‘അയ്യയ്യോ അതൊരു സംഭവം തന്നെ, ഇങ്ങനത്തൊരു മന്ത്രി കേരളത്തിൽ ഇതുവരെയില്ലാട്ടാ, നമ്മക്ക് ഇനി ഒന്നും പേടിക്കണ്ടാ’; ചിരിയും ചിന്തയും നിറച്ച് ഒരു വീഡിയോ
കൊവിഡ്-19 എന്ന മഹാമാരിയെ അതിജീവിക്കാൻ കേരള സർക്കാരും ആരോഗ്യപ്രവർത്തകരും മുൻപന്തിയിൽ തന്നെയുണ്ട്. കൊറോണ വൈറസിനെ പ്രതിരോധിക്കുന്നതിനായി കേരളം സ്വീകരിക്കുന്ന മാർഗങ്ങൾ രാജ്യാന്തര തലത്തിൽ വരെ ശ്രദ്ധയാകർഷിച്ചിരുന്നു. ഇപ്പോഴിതാ നമ്മുടെ മുഖ്യമന്ത്രി പിണറായി വിജയനെയും ആരോഗ്യമന്ത്രി ഷൈലജ ടീച്ചറെയും ആരോഗ്യപ്രവർത്തകരെയും അഭിനന്ദിച്ചുകൊണ്ടുള്ള ഒരു വ്യത്യസ്ത വീഡിയോയാണ് സമൂഹമാധ്യമങ്ങളുടെ ശ്രദ്ധ കവരുന്നത്‌.
അവതരണത്തിലെ വ്യത്യസ്തതയും, ഭാഷാശൈലിയുമാണ് വീഡിയോയ്ക്ക് ഇത്രയധികം പിന്തുണനേടിക്കൊടുത്തത്. കോഴിക്കോട് ശൈയിലാണ് കൊറോണ വൈറസിനെക്കുറിച്ചുള്ള ഒരു അവലോകനം ഏറെ രസകരമായി അവതരിപ്പിച്ചിരിക്കുന്നത്. ഒരു വയോധികനാണ് വീഡിയോയിൽ പ്രത്യക്ഷപ്പെടുന്നത്. തന്റെ സുഹൃത്തിനോട് കൊറോണ വൈറസ് എന്ന മഹാമാരിയെക്കുറിച്ചും, അതിനെതിരെ കേന്ദ്ര സർക്കാരും കേരള സർക്കാരും എടുത്ത നയങ്ങളെക്കുറിച്ചുമൊക്കെ സംസാരിക്കുന്നതാണ് വീഡിയോയിൽ അവതരിപ്പിച്ചിരിക്കുന്നത്.
കേന്ദ്ര സർക്കാർ കൊറോണ വൈറസ് പ്രതിരോധവുമായി ബന്ധപ്പെട്ട് ആഹ്വനം ചെയ്ത പാത്രം കൊട്ടലിനെക്കുറിച്ചും ലൈറ്റണയ്ക്കലിനെക്കുറിച്ചും വിമർശനാത്മകമായി സംസാരിക്കുന്ന ഇദ്ദേഹം, മുഖ്യമന്ത്രിയുടെ വാർത്താ സമ്മേളനത്തെക്കുറിച്ചും വളരെ കൃത്യമായി പറഞ്ഞുവെയ്ക്കുന്നുണ്ട്. സമൂഹമാധ്യമങ്ങളിൽ പങ്കുവെയ്ക്കപ്പെട്ട ഈ വീഡിയോയ്ക്ക് മികച്ച പിന്തുണയാണ് ലഭിക്കുന്നത്.
