കൗതുകം നിറച്ച് ഒരു റോബോട്ട്; ശ്രദ്ധനേടി ‘ആൻഡ്രോയ്ഡ് കുഞ്ഞപ്പൻ ‘ ടീസര്‍
സൗബിൻ ചിത്രങ്ങളെ ഏറെ ആവേശത്തോടെയാണ് ആരാധകർ കാത്തിരിക്കാറ്… മലയാള സിനിമയ്ക്ക് പകരം വയ്ക്കാനില്ലാത്ത സൗബിൻ നായകനായി എത്തുന്ന ഏറ്റവും പുതിയ ചിത്രമാണ് ‘ആൻഡ്രോയ്ഡ് കുഞ്ഞപ്പൻ വേർഷൻ 5. 25’. ചിത്രത്തിന്റെ ഫസ്റ്റ് ലുക്ക് പുറത്തുവന്നപ്പോൾ മുതൽ ഏറെ കൗതുകം ഒളിപ്പിച്ച ചിത്രത്തിന്റെ ട്രെയ്‌ലർ പുറത്തുവിട്ടിരിക്കുകയാണ് അണിയറ പ്രവർത്തകർ.
സഹ സംവിധായകനായി ചലച്ചിത്ര രംഗത്തേക്ക് ചുവടുവെച്ച താരം മലയാളി പ്രേക്ഷകരുടെ ഇഷ്ട താരങ്ങളിൽ ഒരാളാണ്. അമ്പിളി എന്ന ചിത്രത്തിന് ശേഷം താരം നായകനായി എത്തുന്ന പുതിയ ചിത്രമാണ് ആൻഡ്രോയ്ഡ് കുഞ്ഞപ്പൻ.
നവാഗത സംവിധായകനായ രതീഷ് ബാലകൃഷ്ണ പൊതുവാൾ സംവിധാനം ചെയ്യുന്ന ചിത്രം മൂൺഷോർട്ട് എന്റർടൈൻമെൻറ്സിന്റെ ബാനറിൽ സന്തോഷ് ടി കുരുവിളയാണ് നിർമ്മിക്കുന്നത്.
‘സുഡാനി ഫ്രം നൈജീരിയ’യാണ് നായകനായി സൗബിൻ വേഷമിട്ട ആദ്യ ചിത്രം. ഈ ചിത്രത്തിലെ അഭിനയത്തിനാണ് മികച്ച നടനുള്ള സംസ്ഥാന പുരസ്‌കാരം താരത്തെത്തേടിയെത്തിയത്. സൗബിൻ തന്നെ തിരക്കഥയെഴുതി സംവിധാനം ചെയ്ത ‘പറവ’ എന്ന ചിത്രവും സിനിമ ലോകത്തിന് പുതിയൊരു സംവിധായകനെ വാഗ്ദാനം ചെയ്യുന്നതായിരുന്നു.
Read also: പുഞ്ചിരിച്ചും പൊട്ടിച്ചിരിച്ചും മമ്മൂട്ടി; സോഷ്യല്‍മീഡിയയില്‍ കൈയടി നേടി ഒരു ചിരിവീഡിയോ
അടുത്തിടെ സൗബിൻ പ്രധാന കഥാപാത്രമായി എത്തിയ ‘കുമ്പളങ്ങി നൈറ്റ്സ്’ എന്ന ചിത്രത്തിലെ താരത്തിന്റെ അഭിനയവും, അമ്പിളി എന്ന ചിത്രത്തിലെ അഭിനയവും ഏറെ പ്രശംസ പിടിച്ചുപറ്റിയിരിന്നു. അങ്ങനെ മലയാളത്തിന്റെ മച്ചാനായി മാറിയ സൗബിന്റെതായി പുറത്തിറങ്ങിയ ഏറ്റവും പുതിയ ചിത്രം വികൃതിയാണ്. സൗബിനും സുരാജും പ്രധാന കഥാപാത്രങ്ങളെ അവതരിപ്പിച്ച ചിത്രവും മികച്ച പ്രേക്ഷക സ്വീകാര്യത നേടിക്കൊണ്ടിരിക്കുകയാണ്. ഇപ്പോഴിതാ വെള്ളിത്തിരയിൽ നിരവധി ചിത്രങ്ങളും അദ്ദേഹത്തിന്റേതായി ഒരുങ്ങികൊണ്ടിരിക്കുകയാണ്.
