നാട്ടിക ബീച്ചില്‍ പാട്ടുകളുടെ തിരയിളക്കത്തിന് ഇനി മണിക്കൂറുകള്‍
നാട്ടിക ബീച്ച് പാട്ടുകളുടെ തിരയിളക്കത്താല്‍ നിറയാന്‍ ഇനി മണിക്കൂറുകള്‍ മാത്രം ബാക്കി. ജനപ്രിയ ഗായകര്‍ പാടിത്തിമിര്‍ക്കുന്ന സംഗീത പുരസ്‌കാര നിശ, മ്യൂസിക് റ്റുമോറോ അവാര്‍ഡ്‌സ് 2020. ഈ സംഗീത അവാര്‍ഡ് നിശയില്‍ നിരവധി സംഗീത പ്രതിഭകള്‍ എത്തുന്നു.
തെന്നിന്ത്യന്‍ പിന്നണി ഗാനരംഗത്തെ പ്രണയഗായകന്‍ സിദ് ശ്രീറാം, യുവഹൃദയങ്ങള്‍ കീഴടക്കിയ സംഗീത സംവിധായകന്‍ ഗോപി സുന്ദര്‍, വിജയ് യേശുദാസ്, സിത്താര കൃഷ്ണകുമാര്‍, സൂരജ് സന്തോഷ്, സൗമ്യ, ഇഷാന്‍ ദേവ്, അമൃത സുരേഷ്, മധുമതി നാരായണി, അഭയ ഹിരണ്മയി തുടങ്ങിയ സംഗീത പ്രതിഭകള്‍ നാട്ടിക ബീച്ചില്‍ അരങ്ങേറുന്ന സംഗീതരാവില്‍ നിറസാന്നിധ്യമാകുന്നു.
അതേസമയം ജനുവരി 16 ന് ആരംഭിച്ച നാട്ടിക ബീച്ച് ഫെസ്റ്റിവല്‍ ഇന്ന് അവസാനിക്കും. ജനലക്ഷങ്ങള്‍ക്ക് കാഴ്ചവസന്തം സമ്മാനിച്ച നാട്ടിക ബീച്ച് ഫെസ്റ്റിന്റെ ഭാഗമായി രാമു കാര്യാട്ട് ഫിലിം അവാര്‍ഡ് 2020 ഇന്നലെ നാട്ടിക ബീച്ചില്‍ അരങ്ങേറി. താരസംഗമ രാവിന് സാക്ഷ്യം വഹിച്ചത് അനേകായിരങ്ങള്‍.
ഓരോ ദിവസവും വര്‍ണ്ണാഭമായ വിസ്മയക്കാഴ്ചകളാണ് നാട്ടിക ബീച്ച് ഫെസ്റ്റ് ജനങ്ങള്‍ക്ക് സമ്മാനിക്കുന്നതും. ആകര്‍ഷകമായ വിലക്കുറവില്‍ ഗൃഹോപകരണങ്ങളുടെ വമ്പന്‍ ശേഖരം, രുചി ഭേദങ്ങളുടെ കലവറ തീര്‍ത്ത് ഫുഡ് കോര്‍ട്ട്, പുഷ്പക്കാഴ്ചകളുമായി വൃന്ദാവന്‍ ഫ്ളവര്‍ ഷോ, വളര്‍ത്തുമൃഗങ്ങളുടെ പ്രദര്‍ശനം, കുട്ടികള്‍ക്കായി അമ്യൂസ്‌മെന്റ് പാര്‍ക്ക്, അക്വാ ഷോ എന്നിവയെല്ലാം ഫെസ്റ്റിന്റെ മാറ്റു കൂട്ടുന്നു.
ഇതിനുപുറമെ, വൈവിധ്യമാര്‍ന്ന വസ്ത്രങ്ങളുടെ മേള, ഓട്ടോമൊബൈല്‍, ഇന്റീരിയര്‍ ഡിസൈന്‍, വിദ്യാഭ്യാസ രംഗത്തെ കുറിച്ചുള്ള നിര്‍ദേശങ്ങള്‍ക്കായി പ്രത്യേക കൗണ്ടറുകള്‍, ലോണ്‍ മേള തുടങ്ങിയവയെല്ലാം നാട്ടിക ബീച്ച് ഫെസ്റ്റിന്റെ മറ്റ് ആകര്‍ഷണങ്ങളാണ്. മേളയില്‍ പങ്കെടുക്കാനെത്തുന്നവര്‍ക്ക് ഗുണമേന്മയുള്ള സാധനങ്ങള്‍ കുറഞ്ഞ വിലയില്‍ വാങ്ങാനുള്ള സൗകര്യവുമുണ്ട്.
