അഭിമന്യുവിന്റെ കഥയുമായി ‘നാന്‍ പെറ്റ മകന്‍’; ജൂണ്‍ 21 ന് തീയറ്ററുകളിലേക്ക്
എറണാകുളം മഹാരാജാസ് കോളേജില്‍ കുത്തേറ്റു മരിച്ച അഭിമന്യു എന്ന എസ്എഫ്‌ഐ നേതാവിന്റെ ജീവിതം പ്രമേയമാക്കി ഒരുങ്ങുന്ന പുതിയ ചിത്രമാണ് ‘നാന്‍ പെറ്റ മകന്‍’. ചിത്രത്തിന്റെ റിലീസ് തീയതി പ്രഖ്യാപിച്ചു. നാന്‍ പെറ്റ മകന്‍ ജൂണ്‍ 21 ന് തീയറ്ററുകലിലെത്തും. സജി പാലമേലാണ് സിനിമയുടെ സംവിധാനം. ചിത്രത്തിന്റെ രചനയും ഇദ്ദേഹം തന്നെയാണ് നിര്‍വ്വഹിക്കുന്നത്.
അതേസമയം ചിത്രത്തിലെ പുതിയ ഒരു ഗാനവും കഴിഞ്ഞ ദിവസം പുറത്തിറങ്ങിയിരുന്നു. ‘മുറിവേറ്റു വീഴുന്നു…’ എന്നു തുടങ്ങുന്ന ഗാനത്തിന്റെ ലിറിക്കല്‍ വീഡിയോയാണ് അണിയറ പ്രവര്‍ത്തകര്‍ പുറത്തുവിട്ടിരിക്കുന്നത്. അഭ്യുമന്യുവിന്റെ തീരാനഷ്ടത്തിന്റെ ഓര്‍മ്മപ്പെടുത്തലാണ് ഈ ഗാനം. മുരുകന്‍ കാട്ടാക്കടയുടേതാണ് ഈ ഗാനത്തിലെ വരികള്‍. പുഷ്പവതിയാണ് ആലാപനം. ബിജിബാല്‍ സംഗീതം പകര്‍ന്നിരിക്കുന്നു.
Read more:വര്‍ഷങ്ങള്‍ക്ക് ശേഷം രമ്യ നമ്പീശന്‍ മലയാള സിനിമയിലേക്ക്; പോസ്റ്റര്‍
ആസ്വാദകന്റെയുള്ളില്‍ വേര്‍പാടിന്റെ നോവുണര്‍ത്തുന്നുണ്ട് ഈ ഗാനം. മനോഹരമായ ഒരു കവിത പോലായാണ് ഗാനത്തിന്റെ സംഗീതം. അതേസമയം മഹാരാജാസ് കോളേജിലെ അഭിമന്യുവിന്റെ ജീവിതം വീണ്ടും ഓര്‍മ്മപ്പെടുത്തുകയാണ് ഈ ഗാനം എന്നും പലരും അഭിപ്രായപ്പെടുന്നു.
ബാലതാരമായി ചലച്ചിത്ര രംഗത്തെത്തിയ മിനോണ്‍ ജോണ്‍ ആണ് വെള്ളിത്തിരയില്‍ അഭിമന്യു എന്ന കഥാപാത്രമായി വേഷമിടുന്നത്. ഗാനരംഗത്തെ മിനോണിന്റെ അഭിനയത്തെ പുകഴ്ത്തുന്നവരും നിരവധിയാണ്. 2012 ല്‍ മികച്ച ബാലതാരത്തിനുള്ള ദേശീയ പുരസ്‌കാരവും മിനോണ്‍ നേടിയിട്ടുണ്ട്.
ശ്രീനിവാസനും ഇന്ദ്രന്‍സും ചിത്രത്തില്‍ പ്രധാന കഥാപാത്രങ്ങളായെത്തുന്നുണ്ട്. സീമ ജി നായരാണ് ‘നാന്‍ പെറ്റ മകന്‍’ എന്ന ചിത്രത്തില്‍ അഭിമന്യുവിന്റെ അമ്മയായി വേഷമിടുന്നത്. റെഡ് സ്റ്റാര്‍ മൂവീസിന്റെ ബാനറിലാണ് ചിത്രത്തിന്റെ നിര്‍മ്മാണം. മഹാരാജാസ് കോളേജിലും അഭിമന്യൂവിന്റെ നാടായ വട്ടവടയിലുമാണ് സിനിമയുടെ കൂടുതല്‍ ഭാഗങ്ങളുടെയും ചിത്രീകരണം.
