അറബിക് കുത്ത് സോങ്ങിന് ശേഷം ബീസ്റ്റിലെ പുതിയ ഗാനമെത്തി, ആലാപനത്തിലും അതിശയിപ്പിച്ച് വിജയ്
കഴിഞ്ഞ കുറച്ച് ദിവസങ്ങൾക്ക് മുൻപാണ് തമിഴകത്തിന്റെ പ്രിയതാരം വിജയ് നായകനായ ബീസ്റ്റ് എന്ന ചിത്രത്തിലെ അറബിക് കുത്തു സോങ് റിലീസ് ചെയ്തത്. പുറത്തിറങ്ങി മണിക്കൂറുകൾക്കുള്ളിൽ ആസ്വാദകമനം കവർന്ന ഗാനത്തിന് ചുവടുകളുമായി പ്രമുഖതാരങ്ങൾ ഉൾപ്പെടെയുള്ളവർ എത്തിയിരിക്കുന്നു. തെന്നിന്ത്യയില്‍ ഏറ്റവും വേഗത്തില്‍ 100 മില്യണ്‍ കാഴ്ച്ചക്കാർ ലഭിക്കുന്ന ഗാനം എന്ന റെക്കോര്‍ഡും ഈ ഗാനം നേടിയിരുന്നു. തെന്നിന്ത്യയിൽ തരംഗമായ റൗഡി ബേബിയ്ക്ക് ശേഷം തമിഴകത്തിന്റെ ഹൃദയം കവർന്ന മറ്റൊരു ഗാനമാണിത്. ഇപ്പോഴിതാ ചിത്രത്തിലെ മറ്റൊരു ഗാനം പുറത്തുവിട്ടിരിക്കുകയാണ് അണിയറപ്രവർത്തകർ. അനിരുദ്ധിന്റെ സംഗീതത്തിൽ വിജയ് പാടിയ ഗാനത്തിന്റെ ലിറിക് വീഡിയോയാണ് പുറത്തിറക്കിയിരിക്കുന്നത്. കാർത്തിക് ആണ് ഗാനം എഴുതിയിരിക്കുന്നത്. റിലീസ് ചെയ്ത് നിമിഷങ്ങൾക്കുള്ളിൽ തന്നെ മികച്ച പ്രതികരണമാണ് പാട്ടിന് ലഭിച്ചു കൊണ്ടിരിക്കുന്നത്.
വിജയ് നായകനായ ‘ബീസ്റ്റ്’ എന്ന ചിത്രത്തിൽ വിജയ്‌യുടെ നായികയായി എത്തുന്നത് പൂജ ഹെഗ്ഡെയാണ്. ഡോക്ടറിന് ശേഷം നെൽസൺ ദിലീപ്കുമാർ സംവിധാനം ചെയ്യുന്ന ചിത്രമാണ് ബീസ്റ്റ്. സണ്‍ പിക്ചേഴ്സ് ആണ് നിര്‍മാണം. അതേസമയം തിയേറ്റർ റിലീസായാണ് ചിത്രം എത്തുക. വിജയ്-യുടെ കരിയറിലെ 65-ാമത്തെ ചിത്രം എന്ന പ്രത്യേകതയും ബീസ്റ്റിനുണ്ട്. മലയാളി താരങ്ങളായ ഷൈൻ ടോം ചാക്കോയും അപർണ ദാസും ചിത്രത്തില്‍ എത്തുന്നുണ്ട്. സംവിധായകൻ ശെല്‍വരാഘവനും ചിത്രത്തില്‍ അഭിനയിക്കുന്നുണ്ട്.
ബീസ്റ്റ് എന്ന ചിത്രത്തിന്റെ റിലീസിന് മുൻപ് തന്നെ മറ്റൊരു ചിത്രവും വിജയ് പ്രഖ്യാപിച്ചിരുന്നു. ശ്രീ വെങ്കിടേശ്വര ക്രിയേഷൻസ് നിർമ്മിക്കുന്ന തന്റെ അടുത്ത ചിത്രത്തിൽ വംശി പൈഡിപ്പള്ളിയ്‌ക്കൊപ്പം പ്രവർത്തിക്കാനുള്ള ഒരുക്കത്തിലാണ് വിജയ്. തമിഴകത്ത് മാത്രമല്ല തെന്നിന്ത്യ ഒട്ടാകെ ആരാധകരെ നേടിയെടുത്ത താരത്തിന്റെ ചിത്രങ്ങൾക്കായി കാത്തിരിക്കാറുണ്ട് ആരാധകർ.
Story highlights: Vijay movie beast song out
