പിറന്ന നാടിനായി പ്രാണന്‍ കൊടുത്ത മഹാത്മാക്കളുടേയും ധീരജവാന്മാരുടേയും സ്മരണകളുണര്‍ത്തി ‘കാവല്‍മേഘങ്ങള്‍’
ഇന്ന് ആഗസ്റ്റ് 15. ഭാരതം സ്വാതന്ത്ര്യത്തിന്റെ തിലകക്കുറിയണഞ്ഞിട്ട് ഇന്നേക്ക് 74 വര്‍ഷങ്ങള്‍. പ്രാണനെക്കാള്‍ വലുതാണ് പിറന്നനാടിന്റെ മാനവും സ്വാതന്ത്ര്യവുമെന്ന് നമ്മെ പഠിപ്പിച്ചു കടന്നുപോയ അനേകം മഹാത്മാക്കളുടെയും ധീരജവാന്മാരേയും വിസ്മരിക്കാനാവില്ല ഈ ദിവസം.
ജനിച്ചുവീണ മണ്ണിനുവേണ്ടി പൊരുതി യുദ്ധഭൂമിയില്‍ പിടഞ്ഞുവീണ വീരസൂര്യന്മാരായ ധീരയോദ്ധാക്കളുടെ പാവനസ്മരണയ്ക്ക് മുന്നില്‍ ഗാനാഞ്ജലി ഒരുക്കിയിരിക്കുകയാണ് ഫ്ളവേഴ്സ് ടിവി. ‘കാവല്‍ മേഘങ്ങള്‍’ എന്ന ഈ സംഗീതാവിഷ്‌കാരത്തില്‍ പ്രതിഫലിക്കുന്നത് ഇന്ത്യന്‍ സൈന്യത്തിന്റെ പോരാട്ട വീര്യവും ആത്മത്യാഗവുമൊക്കെയാണ്.
ഇന്ത്യന്‍ സൈന്യത്തിന്റെ ത്യാഗങ്ങള്‍ പ്രതിഫലിക്കുന്നുണ്ട് ഈ ഗാനരംഗത്ത്. മരണം മുന്നില്‍കാണുമ്പോഴും ധീരത കൈവെടിയാത്ത വീരന്മാരാണ് ഇന്ത്യന്‍ സൈന്യം. ഒറ്റവാക്കില്‍ പറഞ്ഞാല്‍ ചങ്കുറപ്പുള്ള ഹീറോസ്. കൊടും ചൂടിലും അതിശൈത്യത്തിലും രാജ്യത്തിന്റെ സുരക്ഷയ്ക്കായി കയ്- മെയ് മറന്ന് പ്രയ്തനിക്കുന്നു… സ്വയം സേവിക്കുന്നതിന് മുമ്പ് സേവനം എന്ന ആപ്തവാക്യത്തില്‍ അടിയുറച്ച് ജീവിതം രാജ്യത്തിനായി സമര്‍പ്പിച്ച ധീര യോദ്ധാക്കളെ ഓര്‍മ്മപ്പെടുത്തുകയാണ് ഈ സംഗീതാവിഷ്‌കാരം.
രാജേഷ് ആര്‍ നാഥ് ആണ് ഗാനത്തിലെ വരികള്‍ എഴുതിയിരിക്കുന്നത്. അര്‍ജുന്‍ അജു സംഗീതം പകര്‍ന്നിരിക്കുന്നു. സാന്‍ഡിയാണ് ആലാപനം. സനു വര്‍ഗീസ് ജിഷ്ണു എസ് ഗിരീശന്‍ എന്നിവര്‍ ചിത്ര സംയോജനം നിര്‍വഹിച്ചിരിക്കുന്നു. ഗ്രാഫിക്സ് കൈകാര്യം ചെയ്തിരിക്കുന്നത് യദു കൃഷ്ണനാണ്.
Story highlights: Independence Day Kaval Meghangal Music Video
