രാജ്യത്ത് പ്രതിദിന കൊവിഡ് കേസുകളില്‍ കുറവ്; രോഗമുക്തരായവരുടെ എണ്ണം 96 ലക്ഷം കടന്നു
ഇന്ത്യയില്‍ പ്രതിദിനം റിപ്പോര്‍ട്ട് ചെയ്യുന്ന കൊവിഡ് 19 കേസുകളില്‍ കുറവ്. നേരിയ ആശ്വാസം നല്‍കുന്നതാണ് ഈ കണക്കുകള്‍. കഴിഞ്ഞ 24 മണിക്കൂറിനിടെ 24,337 പേര്‍ക്കാണ് രാജ്യത്ത് കൊവിഡ് സ്ഥിരീകരിച്ചത്. അതേസമയം ഇതോടെ രാജ്യത്താകെ കൊവിഡ് സ്ഥിരീകരിച്ചവരുടെ എണ്ണം 1,00,55,560 ആയി.
ഓരോ ദിവസവും റിപ്പോര്‍ട്ട് ചെയ്യപ്പെടുന്ന കൊവിഡ് പോസിറ്റീവ് കേസുകളേക്കാള്‍ അധികമാണ് പ്രതിദിനം റിപ്പോര്‍ട്ട് ചെയ്യപ്പെടുന്ന രോഗമുക്തി നിരക്ക്. കഴിഞ്ഞ ഒരു ദിവസത്തിനിടെ 25,709 പേര്‍ രോഗത്തില്‍ നിന്നും മുക്തരമായി. ഇതോടെ രാജ്യത്താകെ കൊവിഡ് രോഗത്തില്‍ നിന്നും മുക്തരായവരുടെ എണ്ണം 96,06,111 ആയി.
നിലവില്‍ രാജ്യത്തിന്റെ വിവിധ ഇടങ്ങളിലായി 3,03,639 പേരാണ് കൊവിഡ് രോഗത്തിന് ചികിത്സയില്‍ കഴിയുന്നത്. അതേസമയം 24 മണിക്കൂറിനിടെ 333 കൊവിഡ് മരണങ്ങളും റിപ്പോര്‍ട്ട് ചെയ്തു. 1,45,810 പേരാണ് ഇന്ത്യയില്‍ ഇതുവരെ കൊവിഡ് മൂലം മരണപ്പെട്ടത്.
Story highlights: 24,337 new covid cases reported in India
