വക്കീല്‍ പഠനത്തോടൊപ്പം പൊറോട്ടയടിയും: സൈബര്‍ ഇടങ്ങള്‍ കീഴടക്കിയ അനശ്വരയാണ് താരം
അനശ്വര, വെറുമൊരു പേരല്ല. അനേകര്‍ക്ക് കരുത്തും പ്രചോദനവുമേകുന്ന നക്ഷത്രമാണ്. തിളങ്ങുന്ന നക്ഷത്രം. കഴിഞ്ഞ കുറച്ചു ദിവസങ്ങളായി സമൂഹമാധ്യമങ്ങളിലാകെ അനശ്വരയെക്കുറിച്ചുള്ള വിശേഷങ്ങളായിരുന്നു നിറഞ്ഞു നിന്നത്. ചെറിയൊരു ഹോട്ടലിന്റെ അടുക്കളയില്‍ നിന്നും പൊറോട്ടയടിക്കുന്ന ആ മിടുക്കിയുടെ വിഡിയോ ചുരുങ്ങിയ സമയങ്ങള്‍ക്കുള്ളില്‍ത്തന്നെ സൈബര്‍ ഇടങ്ങള്‍ കീഴടക്കി.
അനശ്വര ഒരു നിയമവിദ്യാര്‍ത്ഥിനിയാണ്. പ്രതിസന്ധികളെ ഉള്‍ക്കരുത്തുകൊണ്ട് തോല്‍പിക്കുന്ന മിടുക്കി. എരുമേലി കാഞ്ഞിരപ്പള്ളി റോഡിലെ കുറുവാമൊഴിക്കാരിയാണ് അനശ്വര. അമ്മ സുബിക്ക് ഒരു സഹായം എന്നോണമാണ് ഹോട്ടലില്‍ പൊറോട്ടയടിക്കാന്‍ തുടങ്ങിയത്. നല്ല ഉഷാറായിത്തന്നെ ഈ മിടുക്കി പൊറോട്ടയടിക്കും. അതിലും ഉഷാറായി പഠിക്കും.
Read more: ഇത് കുഞ്ഞുമകന് വേണ്ടി ഒരു അച്ഛന്‍ തയാറാക്കിയ സൂപ്പര്‍ ലംബോര്‍ഗിനി: വിഡിയോ
അനശ്വരയുടെ അമ്മയും അമ്മയുടെ സഹോദരിയും ചേര്‍ന്ന് നടത്തുന്നതാണ് ആര്യ എന്ന ഹോട്ടല്‍. ഈ സഹോദരിമാരുടെ മറ്റ് മക്കളും ഹോട്ടലില്‍ സജീവമാണ്. പഠനത്തോടൊപ്പം ഇവരും തങ്ങളാലാവുന്ന സഹായങ്ങള്‍ ചെയ്ത് വീട്ടുകാര്‍ക്കൊപ്പം നില്‍ക്കുന്നു. ഹോട്ടലിനോട് ചേര്‍ന്നു തന്നെയാണ് ഇവരുടെ വീടും.
തൊടുപുഴ അല്‍ അസര്‍ കോളജിലെ അവസാന വര്‍ഷ നിയമവിദ്യാര്‍ത്ഥിനിയാണ് അനശ്വര. സമൂഹമാധ്യമങ്ങളിലൂടെ വൈറലായ അനശ്വരയുടെ കഥയറിഞ്ഞ് നിരവധിപ്പേരാണ് പ്രോത്സാഹനവും പിന്തുണയുമായി രംഗത്തെത്തുന്നത്. അനശ്വര ഒരു മാതൃകയാണ്. ഉള്‍ക്കരുത്തുകൊണ്ട് പ്രതിസന്ധികളെ മറികടന്ന് സ്വപ്‌നങ്ങളെ കൈയെത്തിപ്പിടിക്കാം എന്ന വലിയ സന്ദേശം പകരുന്ന മാതൃക.
Story highlights: Inspirational story of Anaswara, Porotta Making Girl and a Law student
