മിന്നൽ മുരളിയുടെ ആവേശം ഇരട്ടിയാക്കിയ സംഗീതം; ഹിറ്റ് ട്രൈബൽ ഗാനം പ്രേക്ഷകരിലേക്ക്
ഏറെ കാത്തിരിപ്പിനൊടുവിൽ 2021 അവസാനം പ്രേക്ഷകരിലേക്ക് എത്തിയ ചിത്രമാണ് മിന്നൽ മുരളി. ടൊവിനോ തോമസ് നായകനായ ചിത്രം മലയാളത്തിലെ ആദ്യ സൂപ്പർ ഹീറോ ചിത്രമെന്ന വിശേഷണവുമായാണ് എത്തിയത്. ചിത്രത്തിനൊപ്പം ഹിറ്റായത് അതിലെ ഓരോ ഗാനങ്ങളുമായിരുന്നു. എന്നാൽ മിന്നൽ മുരളി എന്ന ചിത്രത്തിന്റെ ആവേശം പ്രേക്ഷകരിലേക്ക് എത്തിച്ചത് ട്രൈബൽ ഗാനമായിരുന്നു. മിന്നൽ മുരളിക്ക് ഭീഷണിയായി മറ്റൊരു അപരൻ കുറുക്കൻമൂലയിൽ പതിയിരിപ്പുണ്ടെന്ന് ജെയ്‌സൺ തിരിച്ചറിഞ്ഞ നിമിഷത്തിൽ തിയേറ്ററിൽ ഉയർന്ന ആ ട്രൈബൽ ഗാനം ഇൻസ്റ്റാഗ്രാം റീലുകളിലൂടെ ശ്രദ്ധനേടി.
ഇപ്പോഴിതാ, ഗാനത്തിന്റെ വിഡിയോ രംഗം പ്രേക്ഷകരിലേക്ക് എത്തിയിരിക്കുകയാണ്. സുഷിൻ ശ്യാമിന്റെ മാന്ത്രിക സ്പര്ശമാണ് ഈ ഗാനത്തെ ഇത്രയേറെ ജനപ്രിയമാക്കിയത് എന്നുപറയാം. അതേസമയം, ടൊവിനോ തോമസിനെ നായകനാക്കി ബേസിൽ ജോസഫ് സംവിധാനം ചെയ്ത ചിത്രമാണിത് . ബാംഗ്ലൂർ ഡേയ്സ്, മുന്തിരിവള്ളികൾ തളിർക്കുമ്പോൾ, പടയോട്ടം എന്നീ ചിത്രങ്ങൾക്ക് ശേഷം വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോളാണ് ചിത്രം നിർമ്മിച്ചിക്കുന്നത്. ഗോദ എന്ന ചിത്രത്തിന് ശേഷം ബേസിൽ ജോസഫ്- ടൊവിനോ തോമസ് കൂട്ടുകെട്ട് ഒന്നിച്ച ചിത്രം കൂടിയാണ് മിന്നൽ മുരളി.
Read Also: ‘നറുമുഖയെ നറുമുഖയെ നീയൊരു നാഴിക നില്ലൈ..’- ലാസ്യഭാവങ്ങളിൽ ചുവടുവെച്ച് അപർണ ബാലമുരളി
അരുൺ അനിരുദ്ധൻ, ജസ്റ്റിൻ മാത്യു എന്നിവരാണ് ചിത്രത്തിൻ്റെ രചന നിർവഹിക്കുന്നത്. സമീർ താഹിറാണ് ക്യാമറ. ചിത്രത്തിലെ ഗാനങ്ങൾക്ക് സംഗീതം പകരുന്നത് ഷാൻ റഹ്‌മാനാണ്. ടൊവിനോയ്ക്കും ഗുരു സോമസുന്ദരത്തിനും പുറമെ അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് എന്നിവരാണ് ചിത്രത്തിലെ മറ്റ് അഭിനേതാക്കൾ.
Story highlights- Tribal Song Video from Minnal Murali
