ആശയ്ക്ക് വളകാപ്പ് ചടങ്ങൊരുക്കി ‘ചക്കപ്പഴം’ കുടുംബം; ശ്രദ്ധേയമായി ചിത്രങ്ങൾ
മലയാള മിനിസ്ക്രീൻ പ്രേക്ഷകരുടെ ഇഷ്ടപരമ്പരയായി മാറിക്കഴിഞ്ഞു ചക്കപ്പഴം. ചക്ക കുഴഞ്ഞതുപോലൊരു കുടുംബം എന്നാണ് ടാഗ് ലൈനെങ്കിലും മധുരമേറെയാണ് ഈ ചക്കപ്പഴത്തിന്. കാരണം, സ്‌ക്രീനിലെന്ന പോലെ ജീവിതത്തിലും അടുപ്പം പുലർത്തി ഒരു കുടുംബം പോലെ തന്നെയാണ് പരമ്പരയിലെ അഭിനേതാക്കൾ. ചക്കപ്പഴത്തിലൂടെയാണ് അഭിനയ രംഗത്തേക്കും അവതാരകയായ അശ്വതി ശ്രീകാന്ത് എത്തിയത്.
ആശ എന്ന കഥാപാത്രമായി പ്രേക്ഷകരുടെ ഇഷ്ടം നേടുന്നതിനിടയിലാണ് ജീവിതത്തിലെ വളരെ സന്തോഷകരമായ ഒരു വാർത്ത അശ്വതിയെ തേടിയെത്തിയത്. രസകരവും നർമ്മം നിറഞ്ഞതുമായ നിമിഷങ്ങളിലൂടെ മുന്നേറുന്നതിനിടയിലാണ് അശ്വതി ഗർഭിണിയായതും പരമ്പരയിൽ നിന്നും ഇടവേളയെടുത്തതും. ഇടവേളയ്ക്ക് ശേഷം പാരമ്പരയിലേക്ക് മടങ്ങിയെത്തിയ അശ്വതിക്കായി വളകാപ്പ് ചടങ്ങ് ഒരുക്കിയിരിക്കുകയാണ് സഹതാരങ്ങൾ.
അശ്വതിക്ക് മാത്രമല്ല, കഥാപാത്രമായ ആശയ്ക്കും വളകാപ്പ് മേളമാണ്. കഥയിലും ആശ എന്ന അശ്വതിയുടെ കഥാപാത്രം ഗർഭിണിയായതുകൊണ്ട് അഭിനയിക്കുന്നതിനും തടസമില്ല. സഹതാരങ്ങളായ സബീറ്റ ജോർജ്, ശ്രുതി രജനികാന്ത്, റാഫി എന്നിവരെല്ലാം വളകാപ്പ് ചടങ്ങിനൊരുങ്ങിയ അശ്വതിക്ക് ഒപ്പമുള്ള ചിത്രങ്ങൾ പങ്കുവെച്ചിട്ടുണ്ട്.
ലൊക്കേഷനിൽ നിന്നുമുള്ള ചിത്രം പങ്കുവെച്ചുകൊണ്ട് ഇനി ഏതാനും എപ്പിസോഡുകളിൽ താനുമുണ്ടാകും എന്ന് അശ്വതി പങ്കുവെച്ചിരുന്നു. ‘ഒരു ചെറിയ ഇടവേളയ്ക്ക് ശേഷം ആശ വീണ്ടും സ്‌ക്രീനിലെത്തും. വരാനിരിക്കുന്ന നിർബന്ധിത ഇടവേളയ്ക്ക് മുൻപായി കുറച്ച് എപ്പിസോഡുകളിൽ കൂടി ഉണ്ടായിരിക്കുമെന്ന് പ്രതീക്ഷിക്കുന്നു’. അശ്വതിയുടെ വാക്കുകൾ.
Read More: രാക്ഷസന്റെ തെലുങ്ക് പതിപ്പായ രാക്ഷസുഡുവിന് രണ്ടാം ഭാഗം ഒരുങ്ങുന്നു
അവതാരകയായി എത്തി അഭിനേത്രിയിലേക്ക് ചുവടുവെച്ച താരമാണ് അശ്വതി ശ്രീകാന്ത്. ഫ്‌ളവേഴ്‌സ് ചാനലിൽ സംപ്രേഷണം ചെയ്യുന്ന ചക്കപ്പഴം എന്ന സിറ്റ്കോമിലൂടെ ആശ എന്ന കഥാപാത്രമായി അശ്വതി ശ്രീകാന്ത് മലയാളി മനസുകളിൽ ഇടംപിടിച്ചു. മികച്ച അവതരണ ശൈലിയിലൂടെ മലയാളി പ്രേക്ഷകരുടെ ഒന്നടങ്കം സ്നേഹം നേടിയ ആളാണ് അശ്വതി ശ്രീകാന്ത്. വളരെ രസകരമായ സംസാര ശൈലിയിലൂടെ ആളുകളെ കയ്യിലെടുക്കുന്ന അശ്വതി സമൂഹമാധ്യമങ്ങളിലും സജീവമാണ്.
Story highlights- aswathy sreekanth valakappu function photos
