തകര്‍ത്തടിച്ചും എറിഞ്ഞു വീഴ്ത്തിയും സണ്റൈസേഴ്സ് ഹൈദരബാദ്; കിങ്സ് ഇലവന്‍ പഞ്ചാബിനെതിരെ തകര്‍പ്പന്‍ ജയം
ഇന്ത്യന്‍ പ്രീമിയര്‍ ലീഗില്‍ കിങ്സ് ഇലവന്‍ പഞ്ചാബിനെതിരെ തകര്‍പ്പന്‍ ജയവുമായി സണ്റൈസേഴ്സ് ഹൈദരബാദ്. 69 റണ്‍സിനാണ് വിജയം.
നിശ്ചിത ഓവറില്‍ ആറ് വിക്കറ്റ് നഷ്ടത്തില്‍ 201 റണ്‍സാണ് ഹൈദരബാദ് അടിച്ചെടുത്തത്. 202 റണ്‍സ് വിജയ ലക്ഷ്യവുമായി മറുപടി ബാറ്റിങ്ങിനിറങ്ങിയ പഞ്ചാബിന് അടി തെറ്റി. കളത്തില്‍ ശക്തമായ പോരാട്ടം നിക്കോളാസ് പൂരന്‍ നടത്തിയെങ്കിലും കാര്യമുണ്ടായില്ല. 16.5 ഓവറുകള്‍ ആയപ്പോഴേക്കും 132 റണ്‍സുമായി പഞ്ചാബ് കളം വിട്ടു. 37 പന്തില്‍ നിന്നുമായി 77 റണ്‍സ് അടിച്ചെടുത്ത പൂരന്‍ ആണ് പഞ്ചാബിനെ അല്‍പമെങ്കിലും പിടിച്ചു നിര്‍ത്തിയത്. ഏഴ് സിക്‌സും അഞ്ച് ഫോറും നേടിയെങ്കിലും ടീമിനെ രക്ഷിക്കാന്‍ പൂരനായില്ല.
ടോസ് നേടിയ സണ്റൈസേഴ്സ് ഹൈദരബാദ് ബാറ്റിങ് തെരഞ്ഞെടുക്കുകയായിരുന്നു. തുടക്കം മുതലേ ബാറ്റിങ്ങില്‍ മികവ് പുലര്‍ത്താനും ടീമിനായി. ഓപ്പണര്‍മാരായ ജോണി ബെയര്‍സ്റ്റോയും ഡേവിഡ് വാര്‍ണറും തകര്‍പ്പന്‍ പ്രകടനമാണ് കാഴ്ചവെച്ചത്. ആദ്യ വിക്കറ്റ് നഷ്ടമാകുന്നതുവരെ ഇരുവരും ചേര്‍ന്ന് 160 റണ്‍സ് നേടി.
55 പന്തില്‍ നിന്നുമായി 97 റണ്‍സാണ് ബെയര്‍സ്റ്റോ അടിച്ചെടുത്തത്. 40 പന്തുകളില്‍ നിന്നുമായി 52 റണ്‍സ് ഡേവിഡ് വാര്‍ണറും നേടി. അതിവേഗം അമ്പത് കടന്ന സണ്റൈസേഴ്സ് പഞ്ചാബിനെ പ്രതിരോധത്തിലാക്കി. കിങ്സ് ഇലവന്‍ പഞ്ചാബ് ക്യാപ്റ്റന്‍ കെ എല്‍ രാഹുല്‍ ബൗളിങ്ങില്‍ പല വൈവിധ്യങ്ങള്‍ കൊണ്ടുവന്നെങ്കിലും അതെല്ലാം അടിച്ചുപറത്തുകയായിരുന്നു സണ്റൈസേഴ്സ് ഹൈദരബാദ്.
Story highlights: SRH won by 69 runs
