹത്തിന്റെ വീഡിയോയാണ് ഇപ്പോൾ സമൂഹ മാധ്യമങ്ങളിൽ തരംഗമാകുന്നത്. ബോട്ട് യാത്രക്കിടെ കടലിൽ വീണ യുവതിയുടെ ഫോൺ തിരികെ നൽകിയാണ് ഈ അതിഥി സ്നേഹം പ്രകടിപ്പിച്ചത്.
നോര്‍വ്വെയിലെ ഹമ്മര്‍ഫെസ്റ്റ് ഹാര്‍ബറിലാണ് സംഭവം. സുഹൃത്തുക്കൾക്കൊപ്പം ബോട്ടിൽ കറങ്ങാനിറങ്ങിയ ഇസ ഓഫ്ദാൽ എന്ന യുവതിയുടെ കയ്യിൽ നിന്നും അപ്രതീക്ഷിതമായി ഫോൺ വെള്ളത്തിലേക്ക് വീണ് പോയി. ഒരു നിമിഷം എന്ത് ചെയ്യണമെന്നറിയാതെ നോക്കി നിന്ന യുവതിയുടെ അടുത്തേക്ക് അപ്രതീക്ഷിതമായി ഒരു അതിഥി എത്തി ..വെള്ളത്തിൽ വീണ ഫോണും കടിച്ചുപിടിച്ചുകൊണ്ടാണ് ആൾ അടുത്തെത്തിയത്. എന്നാൽ ഫോണുമായി എത്തിയ ആളെക്കണ്ട് യുവതിയും ബോട്ടിലുണ്ടായിരുന്നവരും ഞെട്ടി. കാരണം അത് ഒരു തിമിംഗലമായിരുന്നു വായിൽ കടിച്ചുപിടിച്ച് ഫോണുമായി യുവതിയുടെ അടുത്തേക്ക് എത്തിയത്.
തിമിംഗലത്തിന്റെ വായിൽ നിന്നും ഫോൺ ഏറ്റുവാങ്ങിയ ശേഷം യുവതിയും സഞ്ചാരികളും തിമിംഗലത്തിന്റെ നെറ്റിയിൽ തലോടി തങ്ങളുടെ സ്നേഹവും പ്രകടിപ്പിച്ചു. പിന്നീട് തിമിംഗലം കടലിലേക്ക് പോയി. ബോട്ടിലുണ്ടായിരുന്നവരാണ് ഈ ദൃശ്യങ്ങൾ പകർത്തി സോഷ്യൽ മീഡിയിൽ പങ്കുവെച്ചത്. ഇതോടെ തിമിംഗലത്തിലും ആരാധകർ ഏറെയായി.
