‘നിങ്ങൾ ഈ രാജ്യത്തിന്റെ അഭിമാനം’; മലയാളി നേഴ്‌സിനെ അഭിനന്ദിച്ച് യുഎഇ രാഷ്ട്രമാതാവ്
കൊറോണ വൈറസിനെതിരെ ആരോഗ്യപ്രവർത്തകരും ആശുപത്രി ജീവനക്കാരും അടക്കമുള്ളവർ ശക്തമായി പോരാടുകയാണ്. ഇപ്പോഴിതാ തങ്ങളുടെ സേവനങ്ങൾക്ക് യുഎഇയിൽ നിന്നും അഭിനന്ദനം ഏറ്റുവാങ്ങിയിരിക്കുകയാണ് മലയാളി നേഴ്‌സുമാർ.
യുഎഇ രാഷ്ട്രപിതാവ് ഷെയ്ഖ് സായിദ് ബിൻ സുൽത്താൻ അൽ നഹ്യാന്റെ ഭാര്യയും രാഷ്ട്രമാതാവുമായ ഷെയ്ഖ ഫാത്തിമ ബിൻത് മുബാറക് ആണ് ദുബായ് ഹെൽത്ത് കെയർ സിറ്റി മെഡിക്ലിനിക് സിറ്റി ആശുപത്രിയിലെ യൂണിറ്റ് മാനേജർ സുനിതാ ഗോപിക്ക് അഭിനന്ദനമറിയിച്ചത്. സുനിതയ്ക്ക് ഉൾപ്പെടെ നിരവധി നേഴ്‌സുമാർക്ക് രാഷ്ട്രമാതാവ് അഭിനന്ദന സന്ദേശം അയച്ചു.
സന്ദേശം ഇങ്ങനെ:
‘ പ്രിയപ്പെട്ട മകള്‍ സുനിത,
കൊറോണ ബാധിതരെ ചികിത്സിക്കുന്ന നിങ്ങളുടെ പരിശ്രമങ്ങള്‍ക്ക് നന്ദി. രാജ്യത്തിന്റെ ആവശ്യം തിരിച്ചറിഞ്ഞുള്ള പ്രവര്‍ത്തനങ്ങള്‍ക്ക് അഭിനന്ദനങ്ങള്‍, ഈ ദുഷ്‌കരമായ സമയത്ത് നിങ്ങളുടെ പ്രവര്‍ത്തനത്തെ ഓര്‍ത്ത് അഭിമാനിക്കുന്നു. ദൈവം എന്നും കൂടെയുണ്ടാകട്ടെ’
അതേസമയം അഭിനന്ദന സന്ദേശം ലഭിച്ചതിന്റെ സന്തോഷത്തിലാണ് സുനിത ഗോപി.
