സിനിമയ്ക്കുള്ളിലെ ഒരു പുതിയ സൂപ്പർ ഹീറോ; ‘റിവോൾവർ റിങ്കോ’ റിവ്യു
വിഷ്ണു ഉണ്ണികൃഷ്ണനെ നായകനാക്കി കിരൺ നാരായണൻ തിരക്കഥയൊരുക്കി സംവിധാനം ചെയ്ത ചിത്രമാണ് ‘റിവോൾവർ റിങ്കോ’. സിനിമയ്ക്കുള്ളിലെ സിനിമ എന്ന വ്യത്യസ്ത ആശയമാണ് ചിത്രം അവതരിപ്പിക്കുന്നത്. മിന്നൽ മുരളി സിനിമ കണ്ട് മൂന്ന് കുട്ടികൾ, അവരുടെ സുഹൃത്തിന്റെ ഒരു പ്രശ്നത്തിന് പരിഹാരം കണ്ടെത്താൻ മിന്നൽ മുരളിയെ പോലെ ഒരു സിനിമ നിർമ്മിക്കണമെന്ന ആശയം പങ്കുവയ്ക്കുന്നു.എന്നാൽ അതിന് ആവശ്യമായ വഴികളോ സഹായങ്ങളോ അവർക്കറിയില്ല. അപ്പോഴാണ് സിനിമയെന്ന സ്വപ്നവുമായി നടക്കുന്ന യുവാവായ പ്രിയേഷ് അവരുടെ ജീവിതത്തിലേക്ക് എത്തുന്നത്. മ്യൂസിക് ആൽബങ്ങൾ പോലുള്ള ചെറിയ പ്രവൃത്തികളിൽ മാത്രം പരിചയമുള്ള പ്രിയേഷ്, ആ വലിയ ദൗത്യം ഏറ്റെടുക്കുകയും തുടർന്ന് നടക്കുന്ന സംഭവങ്ങളുമാണ് ചിത്രത്തിന്റെ കഥാപശ്ചാത്തലം.
ചെറിയ ബഡ്ജറ്റിൽ സിനിമ ചെയ്യാൻ നിർബന്ധിതരാവുന്ന ചെറുപ്പക്കാർ നേരിടുന്ന വെല്ലുവിളികളും ചിത്രത്തിന്റെ പ്രധാന പ്രമേയമാണ്. കുട്ടികളുടെ പ്രകടനങ്ങൾക്ക് പ്രാധാന്യം കൊടുത്തുകൊണ്ടുതന്നെ കുട്ടികളേയും, കുടുംബങ്ങളേയും ആകർഷിക്കുന്ന വിധത്തിലാണ് ഈ ചിത്രത്തിൻ്റെ അവതരണം. വിഷ്ണു ഉണ്ണികൃഷ്ണനാണ് ചിത്രത്തിൽ പ്രിയേഷിനെ അവതരിപ്പിക്കുന്നത്.
വലിയ സ്വപ്നങ്ങളുമായി മുന്നേറുന്ന യുവാക്കൾ ജീവിതത്തിൽ നേരിടുന്ന വെല്ലുവിളികളെയും അതിജീവനങ്ങളെയും ആസ്പദമാക്കിയാണ് സിനിമ കഥ പറയുന്നത്. ഓരോ പ്രതിസന്ധിയിലും സുഹൃത്ത് ബന്ധങ്ങളുടെ ശക്തിയും ആത്മാർത്ഥതയും തന്നെയാണ് പരിഹാരങ്ങളിലേക്ക് വഴിതെളിക്കുന്നത്. ആദ്യ പ്രദർശനങ്ങൾക്കു പിന്നാലെ തന്നെ ചിത്രത്തിന് മികച്ച പ്രേക്ഷക പ്രതികരണമാണ് ലഭിച്ചിരിക്കുന്നത്.
ഹാസ്യത്തിന് പ്രധാന്യം നൽകി ഒരുക്കിയ ചിത്രത്തിൽ വിഷ്ണു ഉണ്ണികൃഷ്ണന്റെയും ബാലതാരങ്ങളായി എത്തിയ കുട്ടികളുടെയും പ്രകടനം ശ്രദ്ധേയമായി മാറുന്നു. ഒരു സൂപ്പർഹീറോ മൂഡിനെ മനോഹരമായി അവതരിപ്പിക്കുന്നതിലും സംവിധായകൻ വിജയിച്ചിരിക്കുന്നു അടയാളപ്പെടുത്തിയിരിക്കുന്നത്.
ശ്രീപത് യാൻ (മാളികപ്പുറം, സുമതി വളവ്), ധ്യാൻ നിരഞ്ജൻ (ഇടിയൻ ചന്തു) ആദിശേഷ്, വിസാദ്,ആവണി എന്നിവരാണ് ചിത്രത്തിൽ പ്രധാന വേഷങ്ങളിൽ എത്തുന്ന കുട്ടി കഥാപാത്രങ്ങളെ അവതരിപ്പിക്കുന്നത്. ലാലു അലക്സ്,ബിനു ശശിറാം, വിജിലേഷ്, സഞ്ജു ശിവറാം, സാജു നവോദയ, കെ.പി.എ.സി മുഹമ്മദ്, അൻഷ മോഹൻ, മറീന മൈക്കിൾ, അഞ്ജലി നായർ, ഷൈനി സാറ, ആതിനാട് ശശി, ദിപിൻ ബാബു, സാബു, പ്രൗദ്ധീൻ എന്നിവരും ചിത്രത്തിൽ പ്രധാന കഥാപാത്രങ്ങളായി എത്തുന്നു. താരക പ്രൊഡക്ഷൻ ആണ് ചിത്രത്തിന്റെ നിർമ്മാണം.
Story Highlight : Review Of Malayalam Film “Revolver Rinko”
