“മല്ലികേ നീ വാങ്ങിത്തന്ന ഷര്‍ട്ടാ…”; സുകുമാരന് കിടിലന്‍ അനുകരണവുമായി മകന്‍ ഇന്ദ്രജിത്ത്
വെള്ളിത്തിരയിലെ അഭിനയ വിസ്മയങ്ങള്‍ക്കൊപ്പം താരങ്ങളുടെ ഒഴിവു നേരങ്ങളിലെ വിനോദങ്ങളും പലപ്പോഴും ആരാധകര്‍ ഏറ്റെടുക്കാറുണ്ട്. ഇപ്പോഴിതാ സാമൂഹ്യമാധ്യമങ്ങളില്‍ വൈറലാവുകയാണ് സുകുമാരനെ അനുകരിക്കുന്ന ഇന്ദ്രജിത്ത് സുകുമാരന്റെ ഒരു വീഡിയോ. ‘മല്ലികേ നീ വാങ്ങിത്തന്ന ഷര്‍ട്ടാ…’ എന്ന ഡയലോഗാണ് അച്ഛന്റെ ശബ്ദത്തിലും ഭാവത്തിലും ഇന്ദ്രജിത്ത് അനുകരിക്കുന്നത്. മികച്ച പ്രതികരണം നേടുന്നുണ്ട് ഈ വീഡിയോ. ‘അച്ഛന്റെയല്ലേ മോന്‍, കഴിവ് കിട്ടാതിരിക്കുവോ…’ എന്നാണ് ആരാധകരില്‍ അധികവും നല്‍കുന്ന കമന്റ്. നിരവധി പേര്‍ താരത്തിന്റെ ഈ അനുകരണ വീഡിയോ സാമൂഹ്യമാധ്യമങ്ങളില്‍ പങ്കുവെയ്ക്കുന്നുണ്ട്.
അഭിനയമികവുകൊണ്ട് വെള്ളിത്തിരയില്‍ ശ്രദ്ധേയനാണ് ഇന്ദ്രജിത്ത് എന്ന താരം. 1986 ല്‍ പുറത്തിറങ്ങിയ ‘പടയണി’ എന്ന ചിത്രത്തില്‍ ബാലതാരമായിട്ടായിരുന്നു ചലച്ചിത്ര രംഗത്തേക്കുള്ള ഇന്ദ്രജിത്ത് സുകുമാരന്റെ അരങ്ങേറ്റം. പിന്നീട് ദീര്‍ഘനാളത്തെ ഇടവേളയ്ക്ക് ശേഷം ‘ഊമപ്പെണ്ണിന് ഉരിയാടപ്പയ്യന്‍’ എന്ന സിനിമയിലൂടെ ഇന്ദ്രജിത്ത് വീണ്ടും വെള്ളിത്തിരയിലെത്തി.
Read more:ഗജരാജവീരന്മാരേപ്പോല്‍ നെറ്റിപ്പട്ടവും പൂമാലകളും ചാര്‍ത്തി ആനവണ്ടികള്‍; വേറിട്ടൊരു ഉത്സവക്കാഴ്ച
2002 ല്‍ ലാല്‍ ജോസ് സംവിധാനം നിര്‍വ്വഹിച്ച ‘മീശമാധവന്‍’ എന്ന ചിത്രത്തിലെ ഈപ്പന്‍ പാപ്പച്ചി എന്ന ഇന്ദ്രജിത്ത് കഥാപാത്രത്തിലൂടെ പ്രേക്ഷകര്‍ക്കിടയില്‍ ശ്രദ്ധേയനായി താരം. മലയാളത്തിനു പുറമെ സന്തോഷ് ശിവന്‍ സംവിധാനം നിര്‍വ്വഹിച്ച ‘റോഡ് ടു ദ് ടോപ്പ്’ എന്ന ഹോളിവുഡ് ചിത്രത്തിലും ഇന്ദ്രജിത്ത് മുഖം കാണിച്ചിട്ടുണ്ട്. ഇതിനോടകം തന്നെ അമ്പതില്‍ അധികം സിനിമകളില്‍ താരം അഭിനയിച്ചിട്ടുണ്ട്.
സഹോദരന്‍ പൃഥ്വിരാജിന്റെ ആദ്യ സംവിധാന സംരംഭമായ, മോഹന്‍ലാല്‍ കേന്ദ്ര കഥാപാത്രമായെത്തുന്ന ‘ലൂസിഫര്‍’ എന്ന ചിത്രത്തില്‍ ഇന്ദ്രജിത്ത് ഒരു പ്രധാന കഥാപാത്രമായെത്തുന്നുണ്ട്. തീയറ്ററുകളില്‍ മികച്ച പ്രതികരണം നേടുന്നുണ്ട് ഈ ചിത്രം. അതേസമയം നിപാ വൈറസിനെ പ്രേമയമാക്കി ആഷിഖ് അബു സംവിധാനം നിര്‍വ്വഹിക്കുന്ന ‘വൈറസ്’ ആണ് ഇന്ദ്രജിത്തിന്റേതായി ഇനി റിലീസിനൊരുങ്ങുന്ന ചിത്രം. ഇന്ദ്രജിത്തിന്റെ ഭാര്യ പൂര്‍ണ്ണിമ ഇന്ദ്രജിത്തും ഈ സിനിമയില്‍ ഒരു പ്രധാന കഥാപാത്രമായെത്തുന്നുണ്ട്.
