‘ഓകെ മലയാളീസ്’ ഒന്നിച്ചു; വിനീത് ശ്രീനിവാസന്റെ ആലാപനത്തിൽ ഒരുങ്ങിയത് മനോഹര ഗാനം

മലയാളികളുടെ പ്രിയതാരം വിനീത് ശ്രീനിവാസന്റെ ആലാപനത്തിൽ ഫേസ്ബുക്ക് കൂട്ടായ്മയായ ഓകെ മലയാളീസ് ഗ്രൂപ്പ് ഒരുക്കിയ ആൽബമാണ് ഇപ്പോൾ സോഷ്യൽ ലോകത്ത് ഏറെ ശ്രദ്ധിക്കപ്പെടുന്നത്. ഒക്ടോബർ എട്ടിന് സമൂഹമാധ്യമങ്ങളിലൂടെ പുറത്തിറക്കിയ ആൽബം ഇതിനോടകം ആസ്വാദക ഹൃദയങ്ങൾ കീഴടക്കികഴിഞ്ഞു. ലോകത്തിന്റെ വിവിധ ഭാഗങ്ങളിൽ നിന്നുമുള്ള മലയാളികൾ ചേർന്ന് രൂപം നല്കിയ ഫേസ്ബുക്ക് ഗ്രൂപ്പാണ് ഓകെ മലയാളീസ്. ഈ കൂട്ടായ്മയിലെ തന്നെ അംഗങ്ങൾ ചേർന്ന് വരികൾ എഴുതി സംഗീതം നൽകിയ ആൽബമാണ് ഇപ്പോൾ ഏഴ് ശ്രദ്ധിക്കപ്പെടുന്നത്.

സൗഹൃദം,ഗൃഹാതുരത്വം തുടങ്ങിയ ആശയങ്ങളുടെ അകമ്പടിയോടെയാണ് ആൽബം ഒരുക്കിയിരിക്കുന്നത്. വിനീത് ശ്രീനിവാസന്റെ ആലാപനമാണ് വീഡിയോയുടെ പ്രധാന ആകർഷണം. ആൽബത്തിന്റെ വരികൾ തയാറാക്കിയിരിക്കുന്നത് ശ്രീകുമാർ ശശിധരൻ, അരുൺ ഗോപിനാഥ്‌, ജോമിത് ഗോപാൽ എന്നിവർ ചേർന്നാണ്. സംഗീതം-ശ്രീകുമാർ ശശിധരൻ, ജിൻസ് ഗോപിനാഥ്‌, പ്രോഗ്രാമിങ് ജിൻസ് ഗോപിനാഥ്‌, ഓടക്കുഴൽ-രാജേഷ് ചേർത്തല, കീ ബോർഡ്-മനു എഫ്രം, റിഥം -സന്ദീപ് എൻ വെങ്കിടേഷ്, എഡിറ്റിങ് സൂര്യ ദേവും നിർവഹിച്ചിരിക്കുന്നു.

തിരക്കഥാകൃത്തും സംവിധായകനും ഗായകനുമൊക്കെയായ വിനീത് ശ്രീനിവാസൻ മലയാള സിനിമ ലോകത്ത് തിരക്കുള്ള ഒരു താരമാണ്. പ്രണവ് മോഹൻലാലും, കല്യാണി പ്രിയദർശനും ഒന്നിക്കുന്ന ‘ഹൃദയം’ എന്ന ചിത്രത്തിന്റെ പണിപ്പുരയിലാണ് വിനീത് ശ്രീനിവാസൻ. പ്രവീൺ രാജ് പൂക്കാടൻ സംവിധായകനാകുന്ന വെള്ളേപ്പം എന്ന ചിത്രത്തിന് വേണ്ടി വിനീത് ശ്രീനിവാസൻ ആലപിച്ച ഗാനം അടുത്തിടെ ഏറെ ശ്രദ്ധ നേടിയിരുന്നു. സാജൻ ബേക്കറി എന്ന ചിത്രത്തിന് വേണ്ടി വിനീത് ആലപിച്ച  തോരാമഴയിലും എന്ന് തുടങ്ങുന്ന ഗാനം ഏറെ ശ്രദ്ധിക്കപ്പെട്ടിരുന്നു.

Story Highlights:Ok Malayalees music album Vineeth Sreenivasan