അർജുൻ അശോകനും സംയുക്തയും ഒന്നിക്കുന്നു; വൂൾഫ് വിശേഷം പങ്കുവെച്ച് മഞ്ജു വാര്യർ
അർജുൻ അശോകനെ നായകനാക്കി ഷാജി അസീസ് സംവിധാനം ചെയ്യുന്ന ചിത്രമാണ് വൂൾഫ്. അർജുൻ അശോകനൊപ്പം സംയുക്ത മേനോൻ, ഷൈന്‍ ടോം ചാക്കോ, ഇര്‍ഷാദ്, ജാഫര്‍ ഇടുക്കി എന്നിവരും ചിത്രത്തിൽ മുഖ്യ കഥാപാത്രങ്ങളെ അവതരിപ്പിക്കുന്നുണ്ട്. ഇപ്പോഴിതാ സിനിമ പ്രേമികൾക്കിടയിൽ ശ്രദ്ധ നേടുകയാണ് ചിത്രത്തിന്റെ മോഷൻ പോസ്റ്റർ. ചലച്ചിത്രതാരം മഞ്ജു വാര്യരാണ് മോഷൻ പോസ്റ്റർ പങ്കുവെച്ചത്.
ദാമർ സിനിമയുടെ ബാനറിൽ സന്തോഷ് ദാമോദരൻ നിർമിക്കുന്ന ചിത്രത്തിന്റെ രചന നിർവഹിച്ചിരിക്കുന്നത് ജി.ആര്‍. ഇന്ദുഗോപനാണ്. കൊവിഡ് മാനദണ്ഡങ്ങൾ പാലിച്ചുകൊണ്ടാണ് സിനിമയുടെ ചിത്രീകരണം പൂർത്തിയാക്കിയത്. ഷാജി അസീസ് ഒരുക്കുന്ന മൂന്നാമത്തെ ചിത്രമാണ് വൂള്‍ഫ്. ചിത്രത്തിൽ രഞ്ജിന്‍ രാജാണ് സംഗീത സംവിധായകൻ.
അർജുൻ അശോകനെ നായകനാക്കി അണിയറയിൽ ഒരുങ്ങുന്ന മറ്റൊരു ചിത്രമാണ് ‘മെമ്പർ രമേശൻ 9-ാം വാർഡ്’. ആൻറോ ജോസ് പെരിയ, എബി ട്രീസ പോൾ എന്നിവർ ചേർന്നാണ് ചിത്രം സംവിധാനം ചെയ്യുന്നത്. ടിനു പാപ്പച്ചൻ ഒരുക്കുന്ന ‘അജഗജാന്തരം’ എന്ന ചിത്രത്തിലും അർജുൻ മുഖ്യകഥാപാത്രത്തെ അവതരിപ്പിക്കുന്നുണ്ട്. ചിത്രത്തിന്റെ തിരക്കഥ ഒരുക്കുന്നത് കിച്ചു ടെല്ലസും വിനീത് വിശ്വവും ചേർന്നാണ്.
Read also:‘ഭഗവാൻ ഭഗവത്ഗീതയിൽ’…ഹൃദയംകൊണ്ടുപാടി ശ്രീഹരി; പാട്ട് വേദിയിലെ അനുഗ്രഹീത നിമിഷം, വിഡിയോ
‘പറവ’യിലെ ക്രിക്കറ്റ് ഭ്രാന്തനായ കഥാപാത്രത്തിലൂടെയാണ് അര്‍ജുന്‍ ഏറെ ശ്രദ്ധിക്കപ്പെട്ടത്. ഫഹദ് ഫാസിലിന്റെ ‘വരത്തനി’ല്‍ വില്ലന്‍ വേഷത്തിലൂടെയും അര്‍ജുന്‍ ശ്രദ്ധേയനായി. ആസിഫ് അലി നായകനായ ‘മന്ദാര’ത്തിലും പ്രധാന വേഷത്തില്‍ അര്‍ജുന്‍ എത്തിയിരുന്നു. മമ്മൂട്ടി നായകനായി എത്തിയ ‘ഉണ്ട’, രജിഷ വിജയൻ പ്രധാന കഥാപാത്രത്തെ അവതരിപ്പിച്ച ‘ജൂൺ’ എന്നീ ചിത്രങ്ങളിലും താരം മുഖ്യകഥാപാത്രങ്ങളെ അവതരിപ്പിച്ചിരുന്നു.
വെള്ളിത്തിരയിലൂടെ പ്രേക്ഷകരെ ഏറെ പൊട്ടിചിരിപ്പിച്ച ഹരിശ്രീ അശോകന്റെ മകനാണ് അർജുൻ അശോകൻ. കുറഞ്ഞ കാലയളവുകൊണ്ട് നിരവധി ആരാധകരെ നേടിയെടുത്തുകഴിഞ്ഞു അർജുൻ അശോകനും.
Story Highlights: Manju Warrier Shares woolf motion poster
