സാധാരണക്കാരന്റെ ലംബോര്‍ഗിനി ഹിറ്റ്; അനസ് എന്ന മിടുക്കനെ അഭിനന്ദിച്ച് സാക്ഷാല്‍ ലംബോര്‍ഗിനി കമ്പനിയും: വീഡിയോ
ചിലരുണ്ട്, ജീവിതത്തില്‍ ബുദ്ധിമുട്ടുകള്‍ക്കിടയിലും സ്വപ്‌നങ്ങളെ ചേര്‍ത്തുപിടിക്കുന്നവര്‍. ഇടുക്കി സ്വദേശിയായ അനസും പ്രിയപ്പെട്ട ഒരു സ്വപ്നത്തെ ചേര്‍ത്തുപിടിച്ചു. ഒരു കാര്‍ സ്വന്തമായി നിര്‍മിക്കുക എന്നതായിരുന്നു അനസിന്റെ സ്വപ്നം. ആ സ്വപ്നം സഫലമായപ്പോള്‍ അഭിനന്ദനങ്ങള്‍ക്കൊണ്ട് നിറയുകയാണ് അനസ് എന്ന മിടുക്കന്‍.
ഉപയോഗശൂന്യമായ വസ്തുക്കള്‍ പ്രയോജനപ്പെടുത്തിക്കൊണ്ട് അനസ് നിര്‍മിച്ചത് ലംബോര്‍ഗിനി കാറാണ്. സാധാരണക്കാരന്റെ ലെബോര്‍ഗിനി എന്ന അടിക്കുറിപ്പോടെ അനസിന്റെ വാഹനത്തിന്റെ ചിത്രങ്ങളും വീഡിയോയുമെല്ലാം സമൂഹമാധ്യമങ്ങളില്‍ ശ്രദ്ധ നേടി. വീഡിയോ വൈറലായതോടെ സാക്ഷാല്‍ ലംബോര്‍ഗിനി കമ്പനിയില്‍ നിന്നും അനസിനെ ഫോണില്‍ വിളിച്ച് അഭിനന്ദനമറിയിച്ചു.
പതിനെട്ട് മാസംകൊണ്ടാണ് പച്ചനിറത്തിലുള്ള ലംബോര്‍ഗിനി കാര്‍ അനസ് സ്വയം നിര്‍മിച്ചെടുത്തത്. രണ്ട് ലക്ഷത്തോളം രൂപ ചെലവായി. വാഹനനിര്‍മാണത്തിനായി കൂടുതലും ഉപയോഗപ്പെടുത്തിയത് പാഴ്-വസ്തുക്കളാണ് എന്നതും മറ്റൊരു ആകര്‍ഷണം. പന്തല്‍ പണിക്കും കേറ്ററിങ് ജോലിക്കുമെല്ലാം പോയി കിട്ടുന്ന പണത്തില്‍ നിന്നും അല്‍പം ബാക്കിവെച്ചാണ് ലംബോര്‍ഗിനി കാര്‍ എന്ന സ്വപ്നം ഈ യുവാവ് യാഥാര്‍ത്ഥ്യമാക്കിയത്.
Read more: ഈ ചിത്രങ്ങള്‍ അച്ഛനും അമ്മയ്ക്കും മകന്‍ നല്‍കിയ സ്‌നേഹസമ്മാനം
എംബിഎ ബിരുദധാരിയാണ് അനസ്. മൂന്ന് വര്‍ഷങ്ങള്‍ക്ക് മുമ്പ് പിതാവ് മരണപ്പെട്ടതാടെ അമ്മ മേഴ്‌സിയും അനസും അനുജനും സാമ്പത്തീകമായി ഏറെ ബുദ്ധിമുട്ടനുഭവിച്ചു. പ്രളയകാലത്ത് വീടിനും കേടുപാടുകള്‍ സംഭവിച്ചതോടെ കുടുംബം കൂടുതല്‍ ദുരിതത്തിലായി. എങ്കിലും കിട്ടുന്ന സമയത്ത് ജോലി ചെയ്ത് അനസ് കുടുംബത്തെ മുന്നോട്ടു നയിക്കുന്നു.
പച്ചനിറത്തില്‍ അഭിമാനപൂര്‍വ്വം അനസിന്റെ വീട്ടുമുറ്റത്തു കിടക്കുന്ന ലംബോര്‍ഗിനി കാര്‍ കാണാന്‍ എത്തുന്നവരും ഏറെയാണ്. ഒറിജിനല്‍ ലംബോര്‍ഗിനിക്ക് സമാനമായ രീതിയില്‍ തന്നെയാണ് ഈ ലംബോര്‍ഗിനി യുവാവ് നിര്‍മിച്ചിരിക്കുന്നതും. സണ്‍ റൂഫ്, പവര്‍ വിന്‍ഡോ, ക്യാമറ, ഡിസ്‌ക് ബ്രേക്ക് തുടങ്ങി ആഡംബര കാറായ ലംബോര്‍ഗിനിയിലെ സൗകര്യങ്ങളെല്ലാം അനസ് തന്റെ കാറിലും സജ്ജമാക്കിയിട്ടുണ്ട്. എന്തായാലും സൈബര്‍ ഇടങ്ങളില്‍ വൈറലാണ് സാധാരണക്കാരന്റെ ഈ ലംബോര്‍ഗിനി വിശേഷങ്ങള്‍.
Story highlights: Ordinary Lamborghini by Anas Goes Viral
