‘മൂത്തോന്’ ഒരു വയസ്സ്; സന്തോഷം പങ്കുവെച്ച് നിവിനും ഗീതു മോഹന്‍ദാസും
നിവിന്‍ പോളിയെ നായകനാക്കി ഗീതു മോഹന്‍ദാസ് സംവിധാനം നിര്‍വഹിച്ച ചിത്രമായിരുന്നു മൂത്തോന്. രാജ്യാന്തര തലത്തില്‍ തന്നെ ശ്രദ്ധ നേടിയ ചിത്രം പ്രേക്ഷകരിലേക്കെത്തിയിട്ട് ഒരു വര്‍ഷം പിന്നിട്ടു. ചിത്രത്തിന്‍രെ സന്തോഷം നിവിന്‍ പോളിയും ഗീതു മോഹന്‍ദാസും സമൂഹമാധ്യമങ്ങളിലൂടെ പങ്കുവെച്ചു.
വ്യത്യസ്തമായ കഥാപ്രമേയം കൊണ്ടും വേറിട്ട അവതരണരീതികൊണ്ടും ശ്രദ്ധ നേടിയ ചിത്രമാണ് ‘മൂത്തോന്’. ലക്ഷദ്വീപില്‍ നിന്നും തന്റെ ചേട്ടനെ തിരഞ്ഞ് മുംബൈയിലേയ്ക്ക് പോകുന്ന ഒരു യുവാവിന്റെ കഥയാണ് ചിത്രത്തിന്റെ പ്രമേയം. മലയാളത്തിലും ഹിന്ദിയിലുമായിട്ടാണ് ചിത്രം ഒരുക്കിയിരിക്കുന്നത്. ലക്ഷദ്വീപിലും മുംബൈയിലുമായിട്ടായിരുന്നു സിനിമയുടെ ചിത്രീകരണം.
Read more: അച്ഛനും അമ്മയ്ക്കും ഒപ്പം പ്രാര്‍ത്ഥന; മനോഹരം ഈ കുടുംബ ചിത്രം
‘മൂത്തോന്’ എന്ന ചിത്രത്തിന്റെ ഛായാഗ്രഹണം നിര്‍വഹിച്ചിരിക്കുന്നത് ഗീതു മോഹന്‍ദാസിന്റെ ഭര്‍ത്താവ് രാജീവ് രവിയാണ്. പ്രശസ്ത ബോളിവുഡ് സംവിധായകന്‍ അനുരാഗ് കശ്യപാണ് ചിത്രത്തിന്റെ ഹിന്ദി സംഭാഷണങ്ങള്‍ എഴുതിയിരിക്കുന്നത്. ചിത്രത്തിന്റെ നിര്‍മാതാക്കളില്‍ ഒരാള്‍ കൂടിയാണ് അനുരാഗ് കശ്യപ്.
ബി. അജിത്കുമാര്‍, കിരണ്‍ ദാസ് എന്നിവര്‍ ചേര്‍ന്നാണ് സിനിമയുടെ ചിത്രസംയോജനം നിര്‍വഹിച്ചിരിക്കുന്നത്. അനുരാഗ് കശ്യപ്, വിനോദ് കുമാര്‍, അജയ് ജി റായ്, അലന്‍ മാക് അലക്‌സ്എന്നിവര്‍ ചേര്‍ന്നാണ് ചിത്രത്തിന്റെ നിര്‍മാണം. നിവിന്‍ പോളിക്കും റോഷനും പുറമെ സഞ്ജന ദീപു, ശശാങ്ക് അറോറ, ശോഭിത ധുലിപാല, ദിലീഷ് പോത്തന്‍, ഹരീഷ് ഖന്ന, സുജിത് ശങ്കര്‍, മെലീസ രാജു തോമസ് തുടങ്ങിയവരും ചിത്രത്തില്‍ അഭിനേതാക്കളായെത്തി.
Story highlights: One year of Moothon
