മിന്നാമിനുങ്ങിന്റെ ശോഭയില്‍ ഫ്ളവേഴ്സ് ടോപ് സിംഗറിലെ ദേവിക
ഒരു മിന്നാമിനുങ്ങിനെപ്പോലെ ഫ്ളവേഴ്സ് ടോപ് സിംഗറിലേക്ക് പറന്നെത്തിയ പാട്ടുകാരിയാണ് ദേവിക സുമേഷ്. തൃശൂര്‍ ജില്ലയിലെ കോട്ടക്കടപ്പുറം ഫിഷറീസ് സ്‌കൂളിലെ അഞ്ചാം ക്ലാസ് വിദ്യാര്‍ത്ഥിനിയാണ് ഈ മിടുക്കി. പാട്ടുപ്രേമികള്‍ ഈ മിടുക്കിയെ ഓറഞ്ചൂട്ടി എന്നും സ്‌നേഹത്തോടെ വിളിക്കുന്നു.
ഫ്ളവേഴ്സ് ടോപ് സിംഗറില്‍ ആദ്യ ഗാനം ആലപിച്ചപ്പോള്‍ മുതല്‍ക്കെ ഏറെ ആരാധകരെയും സൃഷ്ടിച്ചിട്ടുണ്ട് പാട്ടിന്റെ കൂട്ടുകാരി ദേവിക. ഫ്ളവേഴ്സ് ടോപ് സിംഗറില്‍ മറ്റൊരു ഭാഗ്യവും ദേവികയെ തേടിയെത്തി. വിധികര്‍ത്താക്കള്‍ ഈ കുട്ടിപ്പാട്ടുകാരിക്ക് സമ്മാനിച്ചത് സംഗീതത്തിന്റെ ആദ്യ അക്ഷരങ്ങള്‍ ചൊല്ലിക്കൊടുക്കാനായി ഒരു ഗുരുനാഥയെ. ഫ്ളവേഴ്സ് ടോപ് സിംഗറിലെ ഒരോ പ്രകടനത്തിലും വിസ്മയങ്ങള്‍ തീര്‍ക്കാറുണ്ട് ഈ മിടുക്കി.
സംഗീതലോകത്ത് പാട്ടിന്റെ പാലാഴി കടഞ്ഞെടുക്കുന്ന കുരുന്നു ഗായിക പ്രതിഭകളെ കണ്ടെത്തുന്നതിനുള്ള പരിപാടിയാണ് ഫ്ളവേഴ്സ് ടോപ് സിംഗര്‍. സംഗീത ലോകത്തെ പ്രഗത്ഭരാണ് ഈ റിയാലിറ്റി ഷോയിലെ വിധികര്‍ത്താക്കള്‍. ഫ്ളവേഴ്സ് ടോപ്പ് സിംഗറിനു വേണ്ടി കേരളത്തിലെ എല്ലാ ജില്ലകളിലും ഓഡിഷന്‍ നടത്തിയിരുന്നു. ഇതിനുപുറമെ സാമൂഹ്യമാധ്യമങ്ങളിലൂടെ ലൈവ് ഓഡിഷനും നടത്തി. ഓഡിഷനിലെ വിവിധ കടമ്പകള്‍ കടന്നെത്തിയ കുട്ടി ഗായകരാണ് ഫ്ളവേഴ്സ് ടോപ് സിംഗര്‍ റിയാലിറ്റി ഷോയില്‍ മാറ്റുരയ്ക്കുന്നത്. അഞ്ച് മുതല്‍ 14 വയസുവരെയുള്ള കുട്ടികള്‍ ടോപ്പ് സിംഗറിലൂടെ സംഗീതത്തിന്റെ ഇന്ദ്രജാലവുമായി പ്രേക്ഷകര്‍ക്ക് മുമ്പിലെത്തുന്നു.
അതേസമയം മലയാള ടെലിവിഷന്‍ പ്രേക്ഷകര്‍ക്ക് എക്കാലത്തും പുതുമകള്‍ സമ്മാനിക്കുന്ന ഫ്ളവേഴ്സ് ടിവി മറ്റൊരു ചരിത്രമെഴുതുന്നു. ഫ്ളവേഴ്സ് ടോപ് സിംഗര്‍ സ്‌കോളര്‍ഷിപ്പ് ഫോര്‍ എജ്യൂക്കേഷന്‍. ടോപ് സിംഗറിലെ 22 മത്സരാര്‍ത്ഥികള്‍ക്കും മത്സരഫലം വരുന്നതിന് മുമ്പേ 20 ലക്ഷം രൂപയുടെ സ്‌കോളര്‍ഷിപ്പ് നല്‍കുന്നതാണ് ഈ പദ്ധതി. കുട്ടിപ്പാട്ടുകാര്‍ക്ക് ബുരുദാനന്തര ബിരുദം വരെ പഠിക്കാനാണ് ഇത്തരമൊരു സ്‌കോളര്‍ഷിപ്പ് പദ്ധതി നടപ്പിലാക്കുന്നത്.
ജ്യോതി ലബോറട്ടറീസ് സിഎംഡി എംപി രാമചന്ദ്രന്‍, അമേരിക്കയിലെ ട്രിനിറ്റി ഗ്രൂപ്പ് സിഇഒ സിജോ വടക്കന്‍, ഫ്ളവേഴ്സ് ടിവി ചെയര്‍മാന്‍ ഗോകുലം ഗോപാലന്‍, ഇന്‍സൈറ്റ് മീഡിയ സിറ്റി ചെയര്‍മാന്‍ ഡോ. ബി ഗോവിന്ദന്‍, ട്വന്റിഫോര്‍ വാര്‍ത്താ ചാനല്‍ ചെയര്‍മാന്‍ ആലുങ്കല്‍ മുഹമ്മദ്, ഫ്ളവേഴ്സ് ടിവി വൈസ് ചെയര്‍മാന്‍ ഡോ. വിദ്യാ വിനോദ്, ഫ്ളവേഴ്സ് ടിവി ഡയറക്‌ടേഴ്‌സായ സതീഷ് ജി പിള്ള, ഡേവിഡ് എടക്കളത്തൂര്‍ എന്നിവരുടെ സംയുക്ത സംരംഭമാണ് ഫ്ളവേഴ്സ് ടോപ് സിംഗര്‍ സ്‌കോളര്‍ഷിപ്പ് ഫോര്‍ എജ്യൂക്കേഷന്‍.
