‘കാതോർത്തു കാതോർത്തു…’ ഉണ്ണി മേനോന്റെ ആലാപനത്തിൽ ‘കര്‍ണന്‍ നെപ്പോളിയന്‍ ഭഗത് സിംഗി’ലെ പ്രണയഗാനം
‘കര്‍ണന്‍ നെപ്പോളിയന്‍ ഭഗത് സിംഗ്’ ഇവര്‍ മൂന്നു പേരുമാണ് എന്റെ ഹീറോസ്…’ മലയാളികള്‍ വര്‍ഷങ്ങള്‍ക്ക് മുമ്പേ ഏറ്റെടുത്തതാണ് ഈ ഡയലോഗ്. 2014-ല്‍ തിയേറ്ററുകളിലെത്തിയ ‘സെവന്‍ത് ഡേ’ എന്ന ചിത്രത്തിലേതാണ് ഈ ഡയലോഗ്. പൃഥ്വിരാജിന്റെ ഈ ഡയലോഗ് ഇന്നും എടുത്ത് പ്രയോഗിക്കാറുണ്ട് പലരും. ‘കര്‍ണന്‍ നെപ്പോളിയന്‍ ഭഗത് സിംഗ്’ എന്ന പേരില്‍ പുതിയ ചിത്രം ഒരുങ്ങുന്നുവെന്ന വാർത്തയും ഏറെ ആവേശത്തോടെയാണ് സിനിമ പ്രേമികൾ സ്വീകരിച്ചത്.
ഇപ്പോഴിതാ ചിത്രത്തിലെ ആദ്യ ലിറിക്കൽ വീഡിയോ പങ്കുവെച്ചിരിക്കുകയാണ് അണിയറ പ്രവർത്തകർ. ഒരിടവേളയ്‌ക്കുശേഷം ഉണ്ണി മേനോൻ മലയാളത്തിൽ പാടുന്നു എന്ന പ്രത്യേകതയും ഈ ഗാനത്തിനുണ്ട്. ‘കാതോർത്തു കാതോർത്തു ഞാനിരിക്കെ’ എന്ന് തുടങ്ങുന്ന പാട്ടിന് വരികളെഴുതിയിരിക്കുന്നത് ബി കെ ഹരിനാരായണനാണ്. രഞ്ജിൻ രാജിന്റേതാണ് സംഗീതം.
ശരത് ജി മോഹന്‍ ആണ് കര്‍ണന്‍ നെപ്പോളിയന്‍ ഭഗത് സിംഗ് എന്ന ചിത്രത്തിന്റെ സംവിധാനം. ഗ്രാമ പശ്ചാത്തലത്തില്‍ ഒരുങ്ങുന്ന ചിത്രമാണിത്. ധീരജ് ഡെന്നിയാണ് ചിത്രത്തിലെ കേന്ദ്ര കഥാപാത്രം. കല്‍ക്കി എന്ന സിനിമയില്‍ ഗോവിന്ദ് എന്ന കഥാപാത്രത്തിലൂടെ ശ്രദ്ധേയനായ ധീരജ് ഡെന്നി ‘കര്‍ണന്‍ നെപ്പോളിയന്‍ ഭഗത് സിംഗ് എന്ന സിനിമയിലൂടെ നായക നിരയിലേക്കെത്തുന്നു.
Read also :‘എന്റെ പൊന്നളിയാ നമിച്ചു, ഫ്രിഡ്‌ജിൽ കേറ്റണോ’; ടൊവിനോയുടെ മസിൽ കണ്ട് ഞെട്ടി അജു വർഗീസ്
സസ്‌പെന്‍സ് ത്രില്ലറായി ഒരുക്കുന്ന ചിത്രത്തില്‍ കോമഡിക്കും പ്രധാന്യം നല്‍കുന്നുണ്ട്. സംവിധായകന്‍ ശരത് ജി മോഹന്‍ ആണ് ചിത്രത്തിന്റെ രചനയും. ഫസ്റ്റ് പേജ് എന്റര്‍ടെയ്ന്‍മെന്റിന്റെ ബാനറില്‍ മോനു പഴേടത്ത് ആണ് ചിത്രത്തിന്റെ നിര്‍മാണം. പ്രശാന്ത് കൃഷ്ണ ഛായാഗ്രഹണവും റെക്‌സണ്‍ ജോസഫ് സിനിമയുടെ ചിത്രസംയോജനവും നിര്‍വഹിക്കുന്നു.
Story Highlights: Karnan Napoleon Bhagat Singh Kathorthu Kathorthu Lyric Video
