യൂട്യൂബ് ട്രെന്‍ഡിങ്ങില്‍ ഒന്നാമതെത്തി ‘ഫ്രഞ്ച് വിപ്ലവം’ ട്രെയ്‌ലർ..

മലയാളികളുടെ പ്രിയപ്പെട്ട നായകൻ സണ്ണി വെയ്ൻ നായകനായി എത്തുന്ന ഫ്രഞ്ച് വിപ്ലവം എന്ന ചിത്രത്തിന്റെ ട്രെയ്‌ലർ ഇന്നലെ ദുൽഖർ സൽമാൻ പുറത്തുവിട്ടിരുന്നു. പ്രേക്ഷകരെ പൊട്ടിച്ചിരിപ്പിക്കാൻ നിറയെ തമാശകളുമായി എത്തിയ ചിത്രത്തിന്റെ ട്രെയ്‌ലർ ഇപ്പോൾ യൂട്യൂബ് ട്രെൻഡിങ്ങിൽ ഒന്നാമതെത്തിയിരിക്കുകയാണ്.

നവാഗത സംവിധായകന്‍ മജു ഒരുക്കുന്ന ചിത്രത്തിൽ ഒരു ഗ്രാമത്തിലുള്ള റിസോര്‍ട്ടിലെ പാചകക്കാരനായാണ് സണ്ണി വെയ്ൻ എത്തുന്നത്. സത്യനെന്നാണ് ചിത്രത്തിൽ സണ്ണി അവതരിപ്പിക്കുന്ന കഥാപാത്രത്തിന്റെ പേര്. തികച്ചും ഹാസ്യത്തിന് പ്രാധാന്യം നൽകുന്ന ചിത്രമാണ് ഫ്രഞ്ച് വിപ്ലവം.

‘ഈ മ യൗ’ എന്ന ലിജോ ജോസ് പെലിശ്ശേരിയുടെ ചിത്രത്തിലൂടെ മലയാള സിനിമയിൽ അരങ്ങേറ്റം കുറിച്ച ആര്യയാണ് ഈ സിനിമയിലും സാനി വെയിന്റെ നായികയായെത്തുന്നത്. മീര എന്ന കഥാപാത്രത്തെയാണ് ആര്യ അവതരിപ്പിക്കുന്നത്. ലാല്‍ , ചെമ്പന്‍ വിനോദ്, കലിംഗ ശശി, വിഷ്ണു, ഉണ്ണി മായ, കൃഷ്ണ തുടങ്ങിയവരാണ് ചിത്രത്തിലെ മറ്റു പ്രധാന കഥാപാത്രങ്ങൾ.

1966 കാലഘട്ടത്തിലെ കഥയാണ് ചിത്രത്തിന്റെ മുഖ്യപ്രമേയം. ആ കാലഘട്ടത്തിലെ രാഷ്ട്രീയ സംഭവങ്ങളും അത് അവിടുത്തെ ഗ്രാമത്തിലെ സാധാരണ ജനങ്ങളിൽ ഉണ്ടാക്കുന്ന മാറ്റങ്ങളുമാണ് ചിത്രത്തിന്റെ പ്രമേയമായി അവതരിപ്പിക്കുന്നത്.

ചിത്രത്തിന്റേതായി പുറത്തിറങ്ങിയ ഗാനങ്ങൾക്കും പോസ്റ്ററുകൾക്കും മികച്ച പ്രതികരണമാണ് പ്രേക്ഷകർക്കിടയിൽ നിന്നും ലഭിക്കുന്നത്. കാണികളെ പൊട്ടിച്ചിരിപ്പിക്കുകയും ചിന്തിപ്പിക്കുകയും ചെയ്യുന്ന ഫ്രഞ്ച് വിപ്ലവത്തിന്റെ പുതിയ ട്രെയ്‌ലർ കാണാം..