‘ഇന്നും ഇച്ചാക്കയ്ക്ക് പറ്റിയ കഥയ്ക്കും കഥാപാത്രത്തിനുമായുള്ള തിരച്ചിൽ തുടരുന്നു’; മമ്മൂട്ടിയുടെ പഴയകാല കുടുംബ ചിത്രം പങ്കുവെച്ച് സംഗീത് ശിവൻ
മലയാളത്തിന്റെ മെഗാ സ്റ്റാർ മമ്മൂട്ടിയുടെ പിറന്നാൾ ദിനത്തിൽ ലോകം മുഴുവനുമുള്ള മലയാളികൾ അദ്ദേഹത്തിന് ആശംസകളുമായി എത്തിയിരുന്നു. അദ്ദേഹത്തിന്റെ ചിത്രങ്ങൾ പങ്കുവെച്ചും മമ്മൂട്ടിക്കൊപ്പമുള്ള അനുഭവങ്ങൾ പങ്കുവെച്ചുമൊക്കെ നിരവധി സുഹൃത്തുക്കളും ആരാധകരും എത്തിയിരുന്നു. എന്നാൽ അദ്ദേഹത്തിന്റെ ഒരു പഴയകാല കുടുംബ ചിത്രമാണ് ഇപ്പോൾ സമൂഹമാധ്യമങ്ങളിൽ ഏറെ ശ്രദ്ധിക്കപ്പെടുന്നത്. സംവിധായകനും തിരക്കഥാകൃത്തുമായ സംഗീത് ശിവനാണ് മമ്മൂട്ടിയുടെ പഴയകാല ചിത്രം പങ്കുവെച്ചിരിക്കുന്നത്.
സംഗീത് ശിവന്റെ കുറിപ്പ് വായിക്കാം:
ഇച്ചാക്കയ്ക്ക്.. ആദ്യമേ എല്ലാവിധ ജന്മദിനാശംസകളും നേരട്ടെ.. എന്റെ ആദ്യചിത്രം വ്യൂഹം കണ്ടതിനു ശേഷം അഭിനന്ദിക്കാനായി വിളിച്ചപ്പോഴാണ് ആദ്യമായി ഇച്ചാക്കയുമായി സംസാരിക്കുന്നത്. പിന്നീട് ഞങ്ങൾ കൂടുതൽ അടുക്കുന്നത് ഒരു ചെന്നൈ യാത്രയിൽ ആണ്. യോദ്ധ സിനിമ റിലീസ് ആയ സമയം.. ഫ്ലൈറ്റിൽ യാത്രക്കായി പുറപ്പെട്ട എന്നെ ടിക്കറ്റ് ക്യാൻസൽ ചെയ്യിപ്പിച്ചു, ശേഷം അദ്ദേഹത്തിന്റെ പുതിയ കാറിൽ ആണ് ഞങ്ങൾ യാത്ര തിരിച്ചത്. ഇച്ചാക്ക തന്നെ ആയിരുന്നു ചെന്നൈ വരെ ഡ്രൈവ് ചെയ്തത്. വഴിയോരത്തെ തട്ടുകയിൽ നിന്ന് ആയിരുന്നു ഫുഡ്‌ ഒക്കെ കഴിച്ചത്.
വളരെ സിംപിൾ ആയ ഒരു മനുഷ്യൻ. ഞങ്ങൾ തമ്മിൽ ഒരു സിനിമ ചെയ്തിട്ടില്ലെങ്കിലും ഇന്നും നല്ല ബന്ധം കാത്തുസൂക്ഷിക്കുന്നവരാണ്. അദ്ദേഹത്തിന്റെ ഫാമിലി ആയിട്ടും നല്ല ബന്ധം കാത്തുസൂക്ഷിക്കുന്നു. യാദൃശ്ചികമായി ഇച്ചാക്ക വീട്ടിൽ വരികയും അദ്ദേഹത്തിന്റെയും ഫാമിലിയുടെയും ഒരുപാട് ഫോട്ടോസ് ഞാൻ എടുത്തിട്ടുണ്ട്. അതിൽ എനിക്കേറ്റവും പ്രിയപ്പെട്ട ഫോട്ടോ ഞാൻ ഇവിടെ പോസ്റ്റ്‌ ചെയ്യുന്നു.
ഇന്നും ഞാൻ കേൾക്കുന്ന ചോദ്യമാണ് എന്താണ് ഇച്ചാക്കയെ വെച്ച് ഒരു മൂവി ചെയാത്തത് എന്ന്. യോദ്ധയ്ക്ക് ശേഷം ഇച്ചാക്കയെ വെച്ചുള്ള പ്രൊജക്റ്റ്‌ ആയിരുന്നു പ്ലാൻ ചെയ്തത്. രഞ്ജിത്തിനെ ആയിരുന്നു തിരക്കഥ എഴുതാൻ കരുതിയിരുന്നത്. പിന്നീട് എന്തൊക്കെയോ കാരണങ്ങൾ കൊണ്ട് ആ പ്രൊജക്റ്റ്‌ നടക്കാതെ പോയി. ഇന്നും ഇച്ചാക്കക്ക് പറ്റിയ കഥക്കും കഥാപാത്രത്തിനുമായുള്ള എന്റെ തിരച്ചിൽ തുടരുന്നു..
Story Highlights:sangeeth sivan shares memory about mammootty
