പ്രണയവും വിരഹവും പറഞ്ഞ് ‘കബീര്‍ സിങി’ലെ പുതിയ ഗാനം; ഒരുദിവസംകൊണ്ട് 70 ലക്ഷത്തിലധികം കാഴ്ചക്കാര്‍
പ്രണയവും വിരഹവുമല്ലൊം ഒരു പാട്ടില്‍ നിറച്ചിരിക്കുകയാണ്. ഷാഹിദ് കപൂര്‍ കേന്ദ്ര കഥാപാത്രമായെത്തുന്ന ‘കബീര്‍ സിങ്’ എന്ന ചിത്രത്തിലെ ഗാനമാണ് ഇത്തരത്തില്‍ വിത്യസ്തമായൊരു പ്രണയഭാവം പ്രേക്ഷകര്‍ക്ക് സമ്മാനിക്കുന്നത്. പ്രണയത്തിന്‍റെയും വിരഹത്തിന്‍റെയും തീവ്രത ആഴത്തില്‍ പ്രതിഫലിപ്പിക്കാന്‍ ഈ ഗാനത്തിന് സാധിച്ചിട്ടുണ്ട്. ചിത്രത്തിലെ ‘ബെഖയാലി…’ എന്നു തുടങ്ങുന്ന ഗാനമാണ് പുറത്തെത്തിയിരിക്കുന്നത്. മികച്ച പ്രതികരണമാണ് ഗാനത്തിന് ലഭിക്കുന്നതും. യുട്യൂബില്‍ റിലീസ് ചെയ്ത ഗാനം എഴുപത് ലക്ഷത്തിലധികം ആളുകള്‍ കണ്ടുകഴിഞ്ഞു. സചേദ് ടെണ്ടനാണ് ഈ മനോഹര ഗാനത്തിന്റെ ആലാപനം. ഇര്‍ഷാദ് കമാലിന്റേതാണ് വരികള്‍.
‘അര്‍ജുന്‍ റെഡ്ഡി’യുടെ ഹിന്ദി പതിപ്പാണ് ‘കബീര്‍ സിങ്’. ഏറെ പ്രേക്ഷക ശ്രദ്ധ നേടിയ ചിത്രമാണ് വിജയ് ദേവരക്കൊണ്ട നായകനായെത്തിയ തെലുങ്ക് ചിത്രം ‘അര്‍ജുന്‍ റെഡ്ഡി’. 2017ല്‍ പുറത്തിറങ്ങിയ ചിത്രത്തിന്റെ ബോളിവുഡ് റീമേക്ക് വരുന്നു എന്ന വാര്‍ത്തയും ആരാധകര്‍ ഏറെ ആവേശത്തോടെയാണ് സ്വീകരിച്ചത്. വിജയ് ദേവരക്കൊണ്ടയെ പ്രേക്ഷകഹൃദയങ്ങള്‍ ഇരുകൈയും നീട്ടി സ്വീകരിച്ചതും ‘അര്‍ജുന്‍ റെഡ്ഡി’ എന്ന ചിത്രത്തിലൂടെയാണ്.
Read more:വിനായകന്‍, ജോജു, ദിലീഷ് പോത്തന്‍, കുഞ്ചാക്കോ ബോബന്‍; ‘പട’യൊരുങ്ങുന്നു
2019 ജൂണ്‍ 21 ന് കബീര്‍ സിങ് എന്ന ചിത്രം തീയറ്ററുകളിലെത്തുമെന്നാണ് പ്രഖ്യാപനം. കിയാര അദ്വാനിയാണ് ചിത്രത്തില്‍ നായികയായി എത്തുന്നത്. നേരത്തെ പുറത്തിറങ്ങിയ ചിത്രത്തിന്റെ പോസ്റ്ററുകള്‍ക്കും മികച്ച പ്രേക്ഷക സ്വീകാര്യത ലഭിച്ചിരുന്നു.
സന്ദീപ് വാങ്കയായിരുന്നു ‘അര്‍ജുന്‍ റെഡ്ഡി’യുടെ സംവിധാനം നിര്‍വ്വഹിച്ചത്. ‘കബീര്‍ സിങ്’ എന്ന ഹിന്ദി പതിപ്പിലും സന്ദീപ് വാങ്ക തന്നെയാണ് സംവിധാനം നിര്‍വ്വഹിക്കുന്നത്. 2018 ഒക്ടോബര്‍ 21 ന് ‘കബീര്‍ സിങി’ന്റെ ചിത്രീകരണം ആരംഭിച്ചു. ഡല്‍ഹിയിലും മുംബൈയിലൂമാണ് കൂടുതല്‍ ഭാഗങ്ങളുടെയും ചിത്രീകരണം.
