സൗഹൃദം പങ്കിടുന്ന താരപുത്രന്മാർ; ചിത്രത്തിലെ താരങ്ങളെത്തിരഞ്ഞ് സോഷ്യൽ മീഡിയ

ചലച്ചിത്രതാരങ്ങളുടെ സിനിമ വിശേഷങ്ങൾക്കപ്പുറം അവരുടെ കുടുംബവിശേഷങ്ങളും സമൂഹമാധ്യമങ്ങളിൽ ശ്രദ്ധനേടാറുണ്ട്. താരങ്ങളുടെ കുട്ടിക്കാല ചിത്രങ്ങൾക്കും കൗതുകം നിറഞ്ഞ വിശേഷങ്ങൾക്കുമൊക്കെ സോഷ്യൽ ഇടങ്ങളിൽ കാഴ്ചക്കാരും നിരവധിയാണ്. ഇപ്പോഴിതാ മലയാള സിനിമയിലെ യുവതാരങ്ങളായ ദുൽഖർ സൽമാന്റെയും പ്രണവ് മോഹൻലാലിന്റെയും ചെറുപ്പകാല ചിത്രമാണ് സമൂഹമാധ്യമങ്ങളുടെ ശ്രദ്ധ കവരുന്നത്. പ്രണവിനോട് കുശലം പറയുന്ന ദുൽഖറിനെയാണ് ദൃശ്യങ്ങളിൽ കാണുന്നത്.

മലയാള സിനിമയിലെ സൂപ്പർസ്റ്റാറുകളാണ് മമ്മൂട്ടിയും മോഹൻലാലും. അഭിനയത്തിനപ്പുറം കുടുംബങ്ങൾ തമ്മിലും വലിയ രീതിയിൽ സൗഹൃദവും അടുപ്പവും കാത്തുസൂക്ഷിക്കുന്നവരാണ് ഇരുവരും. ഇപ്പോഴിതാ മാതാപിതാക്കളെപ്പോലെത്തന്നെ താരപുത്രന്മാർ തമ്മിലും ചെറുപ്പം മുതലേ വലിയ രീതിയിൽ സൗഹൃദം കാത്തുസൂക്ഷിക്കുന്നവരാണെന്ന് പറയുകയാണ് ഈ കുട്ടിക്കാല ചിത്രം.

Read also: വെള്ളച്ചാട്ടത്തിന് നടുവിലായി കത്തിനിൽക്കുന്ന തീനാളം; നിഗൂഢമായ വിശ്വാസങ്ങളുമായി ഒരിടം

അതേസമയം കുറുപ്പാണ് ദുൽഖർ സൽമാന്റേതായി അവസാനം വെള്ളിത്തിരയിൽ എത്തിയ ചിത്രം. തിയേറ്ററുകളിൽ മികച്ച പ്രേക്ഷക സ്വീകാര്യത നേടിക്കൊണ്ടിരിക്കുകയാണ് കുറുപ്പ്. പിടികിട്ടാപ്പുള്ളി സുകുമാരക്കുറുപ്പിന്റെ ജീവിതം പറയുന്ന ചിത്രത്തിൽ കുറുപ്പായാണ് ദുൽഖർ വേഷമിട്ടത്. വിനീത് ശ്രീനിവാസൻ സംവിധാനം ചെയ്യുന്ന ഹൃദയമാണ് പ്രണവിന്റേതായി അണിയറയിൽ റിലീസിനൊരുങ്ങുന്ന ചിത്രം. പ്രണവ് മോഹൻലാൽ, കല്യാണി പ്രിയദർശൻ, ദർശന രാജേന്ദ്രൻ എന്നിവരെ കേന്ദ്ര കഥാപാത്രങ്ങളാക്കി ഒരുക്കുന്ന ചിത്രം 2022 ജനുവരിയിലാണ് പ്രേക്ഷകരിലേക്കെത്തുന്നത്.

Story highlights: Childhood photos of star kids