നിറഞ്ഞാടി അദിതി റാവുവും കാജൽ അഗർവാളും, ‘ഹേ സിനാമിക’യിലെ പുതിയ ഗാനവും ഹിറ്റ്
അതിമനോഹരമായ നൃത്തച്ചുവടുകൾക്കൊണ്ടും ദൃശ്യഭംഗികൊണ്ടും ആസ്വാദകമനം നിറയ്ക്കുകയാണ് ‘ഹേ സിനാമിക’ എന്ന ചിത്രത്തിലെ ഏറ്റവും പുതിയ ഗാനം. നാളെ മുതൽ പ്രേക്ഷകരിലേക്കെത്താൻ ഒരുങ്ങുന്ന ചിത്രത്തിലെ പുതിയ ഗാനമാണ് കാഴ്ചക്കാരുടെ മുഴുവൻ ഹൃദയതാളങ്ങൾ കീഴടക്കുന്നത്. മനോഹരമായ ചുവടുകളുമായി മത്സരിച്ച് ഡാൻസ് ചെയ്യുന്ന അദിതി റാവു ഹൈദരിയേയും കാജൽ അഗർവാളിനെയുമാണ് ദൃശ്യങ്ങളിൽ കാണുന്നത്. ഇന്ത്യയിലെ തന്നെ ഏറ്റവും പ്രഗത്ഭയായ കൊറിയോഗ്രാഫർ ബ്രിന്ദ മാസ്റ്റർ സംവിധാനം ചെയ്യുന്ന ഹേ സിനാമിക സംഗീതത്തിനും നൃത്തത്തിനുമൊക്കെ പ്രാധാന്യം നൽകികൊണ്ടായിരിക്കും ഒരുങ്ങുക എന്ന പ്രതീക്ഷയിലാണ് സിനിമ ലോകം. അതിനിടെയിൽ ഏറെ ശ്രദ്ധിക്കപ്പെട്ടുകഴിഞ്ഞു കഴിഞ്ഞ ദിവസം പുറത്തുവന്ന ചിത്രത്തിലെ ഗാനവും.
ഗോവിന്ദ് വസന്തയുടെ സംഗീതത്തിൽ ഒരുങ്ങിയ ഗാനം ഇതിനോടകം നിരവധി കാഴ്ചക്കാരെയും നേടിക്കഴിഞ്ഞു. ചിത്രത്തിലേതായി നേരത്തെ പുറത്തുവന്ന ഗോവിന്ദ് വസന്തയുടെ സംഗീതത്തിൽ ഒരുക്കിയ അച്ചമില്ലൈ എന്ന ഗാനവും ഏറെ ശ്രദ്ധിക്കപ്പെട്ടിരുന്നു. ദുൽഖർ സൽമാനെ നായകനാക്കി ബ്രിന്ദ മാസ്റ്റർ സംവിധാനം ചെയ്യുന്ന ചിത്രമാണ് ഹേ സിനാമിക. ചിത്രത്തിൽ ദുൽഖറിനൊപ്പം കാജൽ അഗർവാളും, അദിതി റാവു ഹൈദരിയും നായികമാരായി എത്തുന്ന സിനിമ കുടുംബബന്ധത്തിനും സൗഹൃദത്തിനും പ്രാധാന്യം നൽകിക്കൊണ്ടാണ് ഒരുങ്ങുന്നത്. ഇത് സൂചിപ്പിക്കുന്നതാണ് ചിത്രത്തിന്റെ നേരത്തെ പുറത്തിറങ്ങിയ ട്രെയ്‌ലറും. സിനിമയ്ക്ക് തിരക്കഥ ഒരുക്കിയിരിക്കുന്നത് മധൻ കർക്കിയാണ്. റിലയൻസ് എന്റർടൈന്മെന്റ്സ് നിർമ്മിക്കുന്ന ചിത്രത്തിന്റെ ഛായാഗ്രഹണം പ്രീത ജയരാമൻ ആണ്.
തെന്നിന്ത്യയിൽ നിരവധി ഹിറ്റ് ചിത്രങ്ങൾക്ക് കൊറിയോഗ്രാഫറായി പ്രവർത്തിച്ചതാണ് ബ്രിന്ദ മാസ്റ്റർ. കാക്ക കാക്ക, വാരണം ആയിരം, കടൽ, പികെ,തെരി എന്നീ സൂപ്പർഹിറ്റ് ചിത്രങ്ങൾക്കൊപ്പം മലയാളത്തിൽ ബിഗ് ബ്രദർ, ആദ്യരാത്രി, അതിരൻ, മധുരരാജ തുടങ്ങിയ നിരവധി ചിത്രങ്ങൾക്ക് കൊറിയോഗ്രാഫി ഒരുക്കിയതും ബൃന്ദയാണ്.
Story highlights: Dulquer Salman Hey Sinamika Dance video song
