‘ഉയിരുള്ളവരാം സകലോര്‍ക്കും…’; ശ്രദ്ധനേടി വലിയ പെരുന്നാളിലെ പുതിയ ഗാനം
കുറഞ്ഞ കാലയളവുകൊണ്ട് പ്രേക്ഷക സ്വീകാര്യത നേടിയ നടനാണ് ഷെയ്ന്‍ നിഗം. താരത്തിന്റെ അഭിനയം എക്കാലത്തും വെള്ളിത്തിരയില്‍ ശ്രദ്ധ ആകര്‍ഷിക്കുന്നു. ഷെയ്ന്‍ നിഗം കേന്ദ്ര കഥാപാത്രമായെത്തുന്ന പുതിയ ചിത്രമാണ് ‘വലിയ പെരുന്നാള്‍’. ചലച്ചിത്ര ആസ്വാദകര്‍ക്കിടയില്‍ ശ്രദ്ധ നേടുകയാണ് ചിത്രത്തിലെ പുതിയ ഗാനം. ചിത്രത്തിലെ ‘ഉയിരുള്ളവരാം സകലോര്‍ക്കും…’ എന്നു തുടങ്ങുന്ന ഗാനത്തിന്റെ ലിറിക്കല്‍ വീഡിയോയാണ് പുറത്തെത്തിയിരിക്കുന്നത്. ബെന്നി ദയാലാണ് ഗാനം ആലപിച്ചിരിക്കുന്നത്. റെക്‌സ് വിജയന്‍ സംഗീതം പകര്‍ന്നിരിക്കുന്നു.
അതേസമയം കഴിഞ്ഞ ദിവസമാണ് ചിത്രത്തിന്റെ ട്രെയ്‌ലര്‍ പുറത്തിറങ്ങിയത്. മികച്ച സ്വീകാര്യതയാണ് ചിത്രത്തിന്റെ ട്രെയ്‌ലറിന് ലഭിച്ചതും. ആക്ഷനും സസ്‌പെന്‍സും പ്രണയവും നിറച്ചാണ് ചിത്രത്തിന്റെ ട്രെയ്‌ലര്‍ ഒരുക്കിയിരിക്കുന്നത്. ‘ലഹരി ഉപയോഗിക്കുന്ന ഒരുത്തനും എനിക്കൊപ്പം ഒരു പണിക്കും ഇറങ്ങരുതെന്ന് ആദ്യമേ പറഞ്ഞിട്ടില്ലേ…’ എന്ന ഷെയന്‍ നിഗത്തിന്റെ ഡയലോഗോടുകൂടിയാണ് ട്രെയ്‌ലര്‍ ആരംഭിക്കുന്നത്. മലയാളികളുടെ പ്രിയതാരം വിനായകനും ട്രെയ്‌ലറില്‍ ശബ്ദം നല്‍കിയിട്ടുണ്ട്.
Read more: അത്ഭുതപ്പെടുത്തി ലിറ്റില്‍ സൂപ്പര്‍ ഹീറോ മാസ്റ്റര്‍ അച്യുതന്‍: വീഡിയോ
നവാഗതനായ ഡിമല്‍ ഡെന്നിസ് ആണ് ചിത്രത്തിന്റെ സംവിധാനം നിര്‍വഹിക്കുന്നത്. ചിത്രത്തിന് തിരക്കഥ ഒരിക്കിയിരിക്കുന്നത് ഡിമല്‍ ഡെന്നിസും തസ്രിഖ് അബ്ദുള്‍ സലാമും ചേര്‍ന്നാണ്. ഷെയ്ന്‍ നിഗത്തിനു പുറമെ, വിനായകന്‍, അതുല്‍ കുല്‍ക്കര്‍ണി, സൗബിന്‍ ഷാഹിര്‍, ജോജു ജോര്‍ജ്, അലന്‍സിയര്‍ തുടങ്ങി നിരവധി താരങ്ങള്‍ ചിത്രത്തില്‍ അണിനിരക്കുന്നുണ്ട്. ഹിമിക ബോസാണ് ചിത്രത്തില്‍ ഷെയ്ന്‍ നിഗത്തിന്റെ നായികാ കഥാപാത്രമായെത്തുന്നത്.
അന്‍വര്‍ റഷീദ്, ഷുഹൈബ്, മോനിഷ രാജീവ് എന്നിവര്‍ ചേര്‍ന്നാണ് ചിത്രത്തിന്റെ നിര്‍മാണം നിര്‍വ്വഹിക്കുന്നത്. റെക്‌സ് വിജയന്‍ ആണ് ചിത്രത്തിന്റെ സംഗീത സംവിധായകന്‍. ‘ഫെസ്റ്റിവല്‍ ഓഫ് സാക്രിഫൈസ്’ എന്ന ടാഗ്‌ലൈനോടുകൂടിയാണ് ചിത്രം പുറത്തിറങ്ങുന്നത്. ചിത്രത്തിന്റേതായി നേരത്തെ പുറത്തിറങ്ങിയ മറ്റ് ഗാനങ്ങള്‍ക്കും മികച്ച പ്രേക്ഷക സ്വീകാര്യതയാണ് ലഭിക്കുന്നത്.
