‘തീ മിന്നൽ തിളങ്ങി..’; മിന്നൽ മുരളിയുടെ മിന്നലാട്ടവുമായി ഗാനം പ്രേക്ഷകരിലേക്ക്
മലയാള സിനിമയിലെ ആദ്യ സൂപ്പർ ഹീറോ ചിത്രമാണ് മിന്നൽ മുരളി. ടൊവിനോ തോമസിനെ നായകനാക്കി ബേസിൽ ജോസഫ് സംവിധാനം ചെയ്ത ചിത്രം നെറ്റ്ഫ്ലിക്സിൽ ക്രിസ്മസ് റിലീസായാണ് എത്തിയത്. ബാംഗ്ലൂർ ഡേയ്സ്, മുന്തിരിവള്ളികൾ തളിർക്കുമ്പോൾ, പടയോട്ടം എന്നീ ചിത്രങ്ങൾക്ക് ശേഷം വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോളാണ് ചിത്രം നിർമ്മിച്ചിരിക്കുന്നത്. ഗോദ എന്ന ചിത്രത്തിന് ശേഷം ബേസിൽ ജോസഫ്- ടൊവിനോ തോമസ് കൂട്ടുകെട്ട് ഒന്നിക്കുന്ന ചിത്രം കൂടിയായിരുന്നു മിന്നൽ മുരളി.
ഇപ്പോഴിതാ, ചിത്രത്തിലെ ഏറെ കാത്തിരുന്ന ഗാനം പ്രേക്ഷകരിലേക്ക് എത്തിയിരിക്കുകയാണ്. തീ മിന്നൽ തിളങ്ങി എന്ന് തുടങ്ങുന്ന ഗാനമാണ് ഇത്. മിന്നലേറ്റ് ജെയ്‌സൺ സൂപ്പർ പവറുകൾ തിരിച്ചറിയുന്ന ഗാനമാണ് ഇത്. മനു മഞ്ജിത്തിന്റെ വരികൾക്ക് സുഷിൻ ശ്യാം ഈണം പകർന്നിരിക്കുന്നു.മർത്യൻ, സുഷിൻ ശ്യാം എന്നിവർ ചേർന്നാണ് ഗാനം ആലപിച്ചിരിക്കുന്നത്.
അരുൺ അനിരുദ്ധൻ, ജസ്റ്റിൻ മാത്യു എന്നിവരാണ് ചിത്രത്തിൻ്റെ രചന നിർവഹിക്കുന്നത്. സമീർ താഹിറാണ് ക്യാമറ. ചിത്രത്തിലെ ഗാനങ്ങൾക്ക് സംഗീതം പകരുന്നത് ഷാൻ റഹ്‌മാനാണ്. ടൊവിനോയ്ക്കും ഗുരു സോമസുന്ദരത്തിനും പുറമെ അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് എന്നിവരാണ് ചിത്രത്തിലെ മറ്റ് അഭിനേതാക്കൾ.
Read Also: 60- ആം വയസിൽ മോഡലായി മമ്മിക്ക, ഇത് ജീവിതം മാറ്റിമറിച്ച മേക്കോവറിന്റെ കഥ
നായകനും, വില്ലനും സിനിമയിലെ സ്ഥലപ്പേരുകൾ പോലും ചർച്ചയായി മാറുന്ന സിനിമ മികച്ച അഭിപ്രായമാണ് നേടുന്നത്. ആഗോളതലത്തിൽ വൻതോതിൽ ലാഭം കൊയ്യുന്ന ബ്ലോക്ക്ബസ്റ്ററുകൾ കേരളത്തിൽ പിറന്നുതുടങ്ങി എന്ന സൂചനയാണ് മിന്നൽ മുരളിയിലൂടെ ലോക സിനിമയ്ക്ക് ബേസിൽ ജോസഫ് നൽകിയത്.
Story highlights- minnal murali thee minnal song
