റിമോട്ട് കാർ അതിവിഗദ്ധമായി പാർക്ക് ചെയ്ത് കൊച്ചുമിടുക്കൻ; വൈറൽ വീഡിയോ

കഴിഞ്ഞ് കുറച്ച് ദിവസങ്ങളായി കാറും കാർ പാർക്കിങ്ങുമൊക്കെയാണ് സമൂഹമാധ്യമങ്ങളിൽ ഏറെ ശ്രദ്ധയാകർഷിക്കുന്നത്. നിന്നുതിരിയാന്‍ പോലും സ്ഥലമില്ലാത്ത ഒരു ചെറിയ സ്ലാബിന്റെ മുകളില്‍ നിന്നും ഇന്നോവ കാര്‍ പെര്‍ഫെക്ടായി റോഡിലേക്കിറക്കുന്ന ഒരു ഡ്രൈവറുടെ വീഡിയോയാണ് സോഷ്യൽ മീഡിയയിൽ ഏറെ ശ്രദ്ധിക്കപ്പെട്ടത്. അതിസാഹസീകമായി വാഹനം ഓടിച്ച ഡ്രൈവറെ അഭിനന്ദിച്ചും നിരവധി ആളുകൾ എത്തിയിരുന്നു.

ഇപ്പോഴിതാ അത്തരത്തിൽ ടോയ് കാർ അതിവിഗദ്ധമായി പാർക്ക് ചെയ്യുന്ന ഒരു കൊച്ചുമിടുക്കനാണ് സമൂഹ മാധ്യമങ്ങളിലെ താരം. റിമോട്ട് കണ്ട്രോളിൽ പ്രവർത്തിക്കുന്ന കാർ ആണ് ഈ മിടുക്കൻ വളരെ വിദഗ്‌ധമായി പാർക്ക് ചെയ്യുന്നത്. റൂമിൽ ഒരുക്കിയിരിക്കുന്ന പാർക്കിംഗ് സ്ലോട്ടിൽ നിന്നും സാഹസികമായി കാർ പുറത്തിറക്കുന്ന ഈ കൊച്ചുമിടുക്കന്റെ ഡ്രൈവിങ് സ്‌കിൽ ഇതിനോടകം സോഷ്യൽ മീഡിയ ഏറ്റെടുത്ത് കഴിഞ്ഞു.

പാർക്കിംഗ് സ്ലോട്ടിന്റെ രണ്ടു വശങ്ങളിലുമായി ബാരിക്കേഡുകൾ പോലെ ഷട്ടിൽ കോക്കുകളും സ്ഥാപിച്ചിട്ടുണ്ട്. അവിടെ ഒരുക്കിയിരിക്കുന്ന കാർപെറ്റിൽ നിന്നും  താഴെ പോകാതെയും അതിനൊപ്പം ബാരിക്കേഡുകളിൽ തട്ടാതെയും വളരെ സൂക്ഷിച്ചാണ് ഈ മിടുക്കൻ വാഹനം പുറത്തിറക്കുന്നത്. സമൂഹ മാധ്യമങ്ങളിൽ പങ്കുവയ്ക്കപ്പെട്ട ഈ വീഡിയോ ഇതിനോടകം വൈറലായിക്കഴിഞ്ഞു. നിരവധിപ്പേരാണ് ഈ മിടുക്കനെ അഭിനന്ദിച്ച് കൊണ്ടെത്തിയത്.

Story Highlights:boy parking toy car viral video