എംജിആറായി അരവിന്ദ് സ്വാമി; പ്രേക്ഷകമനം കവർന്ന് ‘തലൈവി’ വിഡിയോ
തമിഴകത്തിന്റെ മുൻ മുഖ്യമന്ത്രി ജയലളിതയുടെ ജീവിതം പറയുന്ന ചിത്രമാണ് തലൈവി.. എ എൽ വിജയ് സംവിധാനം ചെയ്യുന്ന തലൈവി, ജെ ജയലളിതയുടെ സിനിമാ ജീവിതം മുതൽ രാഷ്ട്രീയ ജീവിതം വരെ പങ്കുവയ്ക്കുന്ന ചിത്രമാണ്. ചിത്രത്തിൽ ജയലളിതയായി വേഷമിടുന്നത് ബോളിവുഡ് നടി കങ്കണ റണൗത്ത് ആണ്. മുൻ തമിഴ്‌നാട് മുഖ്യമന്ത്രി എം.ജി രാമചന്ദ്രന്റെ വേഷത്തിൽ അരവിന്ദ് സ്വാമിയാണ് എത്തുന്നത്. മുൻപ്, ക്വീൻ എന്ന വെബ് സീരിസിലും എം ജി ആറായി വേഷമിട്ടത് അരവിന്ദ് സ്വാമിയായിരുന്നു. ഇപ്പോഴിതാ ഇരുവരും ഒന്നിച്ചുള്ള ഗാനരംഗത്തിന്റെ വിഡിയോയാണ് അണിയറപ്രവർത്തകർ പങ്കുവെച്ചിരിക്കുന്നത്.
‘ഉന്‍തന്‍ കണ്‍കളില്‍’ എന്നാരംഭിക്കുന്ന ഗാനരംഗമാണ് അണിയറപ്രവർത്തകർ പങ്കുവെച്ചിരിക്കുന്നത്. ഗാനത്തിന് സംഗീതം പകര്‍ന്നിരിക്കുന്നത് ജി വി പ്രകാശ് കുമാര്‍ ആണ്. എംജിആര്‍ കാലഘട്ടത്തിലെ സിനിമാഗാന ചിത്രീകരണ ശൈലിയിലാണ് ഈ ഗാനവും ഒരുക്കിയിരിക്കുന്നത്. കങ്കണയും അരവിന്ദ് സ്വാമിയും തന്നെയാണ് ഗാനത്തിലെ മുഖ്യ ആകർഷണവും. ഗാനം ആഗസ്റ്റ് 30 ന് റിലീസ് ചെയ്യും.
Read also:ഈ കാമറാമാൻ ആള് ചില്ലറക്കാരനല്ല, തത്ത പകർത്തിയ ദൃശ്യങ്ങൾ കണ്ടത് ലക്ഷക്കണക്കിന് ആളുകൾ, വിഡിയോ
ജയലളിതയുടെ പിറന്നാള്‍ ദിനമായ ഫെബ്രുവരി 24- നാണ് ചിത്രത്തെക്കുറിച്ച് പ്രഖ്യാപനമുണ്ടായത്. വിബ്രി കര്‍മ്മ മീഡിയ എന്നിവയുടെ ബാനറില്‍ വിഷ്ണു വരര്‍ധനും ശൈലേഷ് ആര്‍ സിംഗും ചേര്‍ന്നാണ് ചിത്രത്തിന്റെ നിര്‍മ്മാണം. നീരവ് ഷായാണ് ഛായാഗ്രഹണം നിര്‍വ്വഹിക്കുന്നത്. അതേസമയം ഡയറക്റ്റ് തിയേറ്റർ റിലീസായാണ് ചിത്രം പ്രേക്ഷകരിലേക്കെത്തുന്നത്. ഹിന്ദി, തമിഴ്, തെലുങ്ക് തുടങ്ങി മൂന്ന് ഭാഷകളിലാണ് ചിത്രം റിലീസിന് ഒരുങ്ങുന്നത്. കൊവിഡ് പ്രതിസന്ധി കാരണം റിലീസ് നീളുന്ന ചിത്രം സെപ്റ്റംബർ 10-നാണ് തിയേറ്ററുകളിലേക്ക് എത്തുന്നത്.
Story highlights: Unthan Kangalil Ennadiyo Teaser
