പിണറായി സർക്കാരിന് അഭിനന്ദനങ്ങൾ നേർന്ന് മമ്മൂട്ടി; ആശംസകളുമായി സിനിമാലോകം…

നിയമസഭാ തെരഞ്ഞെടുപ്പിൽ ചരിത്ര വിജയം നേടിയ പിണറായി സർക്കാരിന് അഭിനന്ദനവുമായി നിരവധിപ്പേരാണ് എത്തുന്നത്. സിനിമ താരങ്ങളും പ്രമുഖരും ഉൾപ്പടെയുള്ളവർ സമൂഹമാധ്യമങ്ങളിലൂടെയും മറ്റുമായി അഭിനന്ദനങ്ങൾ അറിയിക്കുന്നുണ്ട്. ഇപ്പോഴിതാ മുഖ്യമന്ത്രി പിണറായി വിജയനെ അഭിനന്ദിച്ചുകൊണ്ട് രംഗത്തെത്തിയിരിക്കുകയാണ് ചലച്ചിത്രതാരം മമ്മൂട്ടി. ഫേസ്ബുക്ക് പേജിലൂടെയാണ് പിണറായി വിജയന് ആശംസകൾ താരം നേർന്നിരിക്കുന്നത്.

‘നിയമസഭയിലേക്ക് തിരഞ്ഞെടുക്കപ്പെട്ട എല്ലാ സ്ഥാനാർത്ഥികൾക്കും ഭരണത്തുടർച്ചയിലേക്കു കടക്കുന്ന ബഹുമാനപ്പെട്ട മുഖ്യമന്ത്രി ശ്രീ പിണറായി വിജയനും അഭിനന്ദനങ്ങൾ’ പിണറായി വിജയനൊപ്പമുള്ള ചിത്രം പങ്കുവെച്ചുകൊണ്ട് മമ്മൂട്ടി കുറിച്ചു.

മോഹൻലാൽ, പൃഥ്വിരാജ്, ടൊവിനോ തോമസ്, ഉണ്ണി മുകുന്ദൻ, നിവിൻ പോളി, ദുൽഖർ സൽമാൻ, ഹരീഷ് പേരാടി, റിമ കല്ലിങ്കൽ തുടങ്ങി നിരവധി താരങ്ങൾ ഇടത് സർക്കാരിന് അഭിനന്ദനവുമായി നേരത്തെ എത്തിയിരുന്നു.

പ്രളയവും കോവിഡ് മഹാമാരിയുമുൾപ്പെടെ നിരവധി പ്രതിസന്ധികളെ തരണം ചെയ്ത സർക്കാരാണ് മുഖ്യമന്ത്രി പിണറായി വിജയന്റേത്. രണ്ടാം തവണയും വിജയക്കൊടി പാറിച്ച ഇടത് സർക്കാരിന് നിരവധിപ്പേരാണ് ആശംസകൾ അറിയിക്കുന്നത്.

Story Highlights:actor mammootty congratulate ldf