ഐപിഎല്ലിൽ മിന്നിത്തിളങ്ങിയ മലയാളി താരം ദേവ്ദത്തിന് അഭിനന്ദനവുമായി സൗരവ് ഗാംഗുലി

ഇന്ത്യൻ പ്രീമിയർ ലീഗ് ആവേശത്തിലാണ് ക്രിക്കറ്റ് പ്രേമികൾ. കൊവിഡ് മഹാമാരി സൃഷ്ടിച്ച ബുദ്ധിമുട്ടുകൾക്കിടയിലും ഐപിഎൽ തുടങ്ങിയതിന്റെ സന്തോഷത്തിലാണ് ക്രിക്കറ്റ് പ്രേമികൾ. എന്നാൽ ഇഷ്ടടീമുകൾ കളിക്കളത്തിൽ അത്ഭുതങ്ങൾ ഒരുക്കുമ്പോൾ മലയാളികൾക്ക് അഭിമാനിക്കാൻ ഒന്നുകൂടിയുണ്ട്. തകർപ്പൻ അർധ സെഞ്ചുറിയുമായി അരങ്ങേറ്റം കുറിച്ച മലയാളി താരം ദേവ്ദത്ത് പടിക്കൽ എന്ന ഇടംകൈയ്യൻ താരം.

അരങ്ങേറ്റ മത്സരത്തിൽ തന്നെ മികച്ച പ്രകടനം കാഴ്ചവെച്ച ദേവ്ദത്ത് പടിക്കലിന് അഭിനന്ദനവുമായി മുൻ ഇന്ത്യൻ ക്യാപ്റ്റനും ബിസിസിഐ പ്രസിഡന്റുമായ സൗരവ് ഗാംഗുലി അടക്കമുള്ളവരാണ് എത്തിയിരിക്കുന്നത്. ഇതിന് പിന്നാലെ കമന്റേറ്റർമാരായ ആകാശ് ചോപ്ര, ഹർഷ ഭോഗ്‍ലെ തുടങ്ങിയവരും ദേവ്ദത്തിനെ അഭിനന്ദിച്ച് രംഗത്തെത്തി. ‘ദേവ്ദത്ത് പടിക്കലിന്റെ പ്രകടനം വളരെയധികം ആസ്വദിച്ചു. ഇടംകൈയ്യന്മാരുടെ കളി കാണുന്നത് തന്നെ ഒരു ഭംഗിയാണ്’- എന്നാണ് ഗാംഗുലി ട്വിറ്ററിൽ കുറിച്ചത്.

റോയൽ ചാലഞ്ചേഴ്സ് ബാംഗ്ലൂരിന്റെ താരമാണ് ദേവ്ദത്ത്. സൺറൈസേഴ്സ് ഹൈദരാബാദിനെതിരായ മത്സരത്തിൽ ഓപ്പണറായി ഇറങ്ങിയ താരം മികച്ച പ്രകടനമാണ് കാഴ്ചവെച്ചത്. 42 പന്തിൽ എട്ടു ഫോറുകൾ സഹിതം 56 റൺസാണ് ദേവ്ദത്ത് എടുത്തത്.

അതേസമയം സീസണിലെ നാലാം ഐപിഎൽ മത്സരത്തിൽ ടോസ് നേടിയ ചെന്നൈ സൂപ്പർ കിങ്സ് രാജസ്ഥാൻ റോയൽസിനെതിരെ ബോളിങ് തിരഞ്ഞെടുത്തു. ഷാർജ ക്രിക്കറ്റ് സ്റ്റേഡിയത്തിലാണ് മത്സരം നടക്കുന്നത്.

Story Highlights: sourav ganguly praise devdutt padikkal