സൺറൈസേഴ്സ് ഹൈദരാബിദിന് 150 റൺസ് വിജയലക്ഷ്യം
ഇന്ത്യൻ പ്രീമിയർ ലീഗിലെ നിർണായക മത്സരത്തിൽ ആദ്യം ബാറ്റ് ചെയ്ത മുംബൈ ഇന്ത്യൻസ് നിശ്ചിത ഓവറിൽ എട്ട് വിക്കറ്റ് നഷ്ടത്തിൽ 149 റൺസ് നേടി. ക്യാപ്റ്റൻ രോഹിത് ശർമ്മ തിരിച്ചെത്തിയെങ്കിലും മികച്ച ബാറ്റിങ് പ്രകടനം നടത്താൻ രോഹിത് ശർമ്മയ്ക്ക് കഴിഞ്ഞില്ല. അവസാന ഓവറുകളിൽ ആഞ്ഞടിച്ച പൊള്ളാർഡാണ് മുംബൈയെ ഭേദപ്പെട്ട സ്കോറിലേക്ക് എത്തിച്ചത്. 25 പന്തിൽ നിന്നും നാല് സിക്സറുകളും രണ്ടു ഫോറുകളും ഉൾപ്പെടെ പൊള്ളാർഡ് 41 റൺസ് നേടി. സൺറൈസേഴ്സ് ഹൈദരാബാദിന് വേണ്ടി സന്ദീപ് ശർമ്മ മൂന്ന് വിക്കറ്റ് വീഴ്ത്തി. ജേസൺ ഹോൾഡറും ഷഹബാസ് നദീമും രണ്ട് വിക്കറ്റ് വീതവും റഷീദ് ഖാൻ ഒരു വിക്കറ്റ് വീതവും വീഴ്ത്തി.
പ്ലേ ഓഫിന് മുൻപുള്ള അവസാന മത്സരത്തിൽ ടോസ് നേടിയ ഹൈദരാബാദ് ബോളിങ് തിരഞ്ഞെടുക്കുകയായിരുന്നു. ഇന്നത്തെ മത്സരത്തിൽ ജയിച്ചാൽ മാത്രമേ സൺറൈസേഴ്സ് ഹൈദരാബാദിന് പ്ലേ ഓഫിൽ കടക്കാൻ സാധിക്കുക. വിജയത്തോടെ രണ്ട് പോയിന്റ് നേടി പോയിന്റ് പട്ടികയിൽ മൂന്നാം സ്ഥാനം ഉറപ്പിച്ച് പ്ലേ ഓഫിലേക്ക് കടക്കാൻ ആയിരിക്കും വാർണറും കൂട്ടരും ശ്രമിക്കുക.
നിലവിൽ മൂന്ന് ടീമുകൾ പ്ലേ ഓഫിലേക്ക് കടന്നു കഴിഞ്ഞു. മുംബൈ ഇന്ത്യൻസ്, ഡൽഹി ക്യാപിറ്റൽസ്, റോയൽ ചലഞ്ചേഴ്‌സ് ബാംഗ്ലൂർ പ്ലേ ഓഫിൽ സ്ഥാനമുറപ്പിച്ചു. ഇനി ബാക്കിയുള്ള ഒരു സ്ഥാനത്തിന് വേണ്ടിയാണ് ഇന്നത്തെ മത്സരം നിർണായകമാകുന്നത്. ആ സ്ഥാനം സൺറൈസേഴ്സ് ഹൈദരാബാദോ കൊൽക്കത്ത നൈറ്റ് റൈഡേഴ്‌സോ എന്നത് മാത്രമാണ് ഇനി നിർണയിക്കപ്പെടേണ്ടത്.
Story Highlights: Ipl 2020 SRH vs MI
