ജയസൂര്യയ്‌ക്കൊപ്പം മഞ്ജു വാര്യർ; മേരി ആവാസ് സുനോ ഒരുങ്ങുന്നു, ശ്രദ്ധനേടി പോസ്റ്റർ
മലയാളികളുടെ പ്രിയതാരങ്ങളായ ജയസൂര്യയും മഞ്ജു വാര്യരും ഒന്നിക്കുന്ന ചിത്രം ഒരുങ്ങുന്നു. ‘മേരി ആവാസ് സുനോ’ എന്ന് പേരിട്ടിരിക്കുന്ന ചിത്രം സംവിധാനം ചെയ്യുന്നത് പ്രജേഷ് സെൻ ആണ്. ജയസൂര്യയെ നായകനാക്കി വെള്ളം എന്ന ചിത്രം ഒരുക്കിയ സംവിധായകനാണ് പ്രജേഷ് സെൻ. വെള്ളം മുരളിയെ ഹിറ്റാക്കിയ സംവിധായകനും ജയസൂര്യയും വീണ്ടും ഒന്നിക്കുമ്പോൾ വാനോളം പ്രതീക്ഷയിലാണ് ആരാധകരും. ഇരുവരും ഒന്നിക്കുന്ന മൂന്നാമത്തെ ചിത്രമാണ് മേരി ആവാസ് സുനോ.
മഞ്ജു വാര്യർക്ക് പുറമെ ശിവദയും ചിത്രത്തിൽ അഭിനയിക്കുന്നുണ്ട്. ഒരു റേഡിയോ ജോക്കിയുടെ കഥയാണ് ചിത്രത്തിന്റെ പ്രമേയം എന്നാണ് സൂചന. അതേസമയം പ്രേക്ഷകർക്കിടയിൽ ഏറെ ശ്രദ്ധനേടുകയാണ് ചിത്രത്തിന്റെ പുതിയ പോസ്റ്റർ. മഞ്ജു വാര്യരും ജയസൂര്യയും തന്നെയാണ് പോസ്റ്ററിലെ മുഖ്യ ആകർഷണം. ഒന്നിച്ചിരുന്ന് പൊട്ടിച്ചിരിക്കുന്ന ഇരുവരേയുമാണ് പോസ്റ്ററിൽ കാണുന്നത്. ബി. രാകേഷ് ആണ് ചിത്രത്തിന്റെ നിർമ്മാണം.
Read also:ആക്രി സാധനങ്ങൾ വിൽക്കുന്ന സ്ത്രീയല്ല ഇത്; അറിയാം സിസിലിയയെ
‘വെള്ളം മുരളിയെ സൂപ്പർ ഹിറ്റാക്കിയ പ്രിയ പ്രേക്ഷകർക്ക് നന്ദി.ഒപ്പം വലിയൊരു സന്തോഷ വാർത്ത കൂടി അറിയിക്കാനുണ്ട്. എൻ്റെ പുതിയ ചിത്രം .’മേരി ആവാസ് സുനോ’. ക്യാപ്റ്റനും വെള്ളത്തിനും ശേഷം പ്രജേഷ് സെന്നിനൊപ്പമുള്ള മൂന്നാമത്തെ ചിത്രം. മഞ്ജു വാര്യർക്കൊപ്പമുള്ള ആദ്യ സിനിമ. ശിവദയാണ് മറ്റൊരു നായിക. ഒരു റേഡിയോ ജോക്കിയുടെ കഥയാണ് ചിത്രത്തിന്റെ പ്രമേയം. വളരെ സന്തോഷത്തോടെ ഇന്ന് റേഡിയോ ദിനത്തിൽ ടൈറ്റിൽ പോസ്റ്റർ ദാ.. നിങ്ങൾക്ക് മുന്നിലേക്ക്.എല്ലാവരുടെയും പിന്തുണയും സഹകരണവും ഉണ്ടാകണം. സ്നേഹത്തോടെ’- എന്നാണ് സിനിമയുടെ ആദ്യ പോസ്റ്റർ പങ്കുവെച്ചുകൊണ്ട് നേരത്തെ ജയസൂര്യ കുറിച്ചത്.
Story highlights: jayasurya- manju warrier movie mari awas suno
