വീട് വിശേഷങ്ങളുമായി അനുശ്രീ; കൊച്ചിയിലെ പുതിയ ഫ്ലാറ്റ് പരിചയപ്പെടുത്തി താരം, വീഡിയോ
ഇഷ്ടതാരങ്ങളുടെ സിനിമ വിശേഷങ്ങൾ പോലെത്തന്നെ താരങ്ങളുടെ കുടുംബവിശേഷങ്ങളും ആരാധകർ ഏറ്റെടുക്കാറുണ്ട്. അത്തരത്തിൽ കുറഞ്ഞ കാലയളവിനുള്ളിൽ പ്രേക്ഷക ഹൃദയങ്ങൾ കീഴടക്കിയ താരമാണ് അനുശ്രീ. നാട്ടിൻപുറത്തുനിന്നും സിനിമയിലേക്കെത്തിയ അനുശ്രീ ഒരുപിടി മികച്ച കഥാപാത്രങ്ങളെ ഇതിനോടകം പ്രേക്ഷകർക്ക് നൽകിക്കഴിഞ്ഞു. വെള്ളിത്തിരയിൽ തിരക്കുള്ള അനുശ്രീ സോഷ്യൽ മീഡിയയിലും സജീവ സാന്നിധ്യമാണ്. സിനിമ വിശേഷങ്ങളും കുടുംബ വിശേഷങ്ങളുമടക്കം സോഷ്യൽ മീഡിയിൽ താരം പങ്കുവയ്ക്കാറുണ്ട്.
ഇപ്പോഴിതാ അത്തരത്തിൽ അനുശ്രീ പങ്കുവെച്ച ഒരു വീഡിയോയാണ് ആരാധകർക്കിടയിൽ ഏറെ ശ്രദ്ധിക്കപ്പെടുന്നത്. കൊച്ചിയിലെ പുതിയ ഫ്ലാറ്റ് പരിചയപ്പെടുത്തുന്ന വീഡിയോയാണ് അനുശ്രീ പങ്കുവെച്ചിരിക്കുന്നത്. കാക്കനാടാണ് അനുശ്രീയുടെ പുതിയ ഫ്ലാറ്റ്. പൊതുവെ ഫ്ലാറ്റിലെ ലൈഫ് ഇഷ്ടമല്ലെങ്കിലും ജോലിയുമായി ബന്ധപ്പെട്ടുള്ള തിരക്കുകൾ കാരണമാണ് കൊച്ചിയിൽ ഒരു ഫ്ലാറ്റ് വാങ്ങിയതെന്നും അനുശ്രീ വീഡിയോയിൽ പറയുന്നുണ്ട്.
Read also:സംസ്ഥാനത്ത് ഇന്ന് 4470 പേര്‍ക്ക് കൊവിഡ്; 4847 പേർക്ക് രോഗമുക്തി
2012ൽ ‘ഡയമണ്ട് നെക്‌ളേസ്’ എന്ന ചിത്രത്തിലൂടെയാണ് അനുശ്രീ സിനിമാ ലോകത്തേക്ക് ചുവടുവച്ചത്. ചിത്രത്തിലെ കലാമണ്ഡലം രാജശ്രീ എന്ന കഥാപാത്രം ശ്രദ്ധ നേടിയതോടെ കൈനിറയെ അവസരങ്ങളാണ് അനുശ്രീയെ തേടിയെത്തിയത്. വെടി വഴിപാട്, റെഡ് വൈൻ, പുള്ളിപ്പുലികളും ആട്ടിൻകുട്ടിയും, ചന്ദ്രേട്ടൻ എവിടെയാ, ഒപ്പം, ആദി തുടങ്ങിയ ചിത്രങ്ങളിൽ ശ്രദ്ധേയ വേഷങ്ങളാണ് അനുശ്രീ കൈകാര്യം ചെയ്തത്. ഇതിഹാസ, മഹേഷിന്റെ പ്രതികാരം തുടങ്ങിയ ചിത്രങ്ങളിലൂടെ മലയാള സിനിമയിൽ തന്റേതായ സ്ഥാനം ഉറപ്പിക്കാൻ അനുശ്രീയ്ക്ക് സാധിച്ചു. ‘പ്രതി പൂവൻ കോഴി’യും, ‘മൈ സാന്റ’യുമാണ് അനുശ്രീയുടേതായി തിയേറ്ററുകളിൽ അവസാനമെത്തിയ ചിത്രങ്ങൾ.
Story Highlights: Anusree introducing new flat kochi
