‘അപ്പലാളേ..’; നാടൻ പാട്ടിൻ തുടിപ്പുമായി ‘നായാട്ടി’ലെ മനോഹരമായ ഗാനം- വിഡിയോ
‘എട്ടുകാലെ പിമ്പിരിയാം അപ്പലാളേ..’.. നാടൻ താളത്തിൽ മധുവന്തി നാരായൺ പാടുമ്പോൾ നായാട്ടിലെ ഗാനം ആസ്വാദക ഹൃദയങ്ങളിലേക്ക് ചേക്കേറുകയാണ്. കഴിഞ്ഞ ദിവസം ലിറിക്കൽ വിഡിയോ എത്തിയപ്പോൾ മുതൽ പ്രേക്ഷകർ കാത്തിരുന്ന ആ ഗാനത്തിന്റെ മനോഹരമായ ദൃശ്യാവിഷ്‌കാരം ഇതാ, എത്തി. നാട്ടിലെ ആഘോഷവും അതിനൊപ്പമുള്ള പാട്ടും വേറിട്ടൊരു അനുഭൂതിയാണ് പകരുന്നത്. കുഞ്ചാക്കോ ബോബൻ, ജോജു ജോർജ്, നിമിഷ സജയൻ എന്നിവരെയും പാട്ടിൽ കാണാം. അന്‍വര്‍ അലിയുടെ വരികൾക്ക് വിഷ്ണു വിജയ്യാണ് മനോഹരമായ ഈണം പകർന്നിരിക്കുന്നത്. അമ്പിളിയിലൂടെ ശ്രദ്ധേയനാണ് വിജയ്.
മാർട്ടിൻ പ്രക്കാട്ട് സംവിധാനം ചെയ്യുന്ന ചിത്രമാണ് നായാട്ട്. ചിത്രത്തിൽ ഒരു പോലീസ് ഉദ്യോഗസ്ഥനായ പ്രവീൺ മൈക്കിളായാണ് കുഞ്ചാക്കോ ബോബൻ എത്തുന്നത്. നിമിഷയും ജോജുവും പോലീസ് വേഷത്തിൽ തന്നെയാണ് എത്തുന്നത്. ഛായാഗ്രഹണം ഷൈജു ഖാലിദ്, എഡിറ്റിങ് മഹേഷ് നാരായണന്‍, സംഗീതം വിഷ്ണു വിജയ്, ഗാനരചന അൻവർ അലി എന്നിവർ നിർവഹിക്കുന്നു. സംവിധായകൻ രഞ്ജിത്, ശശികുമാർ എന്നിവരുടെ ഉടമസ്ഥതയിലുള്ള ഗോൾ‍ഡ് കോയ്ൻ പിക്ച്ചേർസും മാർട്ടിൻ പ്രക്കാട്ട് ഫിലിംസും ചേർന്നാണ് നിർമ്മാണം. മാജിക്‌ ഫ്രെയിംസ് റിലീസ് ആണ് വിതരണം.
Read More: ‘ഒരു ഷൂട്ടിംഗ് ദിനം’- വാതിൽ ലൊക്കേഷനിൽ നിന്നും വ്ലോഗുമായി അനു സിതാര
അന്വേഷണാത്മക ത്രില്ലറിന്റെ വിഭാഗത്തിൽ പെടുന്ന ചിത്രത്തിന്റെ ചില ലൊക്കേഷനുകൾ പിറവം, മൂന്നാർ, കൊടൈക്കനാൽ എന്നിവയായിരുന്നു. ഏപ്രിൽ എട്ടിനാണ് ചിത്രം റിലീസ് ചെയ്യുന്നത്. ദുൽഖർ സൽമാൻ നായകനായി അഭിനയിച്ച ‘ചാർലി’ എന്ന ചിത്രത്തിന്റെ സംവിധായകനായ മാർട്ടിൻ പ്രക്കാട്ട് ഈ ചിത്രത്തിലൂടെ ആദ്യമായി ത്രില്ലർ വിഭാഗത്തിൽ ചിത്രമൊരുക്കുകയാണ്.
Story highlights- nayattu movie appalale song
