ആകാംഷയും പേടിയും നിറച്ച് ‘ഇസാക്കിന്റെ ഇതിഹാസം’
മലയാളി പ്രേക്ഷകർക്കിടയിൽ ഒരേസമയം ആകാംഷയും ഒപ്പം ചിരിയും നിറച്ച് ഇസാക്കിന്റെ ഇതിഹാസം ഒരുങ്ങുന്നു… ആർ കെ അജയ കുമാർ സംവിധാനം ചെയ്യുന്ന ഏറ്റവും പുതിയ ചിത്രത്തിന്റെ വിശേഷങ്ങളാണ് ഇപ്പോൾ സമൂഹ മാധ്യമങ്ങളിൽ സജീവമാകുന്നത്. ‘ഇസാക്കിന്റെ ഇതിഹാസം’ എന്ന് പേരിട്ടിരിക്കുന്ന ചിത്രത്തിന്റെ പേര് പോലെ തന്നെ ചിത്രം ഒരു ക്രിസ്ത്യൻ പാശ്ചാത്തലത്തിൽ ഒരുക്കിയിരിക്കുന്നതാണെന്ന് സൂചിപ്പിക്കും വിധമാണ് ചിത്രത്തിന്റെ മോഷൻ പോസ്റ്റർ തയാറാക്കിയിരിക്കുന്നതും..
ഒരു ക്രിസ്ത്യൻ പള്ളിയും ക്രൂശിൽ കിടക്കുന്ന യേശു ക്രിസ്തുവിന്റെ രൂപവും ഒപ്പം കത്തിച്ചുവെച്ച മെഴുകുതിരിയും മങ്ങിയ വെളിച്ചത്തിൽ പ്രത്യക്ഷപ്പെടുന്ന ഒരു ആൾരൂപവും ഒക്കെയായി ആരാധകരെ പേടിയുടെ മുൾമുനയിൽ നിർത്തുന്ന ചിത്രത്തിന്റെ മോഷൻ പോസ്റ്റർ പുറത്തുവിട്ടിരിക്കുകയാണ് ചിത്രത്തിന്റെ അണിയറ പ്രവർത്തകർ.. സംഗീത സംവിധായകൻ ഗോപി സുന്ദറിന്റെ ഫേസ്ബുക്ക് പേജിലൂടെ പങ്കുവെയ്ക്കപ്പെട്ട പുതിയ ചിത്രത്തിന്റെ മോഷൻ പോസ്റ്റർ സൂചിപ്പിക്കുന്നത് ചിത്രം ഒരു ഹൊറർ ചിത്രമാണെന്നാണെങ്കിലും ചിത്രം പൂർണമായും ഒരു കോമഡി എന്റെർറ്റൈനെർ ആണെന്നാണ് സംവിധായൻ ആർ കെ അജയ കുമാർ നേരത്തെ സൂചിപ്പിച്ചത്.
ഭഗത് മാനുവൽ പ്രധാന കഥാപാത്രത്തെ അവതരിപ്പിക്കുന്ന ചിത്രത്തിൽ സിദ്ധിഖ്, അശോകൻ, ഗീത വിജയൻ പോളി വിൽസൻ എന്നിവരും എത്തുന്നുണ്ട്. ഉമാമഹേശ്വര ക്രിയേഷൻസിന്റെ ബാനറിൽ അയ്യപ്പൻ ആർ നിർമിക്കുന്ന ചിത്രത്തിന്റെ തിരക്കഥ ഒരുക്കിയിരിക്കുന്നത് ആർ കെ അജയ കുമാറും സുഭാഷ് കുട്ടിക്കലും ചേർന്നാണ്. ഇസാക്കിന്റെ ഇതിഹാസം എന്ന ചിത്രത്തിന്റെ സംഗീതം സംവിധാനം ചെയ്തിരിക്കുന്നത് ഗോപി സുന്ദറാണ്.
Read also: സ്റ്റൈൽ മന്നൻ രജനികാന്തിനൊപ്പം ലേഡീ സൂപ്പർസ്റ്റാർ; ദർബാറിന്റെ ഫസ്റ്റ് ലുക്ക് കാണാം..
അതേസമയം ചിത്രത്തെക്കുറിച്ചുള്ള കൂടുതൽ വിവരങ്ങളൊന്നും അണിയറ പ്രവർത്തകർ പുറത്തുവിട്ടിട്ടില്ല. എന്നാൽ ഏറെ ആകാംഷയും സസ്‍പെൻസും നിറച്ചുകൊണ്ടുള്ള ചിത്രത്തിന്റെ മോഷൻ പോസ്റ്റർ ആരാധകർക്കിടയിൽ ഒരുക്കിയ കൗതുകം ചിത്രത്തിലും ഉണ്ടാകുമെന്നുള്ള പ്രതീക്ഷയിലാണ് സിനിമാപ്രേമികൾ.
