കിവീസിനെ എറിഞ്ഞിട്ട് ഇന്ത്യ; ഒന്നാം ഇന്നിങ്സിൽ ഏഴ് റൺസ് ലീഡ്
ന്യൂസീല‍ൻഡിനെതിരായ രണ്ടാം ടെസ്റ്റിലെ ഒന്നാം ഇന്നിങ്സില്‍ ഇന്ത്യയ്ക്ക് ഏഴു റണ്‍സിന്റെ ലീഡ്. ടോസ് നേടിയ ന്യൂസീലൻഡ് ഇന്ത്യയെ ബാറ്റിങ്ങിന് അയക്കുകയായിരുന്നു. എന്നാൽ ആദ്യം മുതലേ പ്രതീക്ഷിച്ച പ്രകടനം കാഴ്ചവയ്ക്കാൻ സാധിക്കാതിരുന്ന ഇന്ത്യൻ ടീം 242 റൺസിന് പുറത്തായി. മറുപടി ബാറ്റിങ്ങിന് ഇറങ്ങിയ കിവീസിനെ 235 റൺസിന് എറിഞ്ഞിടുകയായിരുന്നു ഇന്ത്യൻ പട.
ഓപ്പണിങ്ങിൽ മികച്ച തുടക്കം കാഴ്ച്ചവെച്ച കിവീസിനിന് പക്ഷെ ഇന്ത്യൻ ബോളർമാരുടെ മുന്നിൽ അധികസമയം പിടിച്ചുനിൽക്കാൻ സാധിച്ചില്ല. 122 പന്തുകളിൽനിന്ന് 52 റൺസെടുത്ത ടോം ലാതമാണ് കിവീസിന്റെ ടോപ് സ്‌കോറർ. കൈൽ ജാമീസൺ 63 പന്തിൽ 49 റൺസ് നേടി. 77 പന്തിൽ നിന്ന് 30 റൺസ് നേടി ടോം ബ്ലണ്ടൽ , ക്യാപ്റ്റൻ കെയ്ൻ വില്യംസൺ എട്ട് പന്തില്‍ മൂന്ന് റൺസ്, റോസ് ടെയ്‍ലർ 37 പന്തിൽ 15 റൺസ് , ഹെൻറി നിക്കോൾസ് 27 പന്തിൽ 14 റൺസ് , ബി.ജെ. വാട്‍ലിങ് (പൂജ്യം), കോളിൻ ഡി ഗ്രാൻഡ് ഹോം 44 പന്തിൽ 26 റൺസ്, ട്രെന്റ് ബോൾട്ട് രണ്ട് പന്തില്‍ നിന്ന് ഒരു റൺസ് എന്നിങ്ങനെയാണു മറ്റു കിവീസ് താരങ്ങളുടെ സ്കോർ നില.
അതേസമയം ഇന്ത്യയുടെ ഓപ്പണര്‍ പൃഥ്വി ഷാ (54), ചേതേശ്വര്‍ പുജാര (54), ഹനുമ വിഹാരി (55) എന്നിവര്‍ അര്‍ധസെഞ്ചുറി നേടി ടീമിൽ മികച്ച പ്രകടനം കാഴ്ചവെച്ചു.
