‘ഞാൻ എങ്ങനെ ആരംഭിച്ചുവെന്നും എവിടെ നിന്ന് വന്നുവെന്നും എന്നും ഓർമ്മിക്കും’- ആദ്യ സിനിമയുടെ ഒൻപതാം വാർഷിക നിറവിൽ ദുൽഖർ സൽമാൻ

ദുൽഖർ സൽമാൻ ആദ്യമായി അഭിനയിച്ച ചിത്രമാണ് സെക്കൻഡ് ഷോ. വലിയ പ്രഖ്യാപനങ്ങളോ വമ്പൻ താരനിരയോ ഒന്നുമില്ലാതെ, ഒരുകൂട്ടം പുതുമുഖങ്ങൾക്കൊപ്പം ദുൽഖർ അഭിനയലോകത്തേക്ക് ചുവടുവെച്ചിട്ട് ഒൻപതുവർഷം പിന്നിടുകയാണ്. ഒരു താരപുത്രനിൽ നിന്നും പാൻ-ഇന്ത്യൻ താരം എന്ന നിലയിൽ ദുൽഖർ സൽമാൻ ഇത്രയും കാലത്തിനിടയിൽ വളർന്നു. മലയാളം, തമിഴ്, തെലുങ്ക്, ഹിന്ദി തുടങ്ങി വിവിധ ഭാഷകളിൽ തന്റെ സാന്നിധ്യം അടയാളപ്പെടുത്തി. ആദ്യ ചിത്രത്തിന്റെ ഒൻപതാം വാർഷികത്തിൽ ദുൽഖർ വളരെ വൈകാരികമായ ഒരു കുറിപ്പാണ് പങ്കുവെച്ചിരിക്കുന്നത്.

‘ഒൻപതു വർഷ മുമ്പ് ഞങ്ങളുടെ സിനിമ സെക്കൻഡ് ഷോ തിയേറ്ററുകളിൽ റിലീസ് ചെയ്തു. ഞാനുൾപ്പെടെ ധാരാളം പുതുമുഖങ്ങളുടെ അരങ്ങേറ്റം ഈ ചിത്രം അടയാളപ്പെടുത്തി. ഇന്ന് ഞാൻ ഒരു പുതിയ സിനിമ ആരംഭിക്കുന്നു. പരിഭ്രമവും ഭയങ്ങളും ഇപ്പോഴും നിലവിലുണ്ടെങ്കിലും അത് ക്രിയാത്മകമായി മാറ്റാൻ സമയം എന്നെ സഹായിച്ചു. എല്ലാവരിൽ നിന്നുമുള്ള ഈ വാർഷിക ഓർമ്മപ്പെടുത്തൽ ഞാൻ സിനിമയിൽ എങ്ങനെ ആരംഭിച്ചുവെന്നതിന്റെ ഓർമ്മകൾ സൂക്ഷിക്കാൻ സഹായിക്കുന്നു. മാത്രമല്ല, ഞാൻ എങ്ങനെ ആരംഭിച്ചുവെന്നും എവിടെ നിന്ന് വന്നുവെന്നും എപ്പോഴും എന്നെ ഓർമിപ്പിക്കുന്നു. നിങ്ങളുടെ നിരന്തരമായ പിന്തുണയ്ക്കും സ്നേഹത്തിനും, എന്റെ ഹൃദയത്തിന്റെ അടിത്തട്ടിൽ നിന്നും ഒരു വലിയ നന്ദി. എന്റെ എല്ലാ സഹപ്രവർത്തകർക്കും വിവിധ വ്യവസായങ്ങൾക്കും നന്ദി.. ഈ മാന്ത്രിക ലോകത്ത് നിങ്ങൾക്കെല്ലാവർക്കും ഒപ്പം പ്രവർത്തിക്കുന്നത് ഒരു അംഗീകാരമാണ്’ – ദുൽഖർ സൽമാന്റെ വാക്കുകൾ.

Read More: ‘നമുക്ക് വേണ്ടി ഭക്ഷണം തയ്യാറാക്കുന്നവരോട് നന്ദി പറയാം..’- വീഡിയോ പങ്കുവെച്ച് ശോഭന

കൊവിഡ് പ്രതിസന്ധി സൃഷ്ടിച്ചിരിക്കുന്നതിനാൽ ദുൽഖർ സൽമാന്റെ ഒൻപതു വർഷത്തെ സിനിമാ ജീവിതം ഡിജിറ്റലായി ആഘോഷിക്കാൻ ഒരുങ്ങുകയാണ് ആരാധകർ. അതേസമയം, റോഷൻ ആൻഡ്രൂസിന്റെ പുതിയ ചിത്രത്തിലാണ് ദുൽഖർ ഇനി വേഷമിടുന്നത്. സിനിമയിൽ പോലീസ് വേഷത്തിലാണ് താരം എത്തുന്നതെന്നാണ് സൂചന.

Story highlights- dulquer salmaan about second show