ടി10 ക്രിക്കറ്റ് ലീഗ്: രണ്ടാം പതിപ്പിന് നവംബറില്‍ തുടക്കം
10 ഓവര്‍ ക്രിക്കറ്റ് ലീഗായ ടി10 ക്രിക്കറ്റ് ലീഗിന്റെ രണ്ടാം പതിപ്പിന് നവംബര്‍ 23 മുതല്‍ തുടക്കമാകും. ലോകത്തിലെതന്നെ ആദ്യത്തെ 10 ഓവര്‍ ക്രിക്കറ്റ് ലീഗാണ് ടി10. ഐസിസിയുടെയും എമിറേറ്റ്‌സ് ക്രിക്കറ്റ് ബോര്‍ഡിന്റെയും അംഗീകാരവും ഈ ലീഗിന് ലഭിച്ചിട്ടുണ്ട്.
ഷാര്‍ജ ക്രിക്കറ്റ് സ്‌റ്റേഡിയമാണ് മത്സരങ്ങളുടെ വേദി. പത്ത് ദിവസം നീണ്ടുനില്‍ക്കുന്ന മത്സരം ഡിസംബര്‍ രണ്ടിന് അവസാനിക്കും. എട്ട് ടീമുകളാണ് ടി10 ക്രിക്കറ്റ് ലീഗില്‍ പോരാട്ടത്തിനിറങ്ങുക. കേരള കിങ്‌സ്, പഞ്ചാബ് ലെജന്‍ഡ്‌സ്, മറാത്ത അറേബ്യന്‍സ്, ബംഗാള്‍ ടൈഗേഴ്‌സ്, ദ കറാച്ചിയിന്‍സ്, രജ്പുത്സ്, നോര്‍ത്തേണ്‍ വാരിയേഴ്‌സ്, പാക്ക്ത്തൂണ്‍സ് എന്നിവയാണ് പോരാട്ടത്തിനിറങ്ങുന്ന ടീമുകള്‍.
2017-ലായിരുന്നു ടി10 ക്രിക്കറ്റ് ലീഗിന്റെ ആദ്യ പതിപ്പ്. നാല് ദിവസങ്ങളുടെ ദൈര്‍ഘ്യം മാത്രമായിരുന്നു ആദ്യ ലീഗിനുണ്ടായിരുന്നത്. ഷാഹിദ് അഫ്രിദി, സേവാഗ്, മക്കല്ലം, ഷെയ്ന്‍ വാട്‌സണ്‍, റഷീദ് ഖാന്‍, ഷുഐബ് മാലിക് തുടങ്ങിയ താരങ്ങളെല്ലാം ടൂര്‍ണമെന്റില്‍ അണിനിരക്കുന്നുണ്ട്.
