കാർത്തിയുടെ ‘കൈതി 2’ ഒരുങ്ങുന്നു

ദീപാവലി റിലീസായി 2019ൽ എത്തിയ ലോകേഷ് കനകരാജ് ചിത്രമാണ് ആക്ഷൻ ത്രില്ലറായ ‘കൈതി’. സിനിമയുടെ റിലീസിന് പിന്നാലെ തന്നെ രണ്ടാം ഭാഗവും ഉണ്ടാകുമെന്നു കാർത്തി വെളിപ്പെടുത്തിയെങ്കിലും ചിത്രീകരണം നീളുകയായിരുന്നു. മാസ്റ്റർ എന്ന ചിത്രത്തിന് ശേഷം കൈതി 2 ആരംഭിക്കുമെന്ന് പ്രതീക്ഷിച്ചിരുന്നെങ്കിലും പിന്നീട് ചർച്ചകൾ ഉണ്ടായില്ല.

കമൽ ഹാസൻ അഭിനയിക്കുന്ന ‘വിക്രം’ എന്ന ചിത്രത്തിലേക്കാണ് മാസ്റ്ററിന് ശേഷം ലോകേഷ് കനകരാജ് നീങ്ങിയത്. ഇപ്പോഴിതാ, കൈതിയുടെ നിർമ്മാതാവ് എസ് ആർ പ്രഭു ‘കൈതി 2’ ഉടൻ ആരംഭിക്കുമെന്ന് സ്ഥിരീകരിച്ചിരിക്കുകയാണ്. കാർത്തി, നരേൻ, അർജുൻ ദാസ് എന്നിവരാണ് കൈതിയിൽ പ്രധാന വേഷത്തിൽ അഭിനയിച്ചത്. ചിത്രത്തിൽ ഒരു തടവുകാരനായാണ് കാർത്തി അഭിനയിച്ചിരിക്കുന്നത്. പരോൾ കിട്ടി മകളെ കാണാനുള്ള അയാളുടെ യാത്രയും പിന്തുടരുന്ന ഗുണ്ടാസംഘവുമൊക്കെ ചേർന്ന് ഒരു ദിവസത്തെ കഥയാണ് ചിത്രം പറഞ്ഞത്.

2019 ഒക്ടോബർ 25 നാണ് ചിത്രം തിയേറ്ററുകളിലേക്ക് എത്തിയത് . നിരൂപകരും പ്രേക്ഷകരും ഒരുപോലെ പ്രശംസിച്ച ചിത്രവുമായിരുന്നു കൈതി. പാട്ടുകളോ നായികമാരോ ഇല്ലാതെ തമിഴ് സിനിമാലോകത്ത് ഒരു ഹിറ്റായി മാറിയ ചിത്രമാണ് കൈതി. ഈ ചിത്രം തെലുങ്കിൽ കൈഡി എന്ന പേരിലാണ് എത്തിയത്. ഡ്രീം വാരിയർ പിക്ചേഴ്സിന്റെ ബാനറിൽ പ്രകാശ്ബാബു, പ്രഭു, വിവേക് എന്നിവർ ചേർന്നാണ് ചിത്രം നിർമിച്ചത്.

സത്യൻ സൂര്യൻ ഛായാഗ്രഹണവും സാം സംഗീതവും നിർവഹിച്ചിരിക്കുന്നു. തമിഴ്നാട്ടിലെ മയക്കുമരുന്ന്, ഗുണ്ടാ മാഫിയകളും പോലീസും തമ്മിലുള്ള പോരാട്ടത്തിന്റെ കഥയാണ് ചിത്രം പറയുന്നത്. സർവൈവൽ ഗണത്തിൽപെടുന്ന ഗംഭീര റോഡ് മൂവിയാണ് കൈതി.

Story highlights- kaithi 2 announcement