‘കല്യാണമാണേ..’- ആഘോഷമേളവുമായി ‘അർച്ചന 31 നോട്ട്ഔട്ട്’ സിനിമയിലെ ഗാനം
മാർട്ടിൻ പ്രക്കാട്ട് പ്രൊഡക്ഷൻസിന്റെ ബാനറിൽ ഐശ്വര്യ ലക്ഷ്മിയെ കേന്ദ്രകഥാപാത്രമാക്കി നവാഗതനായ അഖിൽ അനിൽകുമാർ സംവിധാനം ചെയ്ത ചിത്രമാണ് അർച്ചന 31 നോട്ട്ഔട്ട്. ഫെബ്രുവരി പതിനൊന്നിനാണ് ചിത്രം പ്രേക്ഷകരിലേക്ക് എത്തിയത്. ഒരു സമ്പൂർണ്ണ ഫാമിലി എന്റർടൈനർ ആയി എത്തിയ ചിത്രത്തിലെ കല്യാണപ്പെണ്ണേ എന്ന വിഡിയോ ഗാനം പ്രേക്ഷകരിലേക്ക് എത്തി.
രജത് പ്രകാശ്, പാർവതി ജയദേവൻ, ലാൽ കൃഷ്ണ, ശ്വേത ശങ്കർ എന്നിവർ ചേർന്നാണ് ഗാനം ആലപിച്ചിരിക്കുന്നത്. ധന്യ സുരേഷ് മേനോൻ ആണ് വരികൾ രചിച്ചിരിക്കുന്നത്. രജത് പ്രകാശ് തന്നെയാണ് ഈണം പകർന്നിരിക്കുന്നത്.അർച്ചന എന്ന കഥാപാത്രത്തിന് ഒരു കല്യാണ ആലോചന വരുന്നതിനു ശേഷം അവളുടെ ജീവിതത്തിൽ ഉണ്ടാകുന്ന മാറ്റങ്ങളുമാണ് ചിത്രം പറയുന്നത്. സിനിമയുടെ പേരിനും കഥയ്ക്കും വളരെയധികം ബന്ധമുണ്ട്.
മാർട്ടിൻ പ്രക്കാട്ട്, സിബി ചവറ, രഞ്ജിത്ത് നായർ എന്നിവർ ചേർന്നാണ് ചിത്രം നിർമ്മിക്കുന്നത്. ചിത്രത്തിൽ അധ്യാപികയുടെ വേഷത്തിലാണ് ഐശ്വര്യ എത്തുന്നത്. ഐശ്വര്യയ്ക്ക് പുറമെ ഇന്ദ്രൻസ്, രമേശ് പിഷാരടി എന്നിവരും ചിത്രത്തിൽ അഭിനയിക്കുന്നുണ്ട്.
‘ഞണ്ടുകളുടെ നാട്ടിൽ ഒരിടവേള’ എന്ന ചിത്രത്തിലൂടെ വെള്ളിത്തിരയിൽ അരങ്ങേറ്റം കുറിച്ച് ‘മായാനദി’ എന്ന ചിത്രത്തിലൂടെ മലയാളി പ്രേക്ഷകരുടെ ഹൃദയത്തിൽ ഇടം നേടിയ ഐശ്വര്യ ഇന്ന് വെള്ളിത്തിരയിൽ തിരക്കുള്ള താരമായി മാറിക്കഴിഞ്ഞു. കൈനിറയെ ചിത്രങ്ങളുമായി സജീവമാകുകയാണ് നടി ഐശ്വര്യ ലക്ഷ്മി. മലയാളത്തിലും തമിഴിലുമെല്ലാം നടി സജീവമാണ്.
Story highlights- Kalyanamaane Video Song from Archana 31 Not Out
