വേറിട്ട ലുക്കിൽ ചടുലമായ ചുവടുകളുമായി അല്ലു അർജുൻ- ‘പുഷ്പ’യിലെ പുതിയ ഗാനമെത്തി
മലയാളികൾ നെഞ്ചോട് ചേർത്ത നടനാണ് അല്ലു അർജുൻ. അതുകൊണ്ടുതന്നെ അല്ലു അർജുൻ നായകനായ പുഷ്പ റിലീസിന് ഒരുങ്ങുമ്പോൾ ആവേശത്തിലാണ് ആരാധകർ. ഡിസംബർ 17നാണ് കേരളമടക്കമുള്ള തിയേറ്ററുകളിലൂടെ ചിത്രം പ്രേക്ഷകരിലേക്ക് എത്തുന്നത്. റിലീസിന് മുന്നോടിയായി സിനിമയിലെ ഗാനങ്ങളെല്ലാം പ്രേക്ഷകരിലേക്ക് എത്തുകയാണ്. ഇതുവരെ പുറത്തുവന്ന നാല് ഗാനങ്ങൾക്കും മികച്ച സ്വീകാര്യതയാണ് ലഭിച്ചത്. ഇപ്പോഴിതാ, അഞ്ചാമത്തെ ഗാനവും പ്രേക്ഷകരിലേക്ക് എത്തിയിരിക്കുകയാണ്. ചന്ദ്രബോസിന്റെ വരികൾക്ക് ദേവി ശ്രീ പ്രസാദ് ഈണം പകർന്നിരിക്കുന്നു. നകാഷ് ആണ് ഗാനം ആലപിച്ചിരിക്കുന്നത്.
രണ്ടുഭാഗമായി പുറത്തിറങ്ങുന്ന ചിത്രത്തിൽ മലയാളത്തിന്റെ പ്രിയനടൻ ഫഹദ് ഫാസിലാണ് പ്രതിനായക വേഷം കൈകാര്യം ചെയ്യുന്നത്. കേരളത്തിൽ ഇ ഫോര്‍ എന്റര്‍ടൈന്‍മെന്റ് ആണ് ചിത്രം തിയേറ്ററുകളിൽ എത്തിക്കുന്നത്. പുഷ്പരാജ് എന്ന കഥാപാത്രത്തെ ആണ് ചിത്രത്തില്‍ അല്ലു അര്‍ജുന്‍ അവതരിപ്പിക്കുന്നത്. കള്ളക്കടത്തുകാരനായ പുഷ്പരാജ് ആയാണ് ചിത്രത്തില്‍ അല്ലു അര്‍ജുന്‍ എത്തുന്നത്. സുകുമാര്‍ ആണ് ചിത്രത്തിന്റെ സംവിധാനം നിര്‍വഹിക്കുന്നത്. ആര്യ, ആര്യ 2 എന്നീ ചിത്രങ്ങള്‍ക്ക് ശേഷം അല്ലുവും സുകുമാറും ഒരുമിക്കുന്ന ചിത്രമെന്ന പ്രത്യേകതയും പുഷ്പയ്ക്കുണ്ട്.
Read More: ‘വഴി ഇപ്പൊ ശരിയാക്കിത്തരാം’ ഭീമന്റെ വഴി വിശേഷങ്ങളുമായി കുഞ്ചാക്കോ ബോബൻ
തെലുങ്കിന് പുറമെ, തമിഴ്, ഹിന്ദി, കന്നഡ, മലയാളം എന്നീ ഭാഷകളിലും ചിത്രം പ്രേക്ഷകരിലേക്കെത്തും. രശ്മിക മന്ദാന, ധനഞ്ജയ്, സുനില്‍, അജയ് ഘോഷ് എന്നിവരാണ് ചിത്രത്തില്‍ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മുറ്റംസെട്ടി മീഡിയയുമായി ചേര്‍ന്ന് മൈത്രി മൂവി മേക്കേഴ്‌സ് ആണ് ചിത്രത്തിന്റെ നിര്‍മാണം. ഓസ്‌കര്‍ പുരസ്‌ക്കാര ജേതാവ് റസൂല്‍ പൂക്കുട്ടിയാണ് ചിത്രത്തിന്റെ ശബ്ദമിശ്രണം.
Story highlights- Eyy Bidda lyrical song from pushpa
