വിക്രമിനൊപ്പം സിമ്രാൻ; കാർത്തിക് സുബ്ബരാജ് ചിത്രം ഒരുങ്ങുന്നു
തെന്നിന്ത്യൻ സിനിമ മേഖലയിൽ നിരവധി ആരാധകരുള്ള താരങ്ങളാണ് ചിയാൻ വിക്രം, സിമ്രാൻ എന്നിവർ. ഇപ്പോഴിതാ ഇരുവരും ഒന്നിക്കുന്ന ഏറ്റവും പുതിയ ചിത്രം ഒരുങ്ങുന്നു. കാർത്തിക് സുബ്ബരാജ് സംവിധാനം ചെയ്യുന്ന ചിത്രത്തിലാണ് ഇരുവരും ഒന്നിക്കുന്നത്. വിക്രമിനൊപ്പം മകൻ ധ്രുവ് വിക്രവും ചിത്രത്തിൽ അഭിനയിക്കുന്നുണ്ട്. വാണി ഭോജൻ ആണ് ചിത്രത്തിൽ മറ്റൊരു നായികയായി വേഷമിടുന്നത്. വിക്രമിന്റെ അറുപതാമത്തെ ചിത്രമാണിത്.
അതേസമയം ഗൗതം മേനോന്റെ ‘ധ്രുവ നച്ചത്തിര’ത്തിന് ശേഷം സിമ്രാൻ, വിക്രം എന്നിവർ ഒന്നിക്കുന്ന സിനിമ കൂടിയാണിത്. വിക്രമിനെ നായകനാക്കി ഗൗതം മേനോൻ ഒരുക്കിയ ആക്ഷൻ ത്രില്ലർ ചിത്രമാണ് ധ്രുവ നച്ചത്തിരം. ഏഴ് രാജ്യങ്ങളിലായി ചിത്രീകരിച്ച സിനിമ ചില സാങ്കേതിക പ്രശ്‌നങ്ങൾ കാരണം റിലീസിന് കാലതാമസം നേരിടുകയായിരുന്നു. വിക്രം നായകനായി റിലീസിനെത്തുന്ന അടുത്ത ചിത്രം ധ്രുവ നച്ചത്തിരമാണ്.
ചിത്രത്തിൽ വിക്രം രഹസ്യ ഏജന്റായ ജോണിന്റെ വേഷത്തിലാണ് എത്തുന്നത്. ഒരു സ്പൈ ത്രില്ലറാണ് ‘ധ്രുവ നച്ചത്തിരം’. വിക്രം, റിതു വർമ്മ, ഐശ്വര്യ രാജേഷ്, ആർ പാർത്ഥിപൻ, വിനായകൻ, രാധിക ശരത്കുമാർ, ദിവ്യദർശിനി, മുന്ന സൈമൺ, സതീഷ് കൃഷ്ണൻ, വാമി കൃഷ്ണ, സലിം ബെയ്ഗ് എന്നിവരടങ്ങുന്ന വലിയ താരനിരയാണ് ഈ ചിത്രത്തിലുള്ളത്.
Story Highlights:simran team up with Vikram for karthik subbaraj film
