ത്രില്ലറുമായി വീണ്ടും നയൻതാര; നെട്രിക്കൺ ട്രെയ്‌ലർ
നയൻതാര അന്ധകഥാപത്രമായി എത്തുന്ന ചിത്രമാണ് നെട്രിക്കൺ. വിഘ്‌നേഷ് ശിവന്റെ പ്രൊഡക്ഷനിൽ ഒരുങ്ങുന്ന ‘നെട്രികൺ’ നയൻതാരയുടെ 65-ാമത്തെ ചിത്രം കൂടിയാണ്. റിലീസിന് തയ്യാറെടുക്കുന്ന ചിത്രത്തിലെ ട്രെയ്‌ലർ എത്തി. ഒരു ക്രൈം ത്രില്ലർ ചിത്രമാണ് നെട്രിക്കൺ എന്ന സൂചനയാണ് ട്രെയ്‌ലർ നൽകുന്നത്. നയൻതാരയ്‌ക്കൊപ്പം മലയാളികളുടെ പ്രിയങ്കരനായ താരം അജ്മൽ അമീറാണ് ചിത്രത്തിൽ വേഷമിടുന്നത്. വില്ലൻ വേഷത്തിലാണ് അജ്മൽ അമീർ എത്തുന്നത്.
നയൻതാരയെ നായികയാക്കി വിഘ്‌നേഷ് ശിവൻ ഒരുക്കിയ ‘നാനും റൗഡി താൻ’ എന്ന സിനിമയുടെ അഞ്ചാം വാർഷികത്തിലായിരുന്നു ചിത്രത്തിന്റെ ഫസ്റ്റ് ലുക്ക് പോസ്റ്റർ എത്തിയത്. നെട്രിക്കൺ എന്ന പേരിൽ 1981ൽ രജനികാന്ത് നായകനായ ചിത്രം റിലീസ് ചെയ്തിരുന്നു.
Read More: വിശാലിനൊപ്പം ബാബുരാജ്; പനച്ചേല്‍ ജോമോന് ശേഷം വില്ലനായി താരം
ചിത്രത്തിനായി ഗിരീഷ് സംഗീതവും, കാർത്തിക് ഗണേഷ് ജി ഛായാഗ്രഹണവും, ലോറൻസ് കിഷോർ എഡിറ്റിംഗും നിർവഹിക്കുന്നു. മിലിന്ദ് റാവു ആണ് ചിത്രം സംവിധാനം ചെയ്യുന്നത്. അതേസമയം, ‘ലൗ ആക്ഷൻ ഡ്രാമ’യ്ക്ക് ശേഷം മലയാളത്തിൽ സജീവമാകുകയാണ് നയൻതാര. കുഞ്ചാക്കോ ബോബനൊപ്പം നിഴൽ എന്ന ചിത്രത്തിലാണ് നയൻതാര ഏറ്റവുമൊടുവിൽ വേഷമിട്ടത്. സംസ്ഥാന പുരസ്‌കാര ജേതാവായ അപ്പു ഭട്ടതിരി ആദ്യമായി സംവിധാനം ചെയ്ത ത്രില്ലർ ചിത്രമാണ് നിഴൽ. ഇനി അൽഫോൺസ് പുത്രൻ സംവിധാനം ചെയ്യുന്ന പാട്ട് എന്ന സിനിമയിലാണ് നയൻതാര വേഷമിടുന്നത്. ഫഹദ് ഫാസിലാണ് ചിത്രത്തിൽ നായകനായി എത്തുന്നത്.
Story highlights- netrikann trailer
