ഒരു രാത്രികൂടി വിടവാങ്ങവേ… ഓർത്തെടുക്കാം ഹൃദയതാളങ്ങൾ കവർന്ന ഗിരീഷ് പുത്തഞ്ചേരിയുടെ ചില ഗാനങ്ങൾ…
മലയാളത്തിന് ഒരുപിടി നല്ല ഗാനങ്ങൾ സമ്മാനിച്ച ഗിരീഷ് പുത്തഞ്ചേരി ഓർമ്മയായിട്ട് ഇന്നേക്ക് 12 വർഷങ്ങൾ. കാലാന്തരങ്ങൾക്കപ്പുറം ഹൃദയതാളങ്ങൾ കീഴടക്കുന്ന അദ്ദേഹത്തിന്റെ ചില ഗാനങ്ങൾ ഇതാ…
നിലാവിന്റെ നീലഭസ്മ കുറിയണിഞ്ഞവളെ…
മോഹൻലാൽ- രേവതി താരങ്ങൾ ഒന്നിച്ചെത്തി മികച്ച പ്രണയകഥ പറഞ്ഞ അഗ്നിദേവൻ എന്ന ചിത്രത്തിലെ ഗാനമാണ് നിലാവിന്റെ നീലഭസ്മ കുറിയണിഞ്ഞവളെ… എം ജി ശ്രീകുമാറിന്റെ ശബ്ദത്തിലൂടെ പാട്ട് പ്രേമികൾ ഹൃദയത്തിലേറ്റിയ ഈ ഗാനത്തിന്റെ വരികൾ തയാറാക്കിയിരിക്കുന്നത് ഗിരീഷ് പുത്തഞ്ചേരിയാണ്.
കൈക്കുടന്ന നിറയെ…
ഗിരീഷ് പുത്തഞ്ചേരികളുടെ വരികളാല്‍ മനോഹരമായ മറ്റൊരു ഗാനമാണ് ഇത്. മായാമയൂരം എന്ന ചിത്രത്തിലെ ഈ ഗാനം ആലപിച്ചിരിയ്ക്കുന്നത് കെ ജെ യേശുദാസും എസ് ജാനകിയും ചേര്‍ന്നാണ്. രഘുകുമാര്‍ പാട്ടിന് സംഗീതം പകര്‍ന്നിരിയ്ക്കുന്നു. മോഹന്‍ലാല്‍, തിലകന്‍, രേവതി, ശോഭന തുടങ്ങിയവര്‍ പ്രധാന കഥാപാത്രമായെത്തിയ മായമയൂരം സിബി മലയില്‍ സംവിധാനം നിര്‍വഹിച്ച ചിത്രമാണ്.
സൂര്യകിരീടം വീണുടഞ്ഞു….
മോഹന്‍ലാല്‍ നായകനായെത്തിയ ദേവാസുരം എന്ന ചിത്രത്തിലേതാണ് ഈ പാട്ട്. എം ജി രാധാകൃഷ്ണന്‍ സംഗീതം പകര്‍ന്ന ഗാനം എം ജി ശ്രീകുമാറാണ് ആലപിച്ചത്. 1993-ലാണ് ചിത്രം പ്രേക്ഷകരിലേക്കെത്തിയത്. രഞ്ജിത് തിരക്കഥയെഴുതിയ ചിത്രത്തിന്റെ സംവിധാനം നിര്‍വഹിച്ചത് ഐവി ശശിയാണ്.
പിന്നെയും പിന്നെയും ആരോ….
1997-ല്‍ പ്രേക്ഷകരിലേയ്ക്കെത്തിയ കൃഷ്ണഗുഡിയില്‍ ഒരു പ്രണയകാലത്ത് എന്ന ചിത്രത്തിലേതാണ് ഈ ഗാനം കെ ജെ യേശുദാസ് ആലപിച്ച ഈ ഗാനത്തിന് സംഗീതം പകര്‍ന്നത് വിദ്യാസാഗര്‍ ആണ്. മഞ്ജു വാര്യര്‍, ജയറാം, ബിജു മേനോന്‍ എന്നിവര്‍ പ്രധാന കഥാപാത്രങ്ങളായെത്തിയ കൃഷ്ണഗുഡിയില്‍ ഒരു പ്രണയകാലത്ത് എന്ന ചിത്രത്തിന്റെ സംവിധാനം നിര്‍വഹിച്ചത് കമലാണ്.
ഒരു രാത്രികൂടി വിടവാങ്ങവേ..
സമ്മര്‍ ഇന്‍ ബെത്‌ലഹേം എന്ന ചിത്രത്തിലേതാണ് ഈ ഗാനം. കെ ജെ യേശുദാസും കെ എസ് ചിത്രയും ചേര്‍ന്നാണ് സിനിമയില്‍ ഈ ഗാനം ആലപിച്ചിരിയ്ക്കുന്നത്. വിദ്യാ സാഗര്‍ സംഗീതം പകര്‍ന്നു. സുരേഷ് ഗോപി, ജയറാം മഞ്ജു വാര്യര്‍ തുടങ്ങിയവര്‍ പ്രധാന കഥാപാത്രങ്ങളായെത്തിയ ചിത്രം 1998-ലാണ് പ്രേക്ഷകരിലേയ്ക്കെത്തിയത്. സിബി മലയിലാണ് ചിത്രത്തിന്റെ സംവിധായകന്‍.
നീയുറങ്ങിയോ നിലാവേ…
1996-ല്‍ പ്രേക്ഷകരിലേക്കെത്തിയ ഹിറ്റ്ലര്‍ എന്ന ചിത്രത്തിലേതാണ് ഈ ഗാനം. എസ് പി വെങ്കടേഷ് സംഗീതം പകര്‍ന്ന ഗാനം സിനിമയില്‍ ആലപിച്ചിരിയ്ക്കുന്നത് കെ ജെ യേശുദാസാണ്. സിദ്ദിഖ് രചനയും സംവിധാനവും നിര്‍വഹിച്ച ഹിറ്റ്ലര്‍ എന്ന ചിത്രത്തില്‍ മമ്മൂട്ടി, മുകേഷ്, ശോഭന, ജഗദീഷ്, വാണിവിശ്വനാഥ് തുടങ്ങിയവര്‍ കേന്ദ്ര കഥാപാത്രങ്ങളായെത്തി.
Story highlights: Evergreen hits of Gireesh Puthenchery
