പൃഥ്വിയുടെ ശബ്ദത്തിൽ ‘ഭ്രമത്തിലെ ഗാനം; ഏറ്റെടുത്ത് പാട്ട് പ്രേമികൾ
മികച്ച കഥാപാത്രങ്ങളെ പ്രേക്ഷകർക്ക് സമ്മാനിച്ച് പ്രീതിനേടിയതാണ് പൃഥ്വിരാജ് സുകുമാരൻ. അഭിനേതാവായും സംവിധായകനായും മലയാളസിനിമാമേഖലയിൽ തിളങ്ങിനിൽക്കുന്ന താരം പാടിയ ഗാനങ്ങളും ഇതിനോടകം മലയാളികൾ ഏറ്റെടുത്തതാണ്. ഇപ്പോഴിതാ പൃഥ്വിരാജ് മുഖ്യകഥാപാത്രമാകുന്ന ഭ്രമത്തിന് വേണ്ടി താരം പാടിയ ഗാനമാണ് സംഗീതപ്രേമികൾ ഏറ്റെടുത്തിരിക്കുന്നത്.
‘ലോകം- ഹൂ വാണ്ട്സ് ഇറ്റ്’ എന്ന് തുടങ്ങുന്ന ഗാനമാണ് പൃഥ്വിരാജ് ആലപിച്ചിരിക്കുന്നത്. ജോ പോളിന്റെ വരികൾക്ക് ജേക്സ് ബിജോയ് ആണ് സംഗീതം പകർന്നിരിക്കുന്നത്. ഗാനത്തിന്റെ ലിറിക്കൽ വിഡിയോയാണ് ഇപ്പോൾ പാട്ട് പ്രേമികൾക്കിടയിൽ ശ്രദ്ധ നേടുന്നത്. ഫാസ്റ്റ് നമ്പറായി ഒരുക്കിയിരിക്കുന്ന ഗാനത്തിലെ ചില രംഗങ്ങളും കാഴ്ചക്കാരിൽ ആവേശം പകരുന്നുണ്ട്.
Read also;മോഹൻലാലിനൊപ്പമുള്ള ഫോട്ടോയെക്കാൾ കൂടുതൽ മലയാളിക്ക് എന്താണ് വേണ്ടത്? ഉത്തരം സൈജു കുറുപ്പ് പറയും
ആയുഷ്മാന്‍ ഖുറാന പ്രധാന കഥാപാത്രമായെത്തിയ ബോളിവുഡ് ചിത്രം അന്ധാദുന്നിന്റെ റീമേക്ക് ആണ് പൃഥ്വിരാജ് നായകനായെത്തുന്ന ഭ്രമം. രവി കെ ചന്ദ്രന്‍ ആണ് ചിത്രത്തിന്റെ സംവിധാനം നിര്‍വഹിക്കുന്നത്. എ പി ഇന്റര്‍നാഷ്ണലിന്റെ ബാനറിലാണ് ചിത്രത്തിന്റെ നിര്‍മാണം. പൃഥ്വിരാജ് സുകുമാരനോടൊപ്പം ഉണ്ണി മുകുന്ദനും ചിത്രത്തില്‍ പ്രധാന കഥാപാത്രമായെത്തുന്നുണ്ട്. മംമ്താ മോഹന്‍ദാസ്, ശങ്കര്‍, ജഗദീഷ്, സുധീര്‍ കരമന, റാഷി ഖന്ന, സുരഭി ലക്ഷ്മി, അനന്യ തുടങ്ങി നിരവധി താരങ്ങളും ചിത്രത്തിൽ അണിനിരക്കുന്നുണ്ട്.
ഇന്ത്യയില്‍ ഒക്ടോബര്‍ 7 ന് ആമസോണ്‍ പ്രൈമിലൂടെ ചിത്രം പ്രേക്ഷകരിലേക്കും. ഇന്ത്യയ്ക്ക് പുറത്ത് ചില രാജ്യങ്ങളിൽ തിയേറ്റർ റിലീസായും ചിത്രം എത്തും.
Story highlights; Lokam – who wants it Bhramam song by Prithviraj
